ވިޔަފާރިވެރިންނަށް ޑޮލަރު ލިބޭ، އެޑޮލަރުން ކުރަނީ އެހެން ކަމެއް: ރައީސް މުއިއްޒު
އެސްޓީއޯއަކީ ވިޔަފާރި ކުރަން އުފައްދާފައި އޮތް ކުންފުންޏެއް
ކުޑަރިކިލުގައި އަލަށް ގާއިމު ކުރި ބީއެމްއެލް އޭޓީއެމް މެޝިން ރަސްމީކޮށް ރައީސް މުއިއްޒު އިފްތިތިހް ކޮށް ދެއްވަނީ - ފައިލް ފޮޓޯ
ވިޔަފާރިވެރިންނަށް ޑޮލަރު ލިބޭ ކަމަށާއި، އެޑޮލަރުން ކުރަނީ އެހެން ކަމެއް ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
"ރައްޔިތުންނާއެކު" ޕޮޑްކާސްޓް އެޕިސޯޑް 9 ގައި ރާއްޖޭގެ ބާޒާރުގައި ހުންނަ މުދަލުގެ އަގުތަކަށް އަންނަ ބަދަލާއި، ތަކެތީގެ އަގުބޮޑުވެ، އެސްޓީއޯއިން ވަރަށް ގިނަ ބާވަތްތަކުގެ މުދާތަކެއް ގެނައުމަށް ނިންމި ސަބަބާއި ގުޅޭގޮތުން ދެންނެވި ސުވާލަށް ރައީސް މުއިއްޒު ވިދާޅުވީ އެސްޓީއޯގެ މައިގަނޑު ހިއްސާދާރަކީ، ސަރުކާރު ކަމަށާއި، އެސްޓީއޯއަކީ ވިޔަފާރި ކުރަން އުފައްދާފައި އޮތް ކުންފުންޏެއް ކަމަށެވެ.
ސްޓޭޓް ޓްރޭޑިންގ އޯގަނައިޒޭޝަން. ކާޑުގެ ބާވަތްތައް އެކަންޏެއްނޫން މިހާރު އެތެރެކުރަންޖެހޭނީކީއެއް. މިހާރު އަޅުގަނޑުމެން ގަބޫލުކުރާ ގޮތުގައި ރައްޔިތުންނަށް އެންމެ ފައިދާހުރި ގޮތަކީ، އެންމެ މުހިންމު އެންމެ ގިނައިން ބޭނުންކުރާ، މޭވާއާއި ތަރުކާރީގެ ބާވަތްތައްވެސް އެތެރެކުރުން. މިއީކީއެއް އާންމުންކުރާ ވިޔަފާރިއަށް ވަނުމެއްނޫން. މިއީ ރައްޔިތުންނަށް އެންމެ ރަނގަޅު އަގުގައި، މި ތަކެތި ލިބޭނެގޮތް ހެދުން.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ބޭންކް އޮފް މޯލްޑިވްސްއިން ދުވަހަކު މީގެ ކުރިން ނުދޭވަރަށް ދީލަތިކޮށް ޑޮލަރުގެ ވަރަށް ފުޅާ ފުރުސަތެއްގައި ވިޔަފާރިވެރިންނަށް ދޭކަން ފާހަގަކުރައްވައި ރައީސް މުއިއްޒު ވިދާޅުވީ ހޯލްސޭލްކޮށް ކާބޯތަކެތި އެތެރެކުރާ ފަރާތްތަކަށް އެ ފުރުސަތު ކުރިއަށްވުރެ މާބޮޑަށް ލިބޭ ކަމަށެވެ. މިހުރިހާ ކަމެއް ނަންބަރު ޖަހައިގެން ދިރާސާކޮށްފައިވާ ކަމަށާއި، މިވަނީ ކިހިނެއްކަން ރަނގަޅަށް ބަލާފައިވާ ކަމަށް އެމަނިކުފާނު ވިދާޅުވިއެވެ. އަދި މިކަން ކުރުމަކީ ރައްޔިތުންނަށް އެންމެ ފައިދާހުރި ގޮތްކަމަށް ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވީ ބޭންކުން ވިޔަފާރިވެރިންނަށް ޑޮލަރު ދޭ ކަމަށާއި، އެޑޮލަރުން އެފަރާތްތަކުން ކުރައްވަނީ އެހެން ކަމެއް ކަމަށެވެ.
އަޅުގަނޑު ބޭނުމެއްނޫން، އަޅުގަނޑުމެންގެ ގައުމުގެ ރައްޔިތުންނަށް އެހެން ބަޔަކު ކުރާކަމެއްގެ ސަބަބުން ގެއްލުންތަކެއްވާކަށް. ސަރުކާރުން ބޭނުންވަނީ ރައްޔިތުންނަށް އެންމެ ރަނގަޅު ފެންވަރުގައި ހުރިހާ ޚިދުމަތެއް ލިބެން. އޭގެ ސަބަބުން ކޮމްޕެޓިޝަން އުފެދިގެން ދާނީ. އެ ތަކެތި އެތެރެކުރާ ފަރާތްތަކުން ހަމަ އެ އަގުގައި ވިއްކާނެ. މި އުޅެނީ ސަރުކާރުން، ބޭންކް އޮފް މޯލްޑިވްސް އިން ޑޮލަރު ނުލިބިގެނެއްނޫން އެ ފަރާތްތަކަށް. ޑޮލަރު ލިބޭ. ލިބޭއިރުގައި އެހެން ކަމެއް ބައެއް ފަރާތްތަކުން ކުރައްވަނީ. އެހެންވީމާ، އިރާދަކުރެއްވިއްޔާ އެކަން އެގޮތަށް ވާނެ. މިހާރު ސަރުކާރުން އައިނު ވިއްކަންވެސް ފެށީ ނޫންތޯ. އައި.ޖީ.އެމް.އެޗުން. ފެށީމާ، އިންތިހާއަށް ބޮޑު އަގުގައި އައިނު ވިއްކާ ފަރާތްތަކުން އެ އަގަށް މެޗް ކުރަންޖެހިއްޖެ ނޫންތޯ؟ އަޅުގަނޑަށް މުހިންމީ ރައްޔިތުން އިނގޭތޯ.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
މި ސަރުކާރުގައި ރައްޔިތުން ބާރުވެރިކުރުވައި، ރައްޔިތުންގެ ފަޅީގައި އޮވެގެން، ރައްޔިތުންނަށް ބޭނުންވާ ކަންކަން ކުރުމަކީ ޒިންމާ ކަމަށް ރައީސް މުއިއްޒު ވިދާޅުވިއެވެ.
