ލޮލު ރޯގާ އާ ބެހޭ ގޮތުން އިނގެނީ ކިހާ ވަރަކަށް؟

ލޮލަކީ އިންސާނާގެ ހަށިގަނޑުގައިވާ އެންމެ ނާޒުކު އަދި މުހިންމު އެއް ގުނަވަނެވެ. ނަމަވެސް، އަޅުގަނޑުމެންގެ ދިރިއުޅުމުގެ ވައްޓަފާޅިއާއި ތިމާވެށީގެ ހާލަތު ބަދަލުވަމުން އަންނަ ވަރަކަށް، ލޮލަށް ޖެހޭ ބަލިތައް ވެސް އިތުރުވެއެވެ. މިގޮތުން، އެންމެ އާންމުކޮށް ފެންނަ އެއް ބައްޔަކީ ކޮންޖަންކްޓިވައިޓިސް ނުވަތަ ލޮލު ރޯގާއެވެ.

ލޮލުގެ ހުދުބައިގައި ހުންނަ ނާޒުކު ދުލިފަށުގައި (ކޮންޖަންކްޓިވާ ގައި) އުފެދޭ އިންފެކްޝަނެކެވެ. މި ބަލި ޖެހުމުން ހުންއައިސް، ލޮލުގެ ހުދުބައި ރަތްވެ، މަޑުލާ، އަދި ލޮލުން ފެންއައުމަކީ އާންމު ކަމެކެވެ. އަދި ބައެއް ފަހަރު ލޮލަށް އަލި އެޅުމުން ތަދުވުމާއި، ލޮލުގައި އެއްޗެއް ޖެހޭ ކަމުގެ އިހުސާސް ކުރެވުން ފަދަ ކަންކަން ދިމާވެއެވެ.

ލޮލުރޯގާ އަކީ ކުއްލި އަކަށް ޖެހޭ ވަރަށް ކުރު މުއްދަތެއްގެ ބައްޔަކަށް ވެދާނެއެވެ. މާނައަކީ 4 ހަފްތާއަށްވުރެ ކުރު މުއްދަތަކަށް ދެމިގެންދާ ބައްޔަކަށް ވެދާނެއެވެ. ނުވަތަ އެއަށް ވުރެ ދިގުލައިވެސް ހިނގައިދާނެއެވެ.  މާނައަކީ، 4 ހަފްތާއަށްވުރެ ގިނަ ދުވަހަށް ވެސް ދެމިގެން ގޮސްދާނެއެވެ. މި ބަލި  އެއް ލޮލަށް އެކަނި ނުވަތަ އެއްފަހަރާ ދެ ލޮލަށްވެސް ޖެހިދާނެއެވެ.

މޫސުމަށް އަންނަ ބަދަލުތަކާ ގުޅިގެން ދިމާވާ އެލަރޖީގެ ސަބަބުން 15% އާއި 40% އާ ދެމެދުގެ މީހުންނަށް އެލަރޖިކް ކޮންޖަންކްޓިވައިޓިސް ޖެހެއެވެ. ލޮލުރޯގާގެ އެހެން ބާވަތްތައް އެކި އުމުރުފުރާގެ މީހުންގެ މެދުގައި އުމުރުގެ ވަކި ދުވަސްވަރެއްގައި އާންމުކޮށް ފެނެއެވެ. މިއީ، ފިނިމޫސުމުގައި ހަމަ އާއްމު ރޯގާ (ކޮމަން ކޯލްޑް) އާއި ފްލޫ އާއްމުވާ ގޮތާ އެއްގޮތް ކަމެކެވެ.

ލޮލު ރޯގާ ޖެހޭ ބައިވަރު ސަބަބުތައް ހުރެއެވެ. ނަމަވެސް ލޮލުރޯގާ ޖެހޭ ސަބަބު ދެނެގަންނަން އެންމެ ފަސޭހަ ގޮތަކީ ލޮލުރޯގާގެ ވައްތަރު 2 ބަޔަކަށް ބަހާލުމެވެ. އެއީ އިންފެކްޝަންގެ ސަބަބުން ޖެހޭ ލޮލުރޯގާ އާއި އިންފެކްޝަންގެ ސަބަބުން ނޫން ގޮތްގޮތުން ޖެހޭ ލޮލު ރޯގާއެވެ.

އިންފެކްޝަންގެ ސަބަބުން ޖެހޭ ލޮލުރޯގާ ގައިން ގަޔަށް އަރާ، އަދި އަނެއް ލޮލަށްވެސް ޖެހިދާނެ އެވެ. މިއީ ލޮލު ރޯގާގެ އެންމެ އާއްމު ވައްތަރު ކަމަށް ވާތީ ވަރަށް ފަސޭހައިން މި ބަލި ފެތުރެއެވެ.

އިންފެކްޝަންގެ ސަބަބުތައް ހަތަރު ބަޔަކަށް ބެހިގެންވެއެވެ. އެއީ ވައިރަލް، ބެކްޓީރިއަލް، ފަންގަލް އަދި ޕެރަސިޓިކް އިންފެކްޝަންއެވެ. މީގެ ތެރެއިން ވެސް އެންމެ އާއްމީ ވައިރަލް އަދި ބެކްޓީރިއަލް ލޮލު ރޯގާ އެވެ. ފަންގަލް އަދި ޕެރަސިޓިކް ލޮލު ރޯގާ އާންމު ގޮތެއްގައި ފެތުރެނީ ވަރަށް މަދުންނެވެ.

އިންފެކްޝަންގެ ސަބަބުން ނޫން ގޮތްގޮތުން ޖެހޭ ލޮލު ރޯގާ އާއްމުކޮށް ޖެހެނީ އެހެން މީހުންގެ ކިބައިން، ޖަނަވާރުންގެ ކިބައިން، ނުވަތަ ތަޣައްޔަރުވެފައިވާ އެއްޗެހިން ނުވަތަ ތަންތަނުންނެވެ.

ލޮލު ރޯގާގެ ބައެއް ވައްތަރުތަކުން ރައްކާތެރިވެވިދާނެއެވެ. އަދި އެހެން ގިނަ ވައްތަރުތައް ޖެހުމުގެ ނުރައްކާތެރިކަން ކުޑަކުރެވިދާނެއެވެ. ލޮލުރޯގާ އިން ރައްކާތެރިވުމަށް ނުވަތަ އެ ބަލި ޖެހުމުގެ ފުރުޞަތު ކުޑަކުރުމަށް ކުރެވިދާނެ އެންމެ މުހިންމު ކަންތައްތަކުގެ ތެރޭގައި:

ލޮލަކީ އަހަރެމެންގެ ދިރިއުޅުމުގައި މުހިންމު ދައުރެއް އަދާކުރާ ގުނަވަނެއް ކަމުގައިވާތީ، އޭގެ ރައްކާތެރިކަމަށް ސަމާލުކަން ދިނުމަކީ ކޮންމެހެން ކުރަންޖެހޭ ކަމެކެވެ. ލޮލުރޯގާ ޖެހިއްޖެނަމަ ނުވަތަ ޖެހިއްޖެކަމަށް ޝައްކުކުރެވޭނަމަ، ވީހާ ވެސް އަވަހަކަށް ޑޮކްޓަރަކަށް ނުވަތަ ޞިއްޙީ އެހީތެރިއަކަށް ދައްކައިގެން ފަރުވާ ހޯދަންވާނެއެވެ. މިކަމަށް ފަރުވާކުޑަކޮށް، ފަރުވާ ލަސްކުރުމުގެ ސަބަބުން ލޮލަށް ދާއިމީ ގެއްލުން ލިބުމުގެ ފުރުސަތު ބޮޑުވާނެއެވެ.