އެޗްޑީސީން ރޯމާ ދުވާލު އެ ހިންގާލީ އެތައް މިލިއަން ރުފިޔާގެ ބޮޑު ޚިޔާނާތެއް!

ސޯޝަލް މީޑިއާގައި ދައުރުވަމުންދާ ލިޔެކިޔުންތަކާއި، މައުލޫމާތު ތަކަށް ބަލާއިރު، ހުޅުމާލެ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބޮޑު ޚިޔާނާތެއް ހިންގާފައިވާކަމުގެ ތުހުމަތު ކުރެވެއެވެ.

ދައުރުވަމުންދާ މައުލޫމާތު ތަކުން އެގޭ ގޮތުގައި، މި މައްސަލައިގައި ކުންފުނި ހިންގެވުމުގައި އިސްކޮށް ހުންނެވި ފަޟުލް ރަޝީދު ވަނީ ރައީސް މުޢިއްޒަށް ފައިސާގެ ވަޢުދެއް ވެފައެވެ. އޭގެ މާ ބޮޑު ތަފްސީލުތަކެއް ހާމަކޮށްފައި ނެތް ނަމަވެސް ތުހުމަތު ކުރެވޭ މި ކޮރަޕްޝަންގެ އަމަލު ހިންގާފައިވާ ގޮތް ދޭހަވާ ޑޮކިއުމެންޓްތަކެއް "ކުރުސީ" ކިޔާ އެކްސް އެކައުންޓަކުން ވަނީ ޕޯސްޓް ކޮށްފައެވެ. މި ޑޮކިއުމެންޓްތަކަކީ ސައްހަ ނޫން ޑޮކިއުމެންޓް ތަކެއް ކަމަކަށް އެޗްޑީސީން ބުނެފައެއް ނުވެއެވެ. 

ފެންމަތިވެގެން މި އުޅޭ މައްސަލައަކީ 9 އިމާރާތެއްގެ ކުލަލުމާއި ރެނދުތައް ފިލުވުމަށް ކޮންޓްރެކްޓެއް، މީގެ 10 މަސް ކުރިން އުފައްދާފައިވާ އުމުރުން ހަގު ކުންފުންޏެއް ކަމަށްވާ މެގަވާރސްއަށް ދިނުމުގައި ހިންގާފައިވާ ކޮރަޕްޝަނަށް ތުހުމަތު ކުރެވޭ އަމަލެވެ.

މި ކުންފުންޏަކީ ސަރުކާރުގެ އިސްވެރިންގެ ގާތް ރަހުމަތްތެރި ކުންފުންޏެއް ކަމުގެ އަޑުތައް ވަނީ ފެތުރިފައެވެ. މި މަސައްކަތަށް މެގަވާރސްއިން ހުށަހަޅާފައިވާ އަގަކީ 6,612,624.00 (ހަ މިލިއަން ހަ ލައްކަ ބާރަހާސް ހަސަތޭކަ ސައްވީސް) ރުފިޔާއެވެ. މިއީ އިމާރާތަކަށް 734,736.00 (ހަތްލައްކަ ތިރީސް ހަތަރުހާސް ހަތްސަތޭކަ ތިރީސްހައެއް ރުފިޔާ) ރުފިޔާގެ ރޭޓުންނެވެ.

ލިޔެ ކިޔުންތަކުން ހާމަވާ ގޮތުގައި މީގެ ކުރިން މިފަދަ މަސައްކަތްތައް ކޮށްފައިވާ ތަޖުރިބާކާރު ކުންފުނިތަކުން މި މަސައްކަތަށް ހުށަހަޅާފައިވާ އަގުތަކަކީ މާކެޓް އަގާ އެއްގޮތް ހެޔޮ އަގުތަކެކެވެ.

އެގޮތުން ލިންކް ސިޓީން 2022 ގައި 11 އިމާރާތެއްގައި ހަމަ އެބުނާ މަސައްކަތް ކޮށްފައިވަނީ އިމާރާތަކަށް 217,675.82 (ދެ ލައްކަ ސަތާރަ ހާސް ހަ ސަތޭކަ ހަތްދިހަ ފަހެއް ޕޮއިންޓް އަށްޑިހަ ދޭއް) ރުފިޔާގެ ރޭޓުންނެވެ. އޭގެ އިތުރުން ޓިކްޓެކް ކިޔާ ކުންފުންޏަކުން 2023 ގައި 26 އިމާރާތެއްގެ ކުލަލުމާއި ރެނދުތައް މަރާމާތު ކޮށްފައިވަނީ، އިމާރާތަކަށް 164,160 (އެއްލައްކަ ފަސްދޮޅަސް ހަތަރުހާސް އެއްސަތޭކަ ފަސްދޮޅަސް) ރުފިޔާގެ ރޭޓުންނެވެ.

މި މަސައްކަތަށް ބިޑް ހުށަހެޅި 3 ފަރާތަކުން ވަނީ 2 މިލިއަން ރުފިޔާއާއި 3 މިލިއަން ރުފިޔާއާ ދެމެދުގެ އަގުތަކެއް ހުށަހަޅާފައެވެ. ނަމަވެސް މިއިން އެއްވެސް އަގަކީ "އެކަށީގެންވާ އަގެއް" ކަމުގައެއް ނުވިއެވެ.

ކަން ހިންގާފައިވާ ގޮތައް ބަލާއިރު މިކަމުގެ އަޑީގައި ތިބި ފަރާތްތަކުން ވަނީ ގަސްދުގައި މަތީ އަންދާޒާ އަގެއް ކަނޑައަޅައި، ދަށް އަގު ހުށަހަޅާ ފަރާތްތައް ޑިސްކޮލިފައި ކޮށްލާ ގޮތައް ރާވާފައިކަން ހާމަ ވެއެވެ. މިއީ ޙަގީގީ މާކެޓް އަގަށްވުރެ މާ މަތީ އަގެއްގައި މަސައްކަތް ހަވާލުކުރުމަށް ކޮށްފައިވާ ކަމެއް ކަމަށް ބެލެވެއެވެ.

ފެންނަން ހުރި ލިޔެކިޔުމަށް ބަލާއިރު މިއީ ދައުލަތުގެ ފައިސާ ނާޖާއިޒު ގޮތުގައި ބަޔަކަށް ހޯދައިދިނުމަށް ކޮށްފައިވާ ކަމެއް ކަމަށް ތުހުމަތުކުރެވެއެވެ. މިއީ ރޯމާ ދުވާލު ކޮށްފައިވާ ވައްކަމުގެ އަމަލެއް ކަމަށް ގިނަ ބަޔަކު ސޯޝަލް މީޑިއާގައި އަންނަނީ ބުނަމުންނެވެ. 

ލިންކް ސިޓީ ފަދަ ތަޖުރިބާ ހުރި ކުންފުނިތައް "ދަށް އަގު ހުށަހަޅާ ފަރާތްތައް" އަދި "ހަމައެކަނި ޕްރޮޖެކްޓް ހޯދުމަށް ބިޑް ހުށަހަޅާ ފަރާތްތައް" ގެ ގޮތުގައި ލޭބަލްކޮށް ޑިސްކޮލިފައި ކޮށްފައިވާއިރު، މި ފަރާތްތަކަކީ ކުރިން މިފަދަ މަސައްކަތްތައް ކޮށްފައިވާ ފަރާތްތައް ކަން ފާހަގަކުރެވެ އެވެ.

މި މައްސަލައިގައި ޙަޤީޤީ މާކެޓް އަގަކީ އިމާރާތަކަށް ގާތްގަނޑަކަށް 160,000 (އެއްލައްކަ ފަސްދޮޅަސް ހާސް) ރުފިޔާއާއި 220,000 (ދެ ލައްކަ ވިހި ހާސް) ރުފިޔާއާ ދެމެދުގެ އަދަދެއްކަން ފާހަގަކުރެވެއެވެ. ނަމަވެސް މެގަވާރސްއަށް މަސައްކަތް ހަވާލުކޮށްފައިވަނީ އިމާރާތަކަށް 734,000 (ހަތް ލައްކަ ތިރީސް ހަތަރު ހާސް) ރުފިޔާގެ ރޭޓުން މާ ބޮޑު އަގެއްގައެވެ.

މި މައްސަލައިގައި ފެންނަން ހުރި ހެކިތަކަށް ބަލާއިރު، މިއީ ހިންގާފައިވާ ބޮޑު ޚިޔާނާތެއް ކަމަށް ބެލެވެއެވެ. މި ފަހަކަށް އައިސް ސަރުކާރާއި ސަރުކާރު ހިއްސާވާ ކުންފުނިތަކުގެ މިފަދަ އެތައް ޚިޔާނާތުގެ މައްސަލަތައް ވަނީ ފެންމަތިވެފައެވެ. އެހެން ނަމަވެސް މިކަންކަމާ އަޅާލާ ކަމާބެހޭ މުއައްސަސާއެއް ހުރި ކަމަކަށް ނުފެނެއެވެ.