ކުޑަހުވަދޫ މަސްވެރިން މުޒާހަރާ ކުރަނީ، އައްޑޫ މަސްވެރިން މުޒާހަރާ ކުރަނީ
މުޒާހަރާގެ ބައިވެރިން ބުނަނީ 48 ގަޑީއިރު ދޭން ވައުދުވި ފައިސާ އަވަސް ކުރުމަށް
ދ. ކުޑަހުވަދޫ މަސްވެރިންގެ މުޒާހަރާކުރަން ނުކުމެ ދޯނިތަކުގައި ދަމާވަފައިވާ ބޭނާތަކުގައި ޝުއޫރުތައް ލިޔެފައި
ކުޑަހުވަދޫ މަސްވެރިންނަށް ސަރުކާރުން ދޭން ޖެހޭ ލާރި ނުދޭތީ އަންގާރާ ދުވަހު ހަވީރު އެ ރަށު ބަނދަރު ސަރަހައްދުގައި މުޒާހަރާ ކުރަން ފަށައިފިއެވެ.
ކުޑަހުވަދޫ މަސްވެރިންނަށް ފައިސާ ލިބުން ލަސްވާތީ މުޒާހަރާއަށް ނިކުތް އިރު މިދިޔަ ހުކުރު ދުވަހު އައްޑޫ މަސްވެރިން ފައިސާ ނުލިބިގެން ފެށި މުޒާހަރާ އަދިވެސް ދަނީ ކުރިއަށެވެ.
އައްޑޫ މަސްވެރިންގެ މުޒާހަރާގައި ހިތްވަރު ދިނުމުގެ ގޮތުން މަސްވެރިންގެ އާއިލާތަކުން ވެސް އަންނަނީ މުޒާހަރާގައި ބައިވެރިވަމުންނެވެ.
ކުޑަ ހުވަދޫގައި މުޒާހަރާ ކުރާ މަސްވެރިން ޑރ މުއިއްޒުގެ ސަރުކާރަށް ގޮވަމުން ދަނީ "ވަގުތުން ވަގުތައް މިހާރު ދޭން ހުރި ލާރި ދިނުމަށެވެ."
މީގެ އިތުރުން ބޭސް ރޭޓުގައި މަސްވެރިންނަށް ތެޔޮ ލިބޭނެ އިންތިޒާމު ހަމަޖެއްސުމަށްވެސް މަސްވެރިން ދަނީ ގޮވަމުންނެވެ.
ބޭސް ރޭޓުގައި މަސްވެރިންނަށް ތެޔޮ ލިބޭނެ ގޮތް ހަދައިދިނުމަކީ ޑރ. މުއިއްޒުގެ ރިޔާސީ ވައުދެކެވެ.
"ދ.އަތޮޅުގައި އަޅުއްވަން ވައުދުވި މަސް ފެކްޓަރީ ކޮބާ؟" ކުޑަ ހުވަދޫ މަސްވެރިންގެ މުޒާހަރާގައި ދަމާފައިވާ ބެނަރ އެއްގައި ވެއެވެ.
ކުޑަހުވަދޫ މަސްވެރިން މުޒާހަރާގައި މަސްވެރިންނަށް 48 ގަޑިއިރު ތެރޭ ދޭން ބުނި ލާރި އަވަސް ކުރުމަށް ވެސް ގޮވަމުން ގޮސްފައިވެއެވެ.
ޑރ. މުއިއްޒު ވެރިކަމަށް ވަޑައިގަތީ، މަސްވެރިން ބާނާ މަހަށް، މަސް ކިރާތާ 48 ގަޑިއިރު ތެރޭގައި ފައިސާ ދައްކާނެ ކަމަށް ވައުދު ވެގެން ކަން ފާހަގަ ކުރެވެއެވެ. އަދި ކިރާ މަހަށް ޑޮލަރުން ފައިސާ ލިބޭނެ ގޮތް ހަދާނެ ކަމަށްވެސް ޑރ. މުއިއްޒު މަސްވެރިންނަށް ވެފައިވާ ވައުދުތަކުގެ ތެރޭގައި ހިމެނެއެވެ.
ކުޑަހުވަދޫގައި ފެށި މުޒާހަރާގައި އެރަށުގެ 15 މަސް ދޯނި ބައިވެރިވާ ކަމަށް މައުލޫމާތު ލިބިފައިވެއެވެ.
އައްޑޫ މަސްވެރިންގެ މުޒާހަރާގައި އަންގާރަ ދުވަހުވެސް މަސްވެރިންގެ އާއިލާތަކުން މި މުޒާހަރާގައި ބައިވެރިވެ އަޑު އުފުލަމުންދަނީ މަސްވެރި އާއިލާތައް ދަރަނިވެރިވެފައިވާ ކަމަށް ބުނެއެވެ.
