ވެރިކަމާއި ހަވާލުވެވަޑައިގެން ކެމްޕޭން ކުރެއްވި އިރު، ކަންކަން އޮތީ ކިހިނެއްކަން މި ސަރުކާރަށް އެނގޭނެ
ކުރީގެ ހޯމް މިނިސްޓަރު އުމަރު ނަސީރު
ވެރިކަމަށް އަންނަން ދެއްކި ވާހަކައާއި ވެރިކަން ލިބުނީމަ ދައްކާ ވާހަކަ ތަފާތުވާނީ ދޮގުވެރިންގެ ކަމަށާއި، އިންޑިއާ އައުޓް މޭމަތީގައި ޖަހައިގެން ހިނގުމަކީ ގޯހެއް ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
ރާއްޖެޓީވީގެ ސުވާލަކީ ޕްރޮގްރާމުގައި ވާހަކަދައްކަވަމުން އުމަރު ވިދާޅުވީ މިހާރު ކުރެވޭ އެންމެ ބޮޑު ބަހުސްއަކީ މި ސަރުކާރާއި އިންޑިއާއާއި އޮތް ގުޅުމުގެ ވާހަކަ ކަމަށެވެ. މި ސަރުކާރުން ބުނެފައިވަނީ އިންޑިއާ އަސްކަރިއްޔާ ފޮނުވާލާނެ ވާހަކަ ކަމަށާއި، އިންޑިއާގެ އުނގަށްވެސް ނާރާނެކަމަށް މި ސަރުކާރުން ބުނި ކަމަށް އުމަރު ވިދާޅުވިއެވެ. އުމަރު ވިދާޅުވީ ކުރިން އެހެން ވިދާޅުވިނަމަވެސް މިއަދުގެ ހާލަތު އޮތްގޮތުން އުނގުގައި އިށީންނަށް ޖެހޭ ކަމަށާއި، އެއީ އެމްޑީޕީގެ ސަރުކާރު ދިޔައިރު ދިޔައީ ގައުމު ދަރުވާލާފައިކަމުން އެކަން ކުރަންޖެހޭ ކަމަށް ބުނެ މި ބަހުސް ކުރެވެމުންދާ ކަމަށެވެ.
އުމަރު ވިދާޅުވީ ވެރިކަމާއި ހަވާލުވެވަޑައިގެން ކެމްޕޭން ކުރެއްވި އިރު، ކަންކަން އޮތީ ކިހިނެއްކަން މި ސަރުކާރަށް އެނގޭނެ ކަަމަށެވެ. މީގެ އިތުރުން ކެމްޕޭން ތެރޭގައި މާލީ ހާލަތާއި ގުޅޭގޮތުން ސަރުކާރުން ވާހަކަ ދެއްކި ކަމަށާއި، ފައިސާއައި ހުރިހާކަމެއް ހަމަޖެހިފައިވާކަމަށް މި ސަރުކާރުން ބުނަމުން ދިޔަކަމަށެވެ.
އުމަރު ވިދާޅުވީ ގައުމުގެ ހަރަދު އަމިއްލައަށް ހަމަޖައްސާ ހަރަދުކުޑަކޮށްފިނަމަ އެ ދަރަނި ދެއްކޭނެ ކަމަށެވެ. އަދި އެއީ ނުދެއްކޭވަރުގެ ދަރަންޏެއް ނޫން ކަމަށާއި ކުރަންޖެހޭނެ ހަމައެކަނި ކަމަކީ ހަރަދުކުޑަކުރުން ކަމަށެވެ.
އުމަރު ވިދާޅުވީ ސަރުކާރުން ކުރަންޖެހޭ ކަމަކީ ހަރަދު ކުޑަކުރުން ކަމަށެވެ. އަދި ހަރަދު ކުޑަކޮށް ސިޔާސީ މީހުން މަދުކޮށްފިކަމުގައިވާނަމަ ފަސޭހަކަމާއެކު އަހަރަކު 50 މިލިއަން ޑޮލަރު މުސާރައިން އެކަނިވެސް ސަލާމަތްކުރެވޭނެ ކަމަށެވެ.
އުމަރު ވިދާޅުވީ އިގްތިސާދީ ކޮޅިގަނޑުގެ މެދާ ހިސާބަށް އަދި ނުދެވޭ ކަމަށާއި، އަދި މި އަންނަނީ އަރިމަތީގައި ހުރި ވައި ކަމަށެވެ. މި ތޫފާނާއި ބައްދަލުވާނީ އަންނަ އަހަރު ނުވަތަ ދެން އަންނަ އަހަރެއްގައި ކަމަށާއި، މިހާރު މި ދަތުރުކުރާގޮތަށް ދަތުރުކޮށްފިނަމަ ރާއްޖެ ބަނގުރޫޓްވާނެ ކަމަށެވެ.
އަދި މުޅި ދައުލަތުގެ ހަރަދު ކުޑަކޮށް، ސަރުކާރުގެ ހަރަދު 30 އިންސައްތަައަށް ވާވަރަށް ކުޑަނުކޮށްފިނަމަ ބަނގުރޫޓްވާނެ ކަމަށާއި، ސަރުކާރު ދަރައިފިނަމަ އަމިއްލަ ކުންފުނިތައް އޭގެ އަސަރުކޮށް ކުންފުނިތައް ބަނގުރޫޓުވެ އެތައް ބައެއްގެ ވަޒީފާ ގެއްލި ހާލަތު ވަރަށް ބޮޑަށް ގޯސްވެގެންދާނެ ކަމަށެވެ.
