ހިޒްބުﷲ އިން އިޒްރޭލުގެ ތެލްއަވީވް ކައިރީގައި ހުންނަ މޮސާޑްގެ މައި އިދާރާއަށް ބެލިސްޓިކް މިސައިލް ހަމަލާތަކެއް ފޮނުވާލައިފިއެވެ.
މި ހަމަލާއާ ގުޅިގެން ހިޒްބުﷲ އިން ބުނެފައިވަނީ ހަމަލާ އަމާޒުކުރި އިޒްރޭލުގެ އިންޓެލިޖެންސް އޭޖެންސީ އަކީ މިފަހަކަށް އައިސް ލުބުނާނުގެ ހިޒްބުﷲ ގެ މެމްބަރުން ބޭނުން ކުރާ ޕޭޖަރުތަކާއި ވޯކީޓޯކީ ފަދަ ވަސީލަތްތަކަށް ހަމަލާތައް ރާވާ ތަނެއް ކަމަށެވެ.
"'ޤާދިރު 1' ބެލިސްޓިކް މިސައިލެއް 2024 ސެޕްޓެމްބަރު 25 ވަނަ ދުވަހުގެ ހެނދުނު 6:30 ގައި ފޮނުވާލާފައިވާނެ. މި މިސައިލް އަމާޒުކުރީ ޓެލް އަވީވްގެ ބޭރު ސަރަޙައްދުގައި ހުރި މޮސާޑްގެ މައި މަރުކަޒަށް. މި މަރުކަޒަކީ ލީޑަރުން އަވަހާރަކޮށްލުމާއި ޕޭޖަރުތަކާއި ވަޔަރލެސް ވަސީލަތްތައް ގޮއްވާލުމަށް ޒިންމާވާ ތަނެއް،" ހިޒްބުﷲ އިން ނެރުނު ބަޔާނުގައި ބުނެފައިވެއެވެ.
ހިޒްބުﷲ އިން އިތުރަށް ބުނެފައިވަނީ، މި ހަމަލާއަކީ ޣައްޒާގެ ރައްޔިތުންނާއި އެއްބައިވުމުގެ ގޮތުންނާއި ލުބުނާނަށް އިޒްރޭލުންދޭ ހަމަލާތަކުގެ ބަދަލު ހިފުމުގެ ގޮތުން ދީފައިވާ ހަމަލާއެއް ކަމަށެވެ.
ހަމަލާއާ ގުޅިގެން އިޒްރޭލުން ބުނެފައިވަނީ މިއީ ލުބުނާނުގެ މިސައިލް ހަމަލާއެއް އިޒްރޭލުގެ މެދުތެރެއަށް އަމާޒުވި ފުރަތަމަ ފަހަރު ކަމަށާއި، މި ހަމަލާގައި އެއްވެސް މީހަކަށް އަނިޔާ ވެފައިނުވާ ކަމަށެވެ.
ހިޒްބުﷲ އިން މި ހަމަލާދީފައި މިވަނީ، އިޒްރޭލުން ލުބުނާނަށް ބޮމުގެ ހަމަލާތައް ދެމުންދާ ދަނޑިވަޅެއްގައެވެ. އިޒްރޭލުން ދިން ހަމަލާތަކުގައި މިހާތަނަށް ލުބުނާނުން މަދުވެގެން 500 މީހުން މަރުވެ، އެތައް ހާސް ބަޔަކު ޒަޚަމްވެ، އެތައް ބަޔަކު ގެދޮރު ދޫކޮށް ފިލަން މަޖުބޫރުވެފައިވެއެވެ.
