ގޯއްޗާއި ފްލެޓުގެ ކަންކަމުގައި މަސައްކަތް ކުރާ ޔޫނިއަންތަކާ މި ސަރުކާރުން ބައްދަލުކުރީ މުޒާހަރާ ހުއްޓުވާލުމުގެ ބޭނުމުގައި

ގޯއްޗާއި ފްލެޓުތަކުގެ ކަންކަމުގައި މަސައްކަތް ކުރާ ޔޫނިއަންތަކުގެ ބޭފުޅުންނާ މި ސަރުކާރުން ބައްދަލުކުރީވެސް ސީދާ މުޒާހަރާ ހުއްޓުވާލުމުގެ ބޭނުމުގައިކަމަށް ގެދޮރުވެރިކަމުގެ މައްސަލައިގައި ވަކާލާތު ކުރަމުންދާ ފަރާތްތަކުން ބުނެފިއެވެ.

ރާއްޖެޓީވީގެ ފަސްކާފު ޕްރޮގްރާމްގައި ވާހަކަ ދައްކަވަމުން އެ މަސައްކަތުގައި އުޅުއްވާ ފަރާތެއްކަމަށްވާ ފާތިމަތު ސަމީރު ވިދާޅުވީ، ފްލެޓާއި ގޯތި ދިނުން ލަސްވުމަކީ އިޖުތިމާއީ ގޮތުން ކުރިމަތިވެފައިވާ އެތައް މައްސަލަތަކެއްގެ ޙާލަތު އިތުރަށް ގޯސްވުމަށް މަގުފަހިވާ ކަމެއް ކަމަށެވެ.

މިއީ ޤައުމުތަކުގެ ވެރިކަމަށް ވަޑައިގަންނަވާ ބޭފުޅުން ނުހަނު ފުންކޮށް ވިސްނަން ޖެހޭ ކަންކަން ކަމަށްވެސް ފާތިމަތު ސަމީރު ވިދާޅުވިއެވެ.

އެމްޑީޕީގެ އަންހެހުންގެ ރޫހުގެ ނައިބްރައީސާއެއްގެ ގޮތުގައިވެސް ކުރިން މަސައްކަތް ކުރެއްވި ފާތިމަތު ސަމީރު ވިދާޅުވާ ގޮތުގައި ގޯއްޗާއި ފްލެޓު ލިބިފައިވާ މީހުން ހައްޤު ހޯދުމަށާއި، ބަސް ބުނުމަށް ނުކުންނަން ޖެހެއެވެ.

މި ޕްރޮގްރާމްގައި ވާހަކަ ދައްކަވަމުން ފްލެޓާ ގޯތީގެ ކަންކަމުގައި ވަކާލާތު ކުރާ ފަރާތެއްކަމަށްވާ އަނުޝާ އަބްދުލް ލަތީފް ވިދާޅުވީ، ގެދޮރުވެރިކަމުގެ މައްސަލައަކީ ސާޅީސް އެތައް އަހަރެއްވީ މައްސަލައެއް ކަމަށާއި، ނަމަވެސް ބޯހިޔާވަހިކަމުގެ އެއްވެސް ފުރުސަތެއް ލިބިފައިނުވާ އެތައް ރައްޔިތުންނެއް އެބަތިބި ކަމަށެވެ.

އޭގެ އިތުރުން، ޑރ މުއިއްޒު ވެރިކަމަށް ވަޑައިގެން ވެވަޑައިގެންނެވި ވައުދު ފުއްދަވާތޯވެސް އެތައް ފަހަރަކު ބަލާފައިވާނެކަމަށް އޭނާ ވިދާޅުވިއެވެ. ނަމަވެސް ކަންކަން ވެގެން ދިޔައީ އެހެނެއް ނޫން ކަމަށާއި، ސަރުކާރުން މިކަމުގައި ޖަވާބުދާރީވުމުގެ ބަދަލުގައި "ފިއްލެވީކަމަށް" އޭނާ ވިދާޅުވިއެވެ.

އެންމެ ފަހުން ޔޫނިއަންތަކުގެ ބޭފުޅުންނާ މި ސަރުކާރުން ބައްދަލުކުރީވެސް ސީދާ މުޒާހަރާ ހުއްޓުވާލުމުގެ ބޭނުމުގައިކަމަށް އޭނާ ވިދާޅުވިއެވެ.

އެހެންނަމަވެސް މިއަދާ ހަމައަށްވެސް އާންމު ރައްޔިތުންނަށް އެދެވޭ ޖަވާބެއްވެސް މަންޒަރެއްވެސް ނުފެންނަކަމަށް އޭނާ ވިދާޅުވިއެވެ. އެހެންކަމުން ހައްގު ހޯދުމަށް ރައްޔިތުން ނުކުންނަން ޖެހޭކަން އޭނާ ފާހަގަ ކުރެއްވިއެވެ.

ގެދޮރުވެރިޔާ ސްކީމުގެ ދަށުން ފުލެޓު ލިބޭ މީހުންގެ ފައިނަލް ލިސްޓު މިއަންނަ އޮކްޓޯބަރު މަސްތެރޭގައި އާއްމުކުރާނެ ކަމަށް ސަރުކާރުން ވަނީ ބުނެފައެވެ. ސަރުކާރުން އެހެން ބުނެފައިވަނީ ގޯއްޗާއި ފްލެޓުތަކުގެ ކަންކަމުގައި މަސައްކަތް ކުރާ ޔޫނިއަންތަކުގެ ބޭފުޅުންނާ ބައްދަލު ކުރުމަށްފަހުއެވެ.