ޑިއާޒްގެ ދެ ލަނޑާއެކު، ލިވަޕޫލުން ބޯންމައުތު ބަލިކޮށްފި

އިނގިރޭސި ޕްރިމިއާ ލީގުގައި ބޯންމައުތާ ދެކޮޅަށް ކުޅުނު މެޗުން މޮޅުވެ، ލިވަޕޫލުން ކުރިއަށް ޖެހިލައިފި އެވެ.

ލިވަޕޫލްގެ އެންފީލްޑުގައި ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. މެޗުގައި ލިވަޕޫލުން އެ ޓީމުގެ ތިން ލަނޑު ވެސް ޖެހީ ފުރަތަމަ ހާފުގަ އެވެ.

މެޗު ފަށައިގެން ހަތަރު ވަނަ މިނެޓުގައި ބޯންމައުތުގެ އެންޓޮއިން ސެމެންޔޮން ލަނޑެއް ޖެހި އެވެ. ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު)ގެ އެހީތެރިކަމާއެކު، ރެފްރީ ވަނީ އެ ލަނޑު ބަަލައި ނުގަންނަން ނިންމައިފަ އެވެ.

މެޗުގެ 26 ވަނަ މިނެޓުގައި ލިވަޕޫލަށް ލީޑު ނަގައިދިނީ ލުއިސް ޑިއާޒް އެވެ. އޭނާ އެ ލަނޑު ޖެހީ އިބްރާހިމާ ކޮނާޓޭ ތަނަވަސްކޮށްދިން ފުރުސަތެއްގަ އެވެ. އޭގެ ދެ މިނެޓު ފަހުން، ޓްރެންޓް އެލެގްޒެންޑާ އާނޯލްޑް ތަނަވަސްކޮށްދިން ފުރުސަތެއްގަައި ޑިއާޒް ވަނީ އިތުރު ލަނޑެއް ޖަހައި، ލިވަޕޫލްްގެ ލީޑު ފުޅާ ކޮށްފަ އެވެ. މެޗުގައި ލިވަޕޫލްގެ ތިން ވަނަ ލަނޑު ޖެހީ ޑާވިން ނޫނޭޒް އެވެ. ފުރަތަމަ ހާފުގެ 37 ވަނަ މިނެޓުގައި އޭނާ އެ ލަނޑު ޖެހީ މުޙައްމަދު ޞަލާޙު ތަނަވަސްކޮށްދިން ފުރުސަތެއްގަ އެވެ.

މޮޅާއެކު ލިވަޕޫލް އޮތީ މިވަގުތު އެއް ވަނައިގަ އެވެ. އެއީ މިހާތަނަށް ކުޅުނު ފަސް މެޗުން 12 ޕޮއިންޓު ހޯދައިގެންނެވެ. ހަތަރު މެޗުން ލިވަޕޫލް މޮޅުވެފައިވާއިރު، އެއް މެޗުން ވަނީ ބަލިވެފަ އެވެ. ލިވަޕޫލަށް ވުރެ އެއް މެޗު މަދުން ކުޅެފައިވާ އެންމެ ފަހުގެ ޗެމްޕިއަން މެންޗެސްޓަރ ސިޓީ އޮތީ ދެ ވަނައިގަ އެވެ.