އެމެރިކާގައި އޮތް ހަމައެކަނި މުސްލިމުން ވެރިކަން ކުރާ ސިޓީގެ މޭޔަރ ޓްރަމްޕް އެންޑޯޒް ކޮށްފި

އެމެރިކާގައި އޮތް ހަމައެކަނި މުސްލިމުން ވެރިކަން ކުރާ ސިޓީގެ މޭޔަރ، ކުރިއަށް އޮތް ރިޔާސީ އިންތިޚާބުގައި ތާއީދު ކުރާ ކެންޑިޑޭޓްގެ ގޮތުގައި ޓްރަމްޕް އެންޑޯޒް ކޮށްފިއެވެ.

މިޗިގަން ގައި އޮންނަ ހެމްޓްރަމްކް ސިޓީގެ މޭޔަރ އަމީރު ޣާލިބް ވިދާޅުވީ، ހުރިހާ ކަމަކާ ޚިޔާލު އެއް ގޮތް ނުވި ކަމުގައި ވިޔަސް "އެންމެ ރަނގަޅު ޗޮއިސް" އަކީ ޓްރަމްޕް ކަމަށެވެ.

ޣާލިބް ޓްރުތް ސޯޝަލްގައި ކުރެއްވި ޕޯސްޓެއްގައި ވިދާޅުވީ، ނަތީޖާ ކޮންމެ ގޮތަކަށް އަޔަސް މި ނިންމުމާ މެދު ފަހުން ދެރަ ނުވާނެ ކަމަށާއި އަދި ނުކުންނަ ނަތީޖާ އާ ކުރިމަތިލާން ތައްޔާރަށް ހުރި ކަމުގައެވެ.

ޣާލިބުގެ ތާއީދު އިއުލާންކުރެއްވި ޕޯސްޓް ޓްރުތް ސޯޝަލް ޕްލެޓްފޯމުގައި ޖެއްސެވިތާ ކުޑައިރުކޮޅެއްގެ ތެރޭގައި ޓްރަމްޕް ވަނީ އެ ޕޯސްޓް ރީޕޯސްޓް ކުރައްވާފައެވެ.

ގާތްގަނޑަކަށް 28،000 މީހުން ދިރިއުޅޭ ހެމްޓްރެމްކް، 2021 ވަނަ އަހަރު އެމެރިކާގެ މީޑިއާގެ ސަމާލުކަން ލިބިގެން ދިޔައީ މުޅިން މުސްލިމުންގެ މައްޗަށް އެކުލެވޭ ސިޓީ ކައުންސިލަކާއި މުސްލިމް މޭޔަރެއް އިންތިޚާބުވި އެމެރިކާގެ ފުރަތަމަ ސިޓީއެއްގެ ގޮތުގައެވެ.

ހެމްޓްރެމްކްގެ މޭޔަރު ޣާލިބް މިޗިގަން އަށް ހިޖްރަކުރީ އުމުރުން 17 އަހަރުގައި ޔަމަނުންނެވެ.

ޣާލިބް ހާމަ ކުރައްވާފައިވާ ގޮތުގައި ޓްރަމްޕް އާ ދާދި ފަހުން އޭނާވަނީ ބައްދަލު ކުރައްވާފައެވެ. އަދި ޓްރަމްޕް އެންޑޯސް ކޮށްދިނުމަށް އެދިވަޑައިގަތް ކަމަށް ވެސް ޣާލިބް ހާމަކުރައްވާފައިވެއެވެ.

ނިމިދިޔަ ހަފްތާގައި ޑެޓްރޮއިޓް ނިއުސްއަށް ޣާލިބް ދެއްވި ބަސްދީގަތުމެއްގައި އެ ދޭބޭފުޅުންގެ ބައްދަލުވުމުގައި އެމެރިކާގައި ދިރިއުޅޭ މުސްލިމުންގެ ކަންބޮޑުވުންތަކާ ބެހޭ ގޮތުން ވާހަކަ ދެއްކެވި ކަމަށް ވިދާޅުވިއެވެ.

މިޗިގަން އަކީ ނޮވެމްބަރު މަހުގެ އިންތިޚާބުގެ ނަތީޖާ ނިންމާނެ ކަމަށް ބެލެވޭ 7 ސްވިންގ ސްޓޭޓްގެ ތެރޭގައި ހިމެނޭ ސްޓޭޓެކެވެ.

ޚިޔާލު ހޯދުމުގެ ސާވޭ ތަކަށް ބަލާއިރު މިޗިގަން ގައި ޓްރަމްޕް އާ ހެރިސްގެ ނަތީޖާ ފެންނަމުންދަނީ ވަރަށް ވާން ކޮށްނެވެ.

އޮގަސްޓު މަހު ކައުންސިލް އޮން އެމެރިކަން-އިސްލާމިކް ރިލޭޝަންސްއިން ނެރުނު ސާރވޭއެއްގައި، މިޗިގަންގެ މުސްލިމް އާބާދީގެ ތެރެއިން 12 އިންސައްތަ މީހުން ޑިމޮކްރަޓިކް ކެންޑިޑޭޓް ހެރިސްއަށް ތާއީދުކުރާ ކަމަށް ފާހަގަކުރެވުނު އިރު 18 އިންސައްތަ މީހުން ރިޕަބްލިކަން ކެންޑިޑޭޓް ޓްރަމްޕަށް ތާއީދުކުރެއެވެ. އަދި 40 އިންސައްތަ މީހުންގެ ތާއީދު އޮތީ ގްރީން ޕާޓީގެ ޖިލް ސްޓީންއަށެވެ.