ޔުއެފާ ޗެމްޕިއަންސް ލީގުގައި މެންޗެސްޓަރ ސިޓީއާ ދެކޮޅަށް ކުޅުނު މެޗުގައި ބަޔާން މިއުނިކްގެ ސަޑިއޯ މާނޭއާ ލެރޯއި ސާނޭއާ ދެމެދު ހިނގި ކަންތައްތަކުގައި އެ ޓީމުގެ ކޯޗު ތޯމަސް ޓުޗެލް، މާނޭ ދިފާއުކޮށްފިއެވެ.
އެ މެޗުގައި މާނޭ ކުޅެން ނުކުމެފައި ވަނީ ބަދަލު ކުޅުންތެރިޔެއްގެ ގޮތުގައެވެ. އެއަށްފަހު ދަނޑު މަތީގައި މާނޭއާ ސާނޭއާ ދެމެދު ދެބަސްވުންތަކެއް ހިނގިއިރު، މާނޭ، ސާނޭ ގައިގައި ޖެހި ކަމަށްވެސް ރިޕޯޓުތައް ބުނެއެވެ. އެ މެޗަށްފަހު ޓީމުގެ ޗޭންޖިންގ ރޫމުގައިވެސް ދެ ކުޅުންތެރިންގެ މެދުގައި ހަމަނުޖެހުންތަކެއް ހިނގިއިރު، އެ ދެ ކުޅުންތެރިން ދުރުކުރަން ޖެހުނީ ބަޔާންގެ އެހެން ކުޅުންތެރިންނަށެވެ. އެކަމާ ގުޅިގެން ބަޔާނުން ވަނީ މާނޭ ސަސްޕެންޑުކުރުމަށް ނިންމާފައެވެ.
ޖަރުމަނު ލީގުގައި ހޮފެންހެއިމާ ދެކޮޅަށް ކުޅޭ މެޗުގެ ކުރިން އޮތް ޕްރެސް ކޮންފަރެންސްގައި ޓުޗެލް ބުނީ، މިހާރު އެ މައްސަލަ އޮތީ ހައްލުވެފައި ކަމަށެވެ. އެގޮތުން އެ މައްސަލާގައި މިހާރު މާނޭ ސަސްޕެންޑުކޮށްފައި ވާކަމަށާއި، އެއީ ހިނގައިދިޔަ ކަންތައްތަކުގެ އަދަބެއް ކަމަށެވެ. ޓުޗެލް ބުނީ ނިންމުން ނިންމާފައިވަނީ ދެ ކުޅުންތެރިންގެ ފަރާތުން ކަންތައްވީ ގޮތާއި، އެ ކަމުގައި އެހެން ކުޅުންތެރިންގެ ކަންތަކަށްވެސް ބެލުމަށްފަހު ކަމަށެވެ. ނަމަވެސް ޓުޗެލް ބުނީ އޭނާ ހުރީ މާނޭގެ ދިފާއުގައި ކަމަށެވެ. އެގޮތުން އޭނާއަށް މާނޭ އެނގޭތާ ވަރަށް ދުވަސްވެއްޖެ ކަމަށާއި، މާނޭއަކީ ކިހާ ޕްރޮފެޝަނަލް ކުޅުންތެރިޔެއްކަންވެސް އެނގޭކަމަށެވެ. އޭނާ ބުނީ މާނޭ ކަންތައްކުރާނެ ގޮތްވެސް ވަރަށް ރަނގަޅަށް އެނގޭކަމަށާއި، މާނޭ ކުށްވެރިވާނެ ކަމެއް ނުކުރާނެކަމަށް ގަބޫލުކުރާ ކަމަށެވެ. ނަމަވެސް ހިނގައިދިޔަ ކަންތައްތަކަކީ ކޯޑް އޮފް ކޮންޑަކްޓާ ޚިލާފު ކަމެއް ކަމަށާއި، އެކަމުގައި މާނޭ މިހާރު މައާފަށްވެސް އެދިފައިވާކަމަށާއި، އެހެެންކަމުން މިހާރު އެ މައްސަލަ ނިމުނީ ކަމަށެވެ.
މާނޭއާ ސާނޭއާ ދެމެދު ހިނގައިދިޔަ ކަންތައްތަކުގެ ސަބަބުން މާނޭގެ ކުރިމަގާމެދު ވަނީ ސުވާލު އުފެދިފައެވެ. ޚާއްސަކޮށް, ސާނޭއަކީ ޖަރުމަނަށް ނިސްބަތްވާ ކުޅުންތެރިޔަކަށް ވުމުން، ބަޔާނުންވެސް ބުރަވާނީ އޭނާއާ އެއްކޮޅަށް ކަމަށް ރިޕޯޓުތައް ބުނެއެވެ.
