ޤަތަރުގެ ދިފާއުގައި ނުކުންނެވީ ފީފާގެ ރައީސް އިންފަންޓީނޯ، "ކުރިއަށް އޮތް 3000 އަހަރު ޔޫރަޕުގެ ޤައުމުތަކުން މައާފަށް އެދެން ޖެހޭނެ"

ޤަތަރުގައި އާދިއްތަ ދުވަހުގެ ރޭ ފަށާ ފީފާ ވޯލްޑް ކަޕާ ދިމާކޮށް އެ ޤައުމަށް އަމާޒުވަމުންދާ ފާޑުކިޔުންތަކުގެ ދިފާއުގައި ފީފާގެ ރައީސް ޖިއާނީ އިންފަންޓީނޯ ނުކުންނަވައިފިއެވެ.

ޤަތަރަކީ އިސްލާމީ ޤައުމަކަށްވުމުން އެ ޤައުމުން ވަނީ އިސްލާމްދީނުގެ އަސްލުތަކާއި، އުސޫލުތަކާ ޚިލާފު ކަންކަން ނުކުރެވޭނެ ކަމަށް އަންގާފައެވެ. އެގޮތުން މެޗުތައް ކުރިއަށްދާ ވަގުތުގައި އެއް ޖިންސުން ގުޅުން ހިންގުން ޕްރޮމޯޓު ނުކުރެވޭނެ ކަމަށާއި، ބަނގުރާ ބޭނުން ނުކުރެވޭނެ ކަމަށް ވަނީ ނިންމާފައެވެ. އެކަމާ ގުޅިގެން ޔޫރަޕުގެ ގިނަ ޤައުމުތަކުން ވަނީ ޤަތަރާ ދެކޮޅަށް ތެދުވަފައެވެ. މީގެ އިތުރުން ޤަތަރުން މިއަހަރުގެ މުބާރާތް ބޭއްވުމަށް ބިޑު ކާމިޔާބު ކުރި އިރު، ފީފާގެ ރައީސަކަށް ހުންނެވި ސެޕް ބްލެޓާ ވަނީ އެއީ "މިސްޓޭކެއް" ކަމަށް ވިދާޅުވެފައެވެ. އޭނާ ވިދާޅުވީ ޤަތަރުން އިންސާނީ ހައްގަށް އަރައި ގަންނަނީ ކަމަށެވެ.

މި ވާހަކަތައް ދެކެވެމުން ދިޔަ ވަގުތެއްގައި ޤަތަރުގެ ދިފާއުގައި ނުކުންނެވީ އިންފަންޓީނޯއެވެ. ހޮނިހިރު ދުވަހު ކުރިއަށް ގެންދިޔަ ނޫސްވެރިންގެ ބައްދަލުވުމުގައި އިންފަންޓީނޯ ވަނީ ޤަތަރު ދިފާއުކޮށް، ބަހުގެ ހަމަލާތަކެއް ޔޫރަޕުގެ ޤައުމުތަކަށް ފޮނުވާފައެވެ. ދޮޅު ގަޑިއިރަށް ދެމިގެންދިޔަ ނޫސްވެރިންގެ ބައްދަލުވުމުގައި ނުސްވެރިންނަށް ސުވާލު ކުރުމުގެ ފުރުސަތު ހުޅުވާލުމުގެ ކުރިން އޭނާ ވަނީ އެ ވާހަކަތަކަށް ރައްދު ދެއްވާފައެވެ.

އިންފަންޓީނޯ ވިދާޅުވީ ޤަތަރާ ދެކޮޅަށް ޔޫރަޕުގެ ޤައުމުތަކުން ކުރަނީ ހުތުރު ކަމެއް ކަމަށެވެ. އޭނާ ވިދާޅުވީ ޤަތަރުގައި ބާއްވާ މުބާރާތަކީ މިހާތަނަށް ބާއްވާނެ އެންމެ ފުރިހަމަ ވޯލްޑް ކަޕް ކަމަށާއި، ޤަތަރުން އޮތީ އެންމެ ފުރިހަމަ އަށް ތައްޔާރުވެފައި ކަމަށެވެ. މީގެ އިތުރުން އިންފަންޓީނޯ ވިދާޅުވީ އޭނާ އަކީ ޔޫރަޕަށް ނިސްބަތްވާ މީހެއް ކަމަށެވެ. އޭނާ ވިދާޅުވީ އެހެން ޤައުމުތަކަށް ކަންތައް ކުރަންވީ ގޮތް ބުނެދިނުމުގެ ކުރިން 3000 އަހަރު ވަންދެން ޔޫރަޕުގެ ޤައުމުތަކުން ކުރި ކަންކަމަށް ކުރިއަށް އޮތް 3000 އަހަރު މައާފަށް އެދެން ޖެހޭ ކަމަށެވެ.

އެ ނޫސްވެރިންގެ ބައްދަލުވުމުގައި އިންފަންޓީނޯ ވަނީ ބަނގުރާ ބޭނުންކުރުން މަނާ ކުރުމާ ގުޅޭ ގޮތުން ވެސް ވާހަކަ ދައްކަވާފައެވެ. އޭނާ ވިދާޅުވީ މުބާރާތާ ގުޅިގެން ނިންމާ ނިންމުންތައް ނިންމަނީ ޤަތަރާއި ފީފާއާ ދެމެދު މަޝްވަރާކޮށް، ގުޅިގެން ކަމަށެވެ. އިންފަންޓީނޯ ވިދާޅުވީ މެޗު ބެލުމަށް އެ ހޭދަވާ ތިން ގަޑިއިރު ތެރޭގައި ބަނގުރާ ނުބޮއި ތިބި ނަމަވެސް "މަރުނުވާނެ" ކަމަށެވެ.

ޤަތަރުން ބުނެފައިވަނީ 28 ދުވަހުގެ މުބާރާތަކަށް އެ މީހުންގެ ދީން ބަދަލެއް ނުކުރެވޭނެ ކަމަށެވެ. ޤަތަރުން ބުނަމުން އަންނަނީ އެ ޤައުމުގައި ދީނީ އުސޫލުތައް ހިފަހައްޓަން ޖެހޭނެ ކަމަށެވެ.