ވިނީޝިއުސްގެ ދިފާއުގައި ކާވަހާލް

ސްޕެއިންގެ ރެއާލް މެޑްރިޑަށް ކުޅެމުން އަންނަ ބްރެޒިލްގެ ވިނީޝިއުސް ޖޫނިއާގެ ދިފާއުގައި، ޑެނީ ކާވަހާލް ވާހަކަ ދައްކައިފި އެވެ.

ސްޕެނިޝް ލީގުގައި އެންމެ ފަހުން ރެއާލް އިން ރެއާލް ސޮސިއެޑާޑާ ދެކޮޅަށް ކުޅުނު މެޗުގައި ލަނޑު ޖެހުމަށްފަހު، އުފާ ފާޅު ކުރުގެ ގޮތުން ވިނީޝިއުސް ކުރިކަމަކުން އޭނާ އަށް ބައެއް މީހުން ވަނީ ފާޑު ކިޔައިފަ އެވެ. އެ މެޗުގައި ރެއާލްގެ ފުރަތަމަ ލަނޑު ވިނީޝިއުސް ޖެހީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ.

އެކަމާ ގުޅޭ ގޮތުން ވާހަކަ ދައްކަމުން ކާވަހާލް ބުނީ، ސޮސިއެޑާޑާ ދެކޮޅަށް ލަނޑު ޖެހުމަށް ފަހު އުފާ ފާޅު ކުރުމުގެ ގޮތުން ވިނީޝިއުސް ކުރި ކަންތައް އޭނާ އަށް ފުރިހަމަ އަށް ޤަބޫލު ކުރެވޭ ކަމަށެވެ. އެގޮތުން މެޗުގައި ކުޅެމުން ދިޔައިރު، ސޮސިއެޑާޑުގެ ދަނޑުގައި ތިބި ސަޕޯޓަރުން ވިނީޝިއުސް އަށް ނިސްބަތްކޮށް ގޮވި އެއްޗެހި އަޑު އިވުނު ކަމަށް ކާވަހާލް ބުންޏެވެ.

އެކަން ފާހަގަކޮށް ކާވަހާލް ބުނީ، ސްޕެއިންގެ ނުވަތަ ރެއާލް މެޑްރިޑްގެ ކެޕްޓަނެއްގެ ޙަައިސިއްޔަތުން އޭނާ ދޭން އޮތީ ސާފު، އެންމެ މެސެޖެއް ކަމަށެވެ. އެގޮތުން ނަސްލީ ތަފާތު ކުރުމަށް އޮންނަން ޖެހޭނީ "ޒީރޯ ޓޮލަރެންސް" ކަމަށް ވެސް ކާވަހާލް ވަނީ ބުނެފަ އެވެ. އަދި އެކަމާ ދެކޮޅަށް އަބަދު ވެސް ވާހަކަ ދައްކާނެ ކަމަށް އޭނާ ބުންޏެވެ.

ދާދި ފަހުން އައިސް ވިނީޝިއުސް އަށް ނަސްލީ ގޮތުން ދިމާ ކުރާ މައްސަލަ ވަނީ ބޮޑުވެފަ އެވެ. އެކަމާ ދެކޮޅަށް ރެއާލްގެ ކުޅުންތެރިންނާއި، އޮފިޝަލުން އަދި އިސްވެރިންގެ އިތުރުން، އެހެނިހެން ފުޓުބޯޅަ ކުޅުންތެރިން ވެސް ވަނީ ވާހަކަ ދައްކައިފަ އެވެ.