އެމެރިކާގެ ކަޅު ނަސްލުގެ ރައްޔިތެއް ކަމަށްވާ ޖޯޖް ފްލޮއިޑްގެ ދިފާއުގައި ބަޔާން މިއުނިކްގެ ހުރިހާ ކުޅުންތެރިން ނުކުންނަށް އެ ޓީމުގެ ޑިފެންޑަރު ޖޯޝުއާ ކިމިޗް ގޮވާލައިފި އެވެ.
ޖޯޖް ފްލޮއިޑްގެ މަރާ ގުޅިގެން ގިނަ ކުޅިވަރު ތަރިން އަންނަނީ އެކަމާ ދެކޮޅަށް އަޑު އުފުލަމުންނެވެ. އެގޮތުން ޖަރުމަނު ލީގުގައި ހޯމަ ދުވަހުގެރޭ ކުޅުނު މެޗުތަކުގައި ބައެއް ކުޅުންތެރިން ވަނީ ޖޯޖް ފްލޮއިޑަން އިންސާފު ހޯދައިދިނުމަށް ގޮވާލާފައެވެ.
ބަޔާންގެ ކުޅުންތެރިއަކު އަދި މިހާތަނަށް ފްލޮއިޑްގެ ދިފާއުގައި ދަނޑުމަތީގައި އަޑު އުފުލާފައި ނުވި ނަމަވެސް، ކިމިޗް ވަނީ ބަޔާންގެ ހުރިހާ ކުޅުންތެރިން ފްލޮއިޑްގެ ދިފާއުގައި ނުކުންނަށް ގޮވާލާފައެވެ.
ކިމިޗް ބުނީ ކުޅުންތެރިން ވަކިން އަޑު އުފުލުމުގެ ބަދަލުގައި މުޅި ޓީމު އެއްކޮށް ނަސްލީ ތަފާތުކުރުމާ ދެކޮޅަށް އަޑު އުފުލަން ޖެހޭ ކަމަށެވެ. އަދި ބޮރޫޝިއާ ޑޯޓްމުންޑްގެ ފޯވާޑް ޖޭޑަން ސަންޗޯ އާއި އިތުރު ކުޅުންތެރިން ދެއްކި ނަމޫނާ އަކީ ހުރިހާ އެންމެން ވެސް ބަލައިގަންނަން ޖެހޭ ކަމެއް ކަމަށާއި، އެކަމުން މިސާލު ނަގައި ހުރިހާ ފުޓްބޯޅަ ކުޅުންތެރިން ވެސް މި ކަމުގައި ޝުއޫރު ފާޅުކޮށް އަޑު އުފުލުމަކީ މުހިއްމު ކަމެއް ކަމަށް ކިމިޗް ވަނީ ބުނެފަ އެވެ.
އެހެންކަމުން ލީގުގައި ބަޔާނުން ދެން ކުޅޭ މެޗުގައި، އެ ޓީމުގެ ހުރިހާ ކުޅުންތެރިން ޖޯޖް ފްލޮއިޑަށް އިންސާފު ހޯދައިދިނުމަށް އެދި އަޑު އުފުލާނެ ކަމަށް ކިމިޗް ވަނީ ބުނެފައެވެ.
މީގެ ކުރިން ޖަރުމަން އެފްއޭ އިން ވަނީ ފުޓްބޯޅަ މެޗުގެ ތެރެއިން އެފަދަ ކަމަކާ ގުޅޭގޮތުން ހިޔާލު ފާޅުކުރުމުގެ ޖާގައެއް ނޯންނާނެ ކަމަށް ބުނެ، މެޗުގެ ތެރެއިން ޝުއޫރުފާޅުކުރި ކުޅުންތެރިންގެ މައްސަލަތައް ބަލަމުން އަންނަ ކަމަށް ބުނެފައެވެ. އެކަމަކު ގިނަ ބައެއްގެ ފާޑު ކިޔުން އަމާޒުވުމުން، އެ މައްސަލަ ނުބަލަން ޖަރުމަން އެފްއޭ އިން ވަނީ ނިންމާފައެވެ.
މީގެ ކުރިން އެ ކުޅުންތެރިންގެ ދިފާއިގައި ފީފާގެ ރައީސް ޖިއާނީ އިންފަންޓީނޯ ވެސް ވަނީ ވާހަކަ ދައްކަވާފައެވެ. އިންފަންޓީނޯ ވިދާޅުވީ ނަސްލީ ތަފާތުކުރުން ހުއްޓާލުމަށް ފީފާ އިން ވެސް ވަރަށް ބޮޑަށް ބާރު އަޅާ ކަމަށާއި، އެކަމަށް ގޮވާލާ ކުޅުންތެރިންނަށް ފިޔަވަޅު އެޅުމުގެ ބަދަލުގައި، އެ ކުޅުންތެރިންނަށް ތައުރީފު ހައްގު ކަމަށެވެ.
