ނޯމަލައިޒިން ކޮމެޓީ އަށް އެހީވުމަށް ފީފާގެ ޚާއްސަ ޓީމެއް ރާއްޖެ އަންނަނީ
24 ސެޕްޓެމްބަރު 2024 | އަންގާރަ 06:19ދިމާވެގެން އުޅެނީ އެތައް ޒަމާނެއްވެފައިވާ މައްސަލަތަކެއް ކަމަށާއި، މިހާރު ކުރަމުން އަންނަނީ އެ މައްސަލަތައް ޙައްލު ކުރުމުގެ މަސައްކަތްކަން ފާހަގަ ކުރައްވައި ޒުހޫރު ވިދާޅުވީ، ފީފާ އިން އަންނަ ޓީމުގެ ބޭނުމަކީ މަޝްވަރާކޮށް، ކުރިއަށް ދާން ހުރި ކަންކަން އިތުރަށް ބެލުން ކަމަށެވެ.
އެފްއޭއެމް ނޯމަލައިޒިން ކޮމެޓީގެ ޗެއާމަން އަޙުމަދު ޒުހޫރު
ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ނޯމަލައިޒިން ކޮމެޓީން ކުރަމުން އަންނަ މަސައްކަތްތަކާ ގުޅިގެން، އެ ކޮމެޓީ އަށް އެހީތެރިކަން ފޯރުކޮށްދިނުމަށް ދުނިޔޭގެ ފުޓުބޯޅައިގެ މައި އިދާރާ (ފީފާ) ޚާއްސަ ޓީމެއް ރާއްޖެ އަންނަ ގޮތަށް ހަމަޖެހިއްޖެ އެވެ.
ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ވަނީ ރާއްޖެ ނޯމަލައިޒް ކުރުމަށް ނިންމައި، ފަސް މެމްބަރުންގެ ކޮމެޓީއެއް ވަނީ އައްޔަން ކޮށްފަ އެވެ. ފީފާ އިން ނިންމާފައި ވަނީ 2025 ވަނަ އަހަރުގެ ޖުލައި މަހުގެ އެއް ވަނަ ދުވަހުގެ ނިޔަލަށް ރާއްޖެ ނޯމަލައިޒް ކުރުމަށެވެ. އެ މުއްދަތުގެ ތެރޭގައި އެފްއޭއެމްގެ ކަންކަން ރަނގަޅުކޮށް، އައު އިންތިޚާބެއް ބާއްވައި، އައު ހިންގާ ކޮމެޓީ އެއްވެސް އިންތިޚާބު ކުރަން ޖެހޭނެ އެވެ.
ނޯމަލައިޒިން ކޮމެޓީން ވަނީ މިދިޔަ ހަފުތާގެ ތެރޭގައި ނޫސްވެރިންގެ ބައްދަލުވުމެއް ވެސް ބާއްވައިފަ އެވެ. އެއީ އެ ކޮމެޓީން ކުރަމުން އަންނަ މަސައްކަތްތަކުގެ އެންމެ ފަހުގެ މައުލޫމާތު ހިއްސާ ކުރުމަށް ބޭއްވި ނޫސްވެރިންގެ ބައްދަލުމެކެވެ. ކޮމެޓީގައި ހިމެނޭ ފަސް މެމްބަރުން ވެސް ބައިވެރިވި އެ ބައްދަލުވުމަކީ، ނޯލަމައިޒިން ކޮމެޓީން ބޭއްވި ނޫސްވެރިންގެ ފުރަތަމަ ބައްދަލުވުމެވެ.
"ރާއްޖެ އެމްވީ"އާ ވާހަކަ ދައްކަވަމުން އެފްއޭއެމް ނޯމަލައިޒިން ކޮމެޓީގެ ޗެއާމަން އަޙުމަދު ޒުހޫރު ވިދާޅުވީ، ކޮމެޓީން ކުރަމުން އަންނަ މަސައްކަތްތަކަށް އެހީތެރިވުމަށް މި ހަފުތާގެ ތެރޭގައި ފީފާގެ ޓީމެއް ރާއްޖެ އަންނާނެ ކަމަށެވެ. ދިމާވެގެން އުޅެނީ އެތައް ޒަމާނެއްވެފައިވާ މައްސަލަތަކެއް ކަމަށާއި، މިހާރު ކުރަމުން އަންނަނީ އެ މައްސަލަތައް ޙައްލު ކުރުމުގެ މަސައްކަތްކަން ފާހަގަ ކުރައްވައި ޒުހޫރު ވިދާޅުވީ، ފީފާ އިން އަންނަ ޓީމުގެ ބޭނުމަކީ މަޝްވަރާކޮށް، ކުރިއަށް ދާން ހުރި ކަންކަން އިތުރަށް ބެލުން ކަމަށެވެ.
މީގެ އިތުރުން ޒުހޫރު ވިދާޅުވީ ކުރިއަށް ދިޔުމުގައި ނޯމަލައިޒިން ކޮމެޓީ އަށް އެކި ކަހަލަ ދަތިތަކާއި، މައްސަލަތަކާ ކުރިމަތިލާން ޖެހޭ ކަމަށެވެ. އެހެންކަމުން، އެކަންކަމެއް ޙައްލެއް ހޯދުމަށް ފީފާގެ ޓީމާ އެކު މަޝްވަރާ ކުރާނެ ކަމަށް ވެސް އޭނާ ވިދާޅުވެފައިވެ އެވެ. ހަމައެއާއެކު އެފްއޭއެމް އިން ސަސްޕެންޑު ކޮށްފައިވާ ކުލަބު ވެލެންސިއާއާ މެދު ކަންތައް ކުރާނެ ގޮތުގެ ލަފަޔަކާއި، ފިފާާގެ ބަހެއް ވެސް ހޯދާނެ ކަމަށް ޒުހޫރު ވިދާޅުވި އެވެ.
ދެ ވަނަ ފަހަރަށް ފީފާ އިން ރާއްޖެ ނޯމަލައިޒް ކޮށްފައިވާއިރު، ނޯމަލައިޒިން ކޮމެޓީގެ ޗެއާމަނަކަށް ހަމަޖައްސާފައިވާ ކުރީގެ ކުޅިވަރާ ބެހޭ ވަޒީރު ޒުހޫރަކީ ކުރީގެ ރައީސް އަބަދުﷲ ޔާމީން ޢަބްދުލް ޤައްޔޫމްގެ ވެރިކަމުގައި ހޯމް މިނިސްޓަރު ކަމުގެ އިތުރުން، ހެލްތު މިނިސްޓަރުކަމާއި އަދި ކުޅިވަރާ ބެހޭ ވަޒީރުކަން ވެސް ކުރެއްވި ބޭފުޅެކެވެ. މި ކޮމިޓީގައި ޒުހޫރުގެ އިތުރުން ހިމެނެނީ ފަރީހާ ޝަރީފް، އިސްމާއީލް ސިމާން، ގާނޫނީ ވަކީލު އަޙުމަދު މުޢިއްޒު އަދި އަޙުމަދު އަލީ އެވެ.
