ކުރަން ނުޖެހޭ ކަންކަމާއި ބެހެން ހަދައިގެން ޒިންމާ އަދާނުކުރެވި އިގްތިސާދު ގޯސްވީ ސައީދުއާއި ހެދި - އަމްރު
10 މަސް ވެގެން ދިޔައިރު ރާއްޖެގެ އާންމު މީހާގެ ޖީބަށް ލުޔެއް ގެންނަން ކީއްތޯ ކުރީ
އިކޮނަމިކް މިނިސްޓަރ ސައީދުގެ ޒިންމާ ފުރިހަމައަށް އަދާނުކުރައްވާ ކަމަށް އަމްރު ވިދާޅުވި
އިގްތިސާދީ ހާލަތު ގޯސްވެގެން އުޅެނީ އިގްތިސާދީ ވަޒީރު މުހައްމަދު ސައީދު ކުރައްވަންޖެހޭ ކަންކަން ނުކުރައްވާ، ކުރައްވަންނުޖެހޭ ކަންކަން ކުރައްވަން ހަދައިގެން ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރު ހުސައިން އަމްރު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން އަމްރު ވިދާޅުވީ ނުކުމެގެން މިއުޅެނީ އިގްތިސާދީ މައްސަލައެއް ކަމަށާއި، އިކޮނަމިކް މިނިސްޓްރީ ކިޔާފައި މިނިސްޓްރީއެއް ހަދާފައި ހުންނަނީ ސަބަބުތަކެއް ހުރެގެން ކަމަށެވެ. ފަތުރުވެރިކަމާއި މަސްވެރިކަމާއި ދަނޑުވެރިކަމަށް މިނިސްޓްރީތައް އުފައްދާފައި ހުންނަ އިރު، އިތުރަށް އިކޮނަމިކް މިނިސްޓްރީގެ ނަމުގައި އިތުރު މިނިސްޓްރިއެއް އޮންނަނީ ސަބަބުތަކެއް ހުރެގެން ކަމަށެވެ.
އަމްރު ވިދާޅުވީ ބަންކަރިންގެ ވާހަކަ ދައްކާއިރު، މިކަމުން ފެނިގެން ދިޔައީ މުޅިން އެހެން މަންޒަރެއް ކަމަށެވެ. އެއީ އެސްޓީއޯއިން މިކަމުގެ ނަންބަރުތަކާއި ޕްލޭންތަކުގެ ވާހަކަ ދެއްކުމަށްވުރެ ބޮޑަށް އިކޮނަމިކް މިނިސްޓަރު މުހައްމަދު ސައީދު ދެއްކެވުމަކީ އޮޑް ކަމެއް ކަމަށެވެ.
އަމްރު ވިދާޅުވީ ދެކޮޅު ނުޖެހޭ ވާހަކަތައް އިކޮނަމިކް މިނިސްޓަރު ދައްކަވަމުން ގެންދަވާ ކަމަށާއި، 400 މިލިއަން ޑޮލަރު ލިބޭނެ ވާހަކަ ދައްކާއިރު، އެކަން ކުރަނީ ކިހިނެއް ކޮންގޮތަކަށް ކަމެއް މިނިސްޓަރަށް ވިދާޅުނުވެވޭ ކަމަށެވެ. އަދި 20 މިލިއަން ޑޮލަރު އިންވެސްޓް ކޮށްގެން 400 މިލިއަން ޑޮލަރު އަނބުރާ ލިބޭ ވާހަކަ ދައްކާއިރު އެއީ ދެކޮޅުޖެހޭ ކަމެއް ނޫން ކަމަށް އަމްރު ވިދާޅުވިއެވެ.
އަމްރު ވިދާޅުވީ ބަންކަރިންއަކީ ސަރުކާރުން ހިންގާ ޕްރޮޖެކްޓެއް ނޫން ކަމަށާއި، އެއީ ވިޔަފާރި ޕްރޮޖެކްޓެއްކަމުން އެކަންކަމުގައި ވާހަކަ ދައްކަންޖެހޭނީ ކުންފުނިން ކަމަށެވެ. ނަމަވެސް މި ކަންކަމުގައި އިކޮނަމިކް މިނިސްޓަރު ފެނިގެން ދިޔުމަކީ އޮޑްކަމެއް ކަމަށެވެ.
އަމްރު ވިދާޅުވީ އެސްޓީއޯ އަންޑަރމައިން ކޮށްފައި ވަކި މިނިސްޓަރަކު ޕްރޮމޯޓްވާން ވެގެން އެސްޓީއޯ ބޭނުންކުރަން އުޅޭތަން ފެނިގެންދާ ކަމަށެވެ. އަމްރު ވިދާޅުވީ ރޯލްތައް ވަރަށް ބޮޑަށް އެނގެން ޖެހޭ ކަމަށާއި، މިނިސްޓަރުގެ ރޯލަކީ ކޮބައިތޯ މިނިސްޓަރަށް އަންޑަސްޓޭންޑް ވާންޖެހޭ ކަމަށެވެ.
އަމްރު ވިދާޅުވީ މީގެ ކުރިން އައި ސަރުކާރުތަކުގައި އެސްޓީއަށް ސަރުކާރުގެ ތެރެއިން ވަކި ކަމެއް ކުރަން އިރުޝާދެއް ނާންނަ ކަމަށެވެ. އަދި އެކަމުގެ ސަބަބުން އެސްޓީއޯ ހިންގުމަށް ފަސޭހަވެ ގިނަ ކަންކަން ކުރުމަށް ފަސޭހަވެގެންދިޔަ ކަމަށެވެ.
ނަމަވެސް މިއަދު އެ މަންޒަރު މުޅިން ބަދަލުވެގެން ގޮސްފި ކަމަށާއި، ފެނިގެންދަނީ މިނިސްޓަރު ސައީދު އެސްޓީއޯއިން ކުރަންޖެހޭ ކަންކަން ކުރަން އަންގާ ހިންގުމުގެ ތެރެއަށް ވަންނަން މަސައްކަތްކުރާތަން ކަމަށެވެ.
