ލުބުނާނުގެ އެކިތަންތާގައި ޕޭޖަރުތަކެއް ގޮވާ، އީރާނުގެ ސަފީރު ހިމެނޭ ގޮތުން ބަޔަކު މަރުވެ އެތައް ސަތޭކަ މީހުން ޒަޚަމްވެއްޖެ

މުވާސަލާތީ ބޭނުންތަކަށް ގެންގުޅޭ އެތަކެއް ޕޭޖަރު ލުބުނާނުގެ އެކިތަންތަނުގައި ގޮވާ ބަޔަކު މަރުވެ، އެތައް ސަތޭކަ މީހުން ޒަޚަމްވެއްޖެއެވެ.

ރޮއިޓާސް އިން ބުނާ ގޮތުގައި، ހިޒްބުﷲ ގެ ހަނގުރާމަވެރިންނާއި، ޑޮކްޓަރުންނާއި، އަދި ބެއިރޫތުގައި ހުންނަ އީރާނުގެ ސަފީރު ހިމެނޭގޮތުން، 1000ށް ވުރެ ގިނަ މީހުން މި ހާދިސާގައި ވަނީ ޒަޚަމްވެފައެވެ.

ލުބުނާންގެ ސިއްޙީ ވަޒީރުއާ ހަވާލާދީ ބައެއް ރިޕޯޓުތަކުގައި ބުނެފައިވަނީ މިހާދިސާގައި 8 މީހަކު މަރުވެ، 2،750 މީހުން ޒަޚަމްވެފައިވާ ކަމަށެވެ.

މިއީ އިޒްރޭލް އަޑީގައި އޮވެގެން ހިންގި އަމަލެއް ކަމަށް ވަނީ ތުހުމަތު ކުރެވިފައެވެ.

ރޮއިޓާސް އާ ވާހަކަ ދެއްކި ހިޒްބުﷲ ގެ އިސް ވެރިޔަކު ބުނެފައިވަނީ، އިޒްރޭލާ އެ ޖަމާއަތާ ދެމެދު ހިނގަމުންދާ ހަނގުރާމަ އަށް އަހަރެއްހާ ދުވަސްވާން ކައިރިވެފައިވާއިރު ޕޭޖަރުތައް ގޮވުމުގެ މި ހާދިސާ އަކީ އެ ޖަމާއަތައް ކުރިމަތިވި އެންމެ ބޮޑު ސެކިއުރިޓީ ބްރީޗް ކަމުގައެވެ.

އިޒްރޭލުގެ އަސްކަރިއްޔާ އާ މިކަމާ ސުވާލު ކުރުމުން ޖަވާބެއް ދީފައި ނުވާ ކަމަށް ރޮއިޓާސް އިން ބުނެއެވެ.

ހިޒްބުﷲ އިން މި ހާދިސާ އާ ގުޅިގެން ނެރުނު ބަޔާނެއްގައި ބުނެފައިވަނީ މަދުވެގެން 3 މީހަކު މަރުވެފައިވާ ކަމަށެވެ.

އޭގެ ތެރޭގައި އެ ޖަމާޢަތުގެ 2 ހަނގުރާމަވެރިން ހިމެނޭ ކަމަށް ބުނެފައިވެއެވެ. އަދި ތިންވަނަ މީހަކީ އަންހެން ކުއްޖެއް ކަމަށް ބުނެފައިވެއެވެ. ޕޭޖަރުތައް ގޮވި މައްސަލަ ބަލަމުންދާ ކަމަށްވެސް އެ ބަޔާނުގައި ބުނެފައިވެއެވެ.

ހަނގުރާމަވެރިންގެ ތެރެއިން މަރުވި އެކަކީ ލުބުނާންގެ ޕާލިމެންޓުގައި ހިމެނޭ ހިޒްބުﷲ ގެ މެންބަރެއްގެ ދަރިއެއް ކަމަށް ސަލާމަތީ ވަސީލަތްތަކުން ރޮއިޓާސް އަށް މަޢުލޫމާތު ދީފިއެވެ.

ލުބުނާންގައި ހުންނަވާ އީރާނުގެ ސަފީރު މުޖްތަބާ އަމާނީ އަށް ޕޭޖަރެއް ގޮވުމުގެ ސަބަބުން ކުޑަ އަނިޔާއެއް ވެފައިވާ ކަމަށް އީރާނުގެ ފާރސް ނިއުސް އޭޖެންސީން ބުނެފައިވެއެވެ.

"އަމާނީއަށް ލިބިފައިވަނީ ކުޑަ އަނިޔާއެއް، އަދި މިވަގުތު އޭނާ އޮންނެވީ ހޮސްޕިޓަލްގެ އޮބްޒަވޭޝަންގައި،" ކަމަށް ފާރސް ބުނެފައިވެއެވެ.

ގޮވި ޕޭޖަރުތަކަކީ ހިޒްބުﷲ އިން މުވާސަލަތީ ބޭނުންތަކަށް ވަރަށް ފަހުން ހޯދާފައިވާ އެންމެ ފަހުގެ މޮޑެލް ކަމަށް ސަލާމަތީ އޮފިޝަލުންނާ ހަވާލާދީ ރޮއިޓާސް އިން ބުނެފައިވެއެވެ.

ސިއްހީ އޮފިޝަލުން ހާމަކޮށްފައިވާ ގޮތުގައި ޕޭޖަރުތައް ގޮވުމުގެ ސަބަބުން ހޮސްޕިޓަލަށް ގެނައި ބައެއް މީހުންގެ މޫނުމައްޗަށާއި، ލޮލަށާއި އަދި ގައިގެ އެކި ހިސާބުތަކަށް އަނިޔާތައް ލިބިފައިވެއެވެ.

ޚަބަރުތައް ބުނާގޮތުގައި ފުރަތަމަ ޕޭޖަރު ގޮވާފައިވަނީ ލުބުނާނު ގަޑިން އަންގާރަ ދުވަހުގެ ހަވީރު 3:45 ހާއިރުއެވެ. އޭގެ ފަހުން ގާތްގަނޑަކަށް އެއް ގަޑިއިރު ވަންދެން ގޮވުންތައް މެދުނުކެނޑި ކުރިއަށް ދިޔަ ކަމަށް ރިޕޯޓްތައް ބުނެއެވެ.

ލުބުނާނުގެ ރެޑް ކްރެސެންޓުން ބުނެފައިވަނީ 50ށް ވުރެ ގިނަ އެމްބިއުލާންސް އާއި 300ށް އަށް ވުރެ ގިނަ މެޑިކަލް އޮފިޝަލުން ޒަޚަމްވެފައިވާ މީހުންނަށް އެހީތެރިވުމަށް ހަރަކާތްތެރިވެފައިވާ ކަމަށެވެ.