ޗެލްސީ އޮތީ ސިޓީ އާއި އާސެނަލާ ވާދަކުރެވޭ ފެންވަރުގައެއް ނޫން: މަރެސްކާ

ޗެލްސީ އޮތީ އިނގިރޭސި ޕްރިމިއާ ލީގަށް ވާދަކުރެވޭ ފެންވަރެއްގައި ނޫން ކަމަށް އެ ޓީމުގެ ކޯޗު އެންޒޯ މަރެސްކާ ބުނެފި އެވެ.

އޭނާ މިހެން ބުނީ ޔުއެފާ ކޮންފަރެންސް ލީގުގައި ޗެލްސީން ޖެންޓާ ދެކޮޅަށް ކުޅުނު މެޗަށްފަހު އެވެ. ޗެލްސީގެ އަމިއްލަ ދަނޑުގައި ކުޅުނު އެ މެޗުން އެ ޓީމު ވަނީ މޮޅުވެފަ އެވެ. ޗެލްސީގެ ކޯޗުކަމާ މަރެސްކާ ހަވާލުވީ މި ސީޒަނާ ދިމާކޮށެވެ. ޗެލްސީން އޭނާއާ ހަވާލުކޮށްފައިވާ އެންމެ ބޮޑު އެއް މަސައްކަތަކީ ވެސް، އެ ކުލަބުގެ ނަތީޖާތައް ރަނގަޅު ކުރުމެވެ.

ޗެލްސީއާ ގުޅޭ ގޮތުން މަރެސްކާ ބުނީ ޗެލްސީ އަށް މެންޗެސްޓަރ ސިޓީ އާއި އާސެނަލާ ވަދާކުރެވިދާނެ ކަމަށް އޭނާ އަށް ޤަބޫލު ނުކުރެވޭ ކަމަށެވެ. މަރެސްކާ އެހެން ބުނީ، ޗެލްސީ އަށް އިނގިރޭސި ޕްރިމިއާ ލީގަށް ވާދަކުރެވިދާނެތޯ ކުރި ސުވާލާ ގުޅިގެންނެވެ. ސިޓީ އާއި އާސެނަލާ ވާދަ ކުރެވޭ ފެންވަރު ޗެލްސީގައި އަދި ނެތްކަން ފާހަގަކޮށް އޭނާ ބުނީ، ޗެލްސީ އެކަމަށް ތައްޔާރު ނޫން ކަމަށެވެ.

އެކަން ފާހަގަކޮށް މަރެސްކާ ބުނީ ޕެޕް ގާޑިއޯލާގެ އިރުޝާދުގެ ދަށުން ސިޓީ ކުޅެމުން އަންނަތާ ނުވަ އަހަރުވެފައިވާއިރު، މިކޭލް އާޓެޓާގެ އިރުޝާދުގެ ދަށުން އާސެނަލް ކުޅެމުން އަންނަތާ ފަސް އަހަރުވެފައިވާ ކަމަށެވެ. އަދި އޭނާ ޗެލްސީއާ ހަވާލުވެ މިހާތަނަށް ވެފައި ވަނީ އެންމެ ތިން މަސް ދުވަސްކަން ފާހަގަކޮށް މަރެސްކާ ބުނީ، ނަތީޖާ ނެރެވޭނީ އެކަށީގެންވާ ވަގުތުގައި މަސައްކަތް ކޮށްގެން ކަމަށެވެ.

ޗެލްސީގައި ކުރަމުން އަންނަ މަސައްކަތަަށް އިޝާރާތް ކުރަމުން މަރެސްކާ ބުނީ، ޓާގެޓެއް ކަނޑައަޅައިގެން މަސައްކަތް ކުރަމުން އަންނަ ކަމަށެވެ. ޓާގެޓަށް ވާސިލު ވެވޭނީ ހަރުފަތަކަށްފަހު ހަރުފަތަކުން މަސައްކަތް ކޮށްގެން ކަމަށް ވެސް މަރެސްކާ ބުންޏެވެ. މި ސީޒަންގެ ޕްރިމިއާ ލީގުގައި މިހާތަނަށް ޗެލްސީން ހަ މެޗު ކުޅެފައިވާއިރު، ހަތަރު މެޗުން ވަނީ މޮޅުވެފަ އެވެ. އެއް މެޗުން އެއްވަރުވެ، އެއް މެޗުން ވަނީ ބަލިވެފަ އެވެ. ލީގު ތާވަލްގެ ހަތަރު ވަނައިގައި އެ ޓީމު އޮތީ 13 ޕޮއިންޓާ އެކު އެވެ.