ގުދްސް ފޯސްގެ ކޮމާންޑަރު އިސްމާއީލް ގަނީ ހުންނެވީ ހެޔޮ ހާލުގައި ކަމަށާއި އޭނާއަށް ކުރިއަށް އޮތް ދެތިން ދުވަހުގެ ތެރޭގައި މަތީ ދަރަޖައިގެ މެޑެލް ދިނުން އޮންނާނެ ކަމަށް އީރާނުގެ އިސްލާމިކް ރެވޮލިއުޝަން ގާޑްސް ކޯޕްސް (އައި.އާރް.ޖީ.ސީ) އިން ބުނެފިއެވެ.

އައިއާރްޖީސީ ގެ އިސް ކޮމާންޑަރުގެ މުޝީރަކާ ހަވާލާދީ އީރާނުގެ ރަސްމީ ޓީވީން ބުނެފައިވަނީ ބްރިގޭޑިއަރ ޖެނެރަލް އިސްމާއީލް ގަނީ ދުޅަހެޔޮ ސިއްހަތެއްގައި ހުންނެވި ކަމަށާއި، އޭނާ އަށް އިސްލާމީ އިންޤިލާބުގެ ސުޕްރީމް ލީޑަރު އާޔަތުﷲ ސައްޔިދު ޢަލީ ޚާމަނާއީގެ އަތްޕުޅުން "އޯޑަރ އޮފް ފަތްޙު" މެޑެލް ލިބިވަޑައިގަންނަވާނެ ކަމަށެވެ.

ބްރިގޭޑިއަރ ޖެނެރަލް އިބްރާހިމް ޖަބާރީ މިކަން އީރާނުގެ ޓީވީ އަށް ހާމަކުރެއްވީ ބުދަ ދުވަހުއެވެ.

އީރާނުން މިކަން ހާމަ މިކުރީ އިޒްރޭލުގެ ވަރުގަދަ ހަމަލާއެއްގައި، އައިއާރްޖީސީ ޤުދްސް ފޯސްގެ ކޮމާންޑަރު ބެއިރޫތުގައި ހުންނަވަނިކޮށް އަނިޔާވެފައިވާ ކަމަށް ނުވަތަ އަވަހާރަވެފައިވާ ކަމަށް ބުނެ ބޭރުގެ މީޑިއާތަކުން ޚަބަރުތައް ފަތުރާފައިވަނިކޮށްނެވެ. އޭނާ އަވަހާރަވެފައިވަނީ ބައިރޫތުގެ ދާހިޔާ ސަރަހައްދަށް ހިޒްބުﷲ ގެ އިސް އޮފިޝަލެއް ކަމަށްވާ ހާޝިމް ސަފީއުއްދީނަށް އަމާޒުކޮށް އިޒްރޭލުން ދިން ވަރުގަދަ ހަމަލާއެއްގައި ކަމަށްވެސް ހުޅަނގުގެ މީޑިއާ ތަކުން ބުނެފައިވެއެވެ.

ގަނީ ވަނީ މި ހަފްތާގައި އީރާނުގައި ބޭއްވުނު ފަލަސްޠީނުގެ ކުޑަކުދިންނާއި ޒުވާނުންނާ އެއްބައިވަންތަކަމުގެ 7 ވަނަ ބައިނަލްއަޤްވާމީ ކޮންފަރެންސަށް މެސެޖެއް ވެސް ފޮނުއްވާފައެވެ.

ހޯމަ ދުވަހު އިއްވި މި މެސެޖުގައި ޤުދްސް ފޯސްގެ ކޮމާންޑަރު ވަނީ އެހެން ޚާއްޞަ ބައްދަލުވުމެއްގައި ބައިވެރިވެވަޑައިގަންނަވަން ޖެހުމުގެ ސަބަބުން ކޮންފަރެންސްގައި ބައިވެރިވެވަޑައިނުގެންނެވުނު ކަމަށްޓަކައި މާފަށް އެދިވަޑައިގެންފައެވެ.

ނަމަވެސް ބޭރުގެ މީޑިއާތަކުން ބުނަމުން ގޮސްފައިވަނީ ފާއިތުވި ދުވަސްތަކުގައި ގަނީގެ ހާލު އެނގިފައިނުވާ ކަމަށާއި، އޭނާ އާ ބެހޭ ގޮތުން އީރާނުގެ އޮފިޝަލުން ވެސް އެއްވެސް އެއްޗެއް ނުބުނާ ކަމަށެވެ.

އިސްމާއީލް ގަނީ ޤުދްސް ފޯސްގެ ވެރިޔާގެ މަޤާމަށް ޢައްޔަންކުރެވުނީ 2020 ވަނަ އަހަރުގެ ޖެނުއަރީ 3 ވަނަ ދުވަހުއެވެ. އޭނާ އެ މަގާމަށް އިސްކުރީ އެމެރިކާއިން ޓެރަރިޒަމާ ދެކޮޅަށް ކުރާކަމަށް ބުނާ ހަނގުރާމައިގައި ގުދުސް ފޯސްގެ އެންމެ އިސް ކޮމާންޑަރު ޖެނެރަލް ޤާސިމް ސުލައިމާނީ އަވަހާރަކޮށްލުމާ ގުޅިގެންނެވެ.

ގަނީ އަކީ 1980 އިން ފެށިގެން 8 އަހަރަށް ދެމިގެންދިޔަ، އިރާގު-އީރާން ހަނގުރާމައިގައި އައިއާރްޖީސީގެ އެންމެ ފާހަގަކޮށްލެވޭ ކޮމާންޑަރުންގެ ތެރެއިން އެކަކު ކަމުގައި އެގަމުގެ ރޫހާނީ ލީޑަރު ވަނީ ވިދާޅުވެފައެވެ.