އެޗްއެމްޕީވީ އާ ބެހޭގޮތުން އެނގެން ޖެހޭ ކަންތައްތައް

ފާއިތުވި ހަފްތާތަކުގައި، ޗައިނާގެ ހޮސްޕިޓަލްތަކުގައި މާސްކު އަޅައިގެން ތިބި ގިނަ އަދަދެއްގެ މީހުން އުޅެމުންދާ މަންޒަރުތައް ސޯޝަލް މީޑިއާގައި ފެތުރިފައިވެއެވެ. މިކަމުގެ ސަބަބުން އަނެއްކާވެސް ބަލިމަޑުކަމެއް ފެތުރުމުގެ ބިރުވެރިކަން ވަނީ އުފެދިފައެވެ.

ޗައިނާ އިން މިހާރު ވަނީ ޚާއްޞަކޮށް ކުޑަކުދިންގެ މެދުގައި އިންފްލުއެންޒާ އާ އެއްފަދަ ހިއުމަން މެޓާނިއުމޯވައިރަސް (އެޗްއެމްޕީވީ) ގެ ކޭސްތައް އިތުރުވެފައިވާ ކަމަށް އިއުތިރާފުވެ، މިއީ މޫސުމީ ގޮތުން އައި އިތުރުވުމެއް ކަމަށް ބުނެފައެވެ.

ނަމަވެސް އެޗްއެމްޕީވީއަކީ ކޮވިޑް-19 އާ އެއްފަދަ އެއްޗެއް ނޫންކަމަށް ޢާންމު ޞިއްޙަތުގެ ތަޖުރިބާކާރުން ބުނެފައިވެއެވެ. އަދި މި ވައިރަސް ދުނިޔޭގައި ވާތާ އެތައް އަހަރުތަކެއް ވެފައިވާ ކަމަށާއި، ކޮންމެ ކުއްޖަކުވެސް 5 އަހަރު ފުރުމުގެ ކުރިން މި ވައިރަހުން އިންފެކްޓްވާ ކަމަށް ފާހަގަ ކޮށްފައި ވެއެވެ.

ނަމަވެސް، ވަރަށް ތުއްތު ކުދިންނާއި ދިފާއީ ނިޒާމު ބަލިކަށި މީހުންނަށް މި ވައިރަހުގެ ސަބަބުން ބަލީގެ އަސަރު ބޮޑުވެދާނެ ކަމަށް ތަޖުރިބާކާރުން ބުނެއެވެ. މިކަމާ ގުޅޭގޮތުން އާންމުކޮށް އެނގެން ޖެހޭ ކަންތައްތައް ތިރީގައި މިވަނީއެވެ:

އެޗްއެމްޕީވީ އަކީ އަދައިގެ ރޯގާ ފަދައިން ނޭވާލާ ނިޒާމަށް ވައިރަހެއްގެ ސަބަބުން ޖެހޭ ބައްޔެކެވެ. ގިނަ މީހުންނަށް މި ބަލި ޖެހުމާއި އާދައިގެ ގޮތެއްގައި ރޯގާ ޖެހުމާ މާ ބޮޑު ތަފާތެއް އިހުސާސެއް ނުވާނެއެވެ.

2001 ވަނަ އަހަރު ނެދަލެންޑްސްގައި ފުރަތަމަ ފަހަރަށް ދެނެގަނެވުނު މި ވައިރަސް ފެތުރެނީ ބަލިޖެހިފައިވާ މީހަކާ ކޮންޓެކްޓް ވެގެންނެވެ. ނުވަތަ މި ވައިރަސް އިން ތަޣައްޔާރު ވެފައިވާ ތަނަކާ ކޮންޓެކްޓް ވެގެންނެވެ.

ބަލި ޖެހުމުން ގިނަ މީހުންގެ ކިބައިން ފެންނަ ޢަލާމާތްތަކުގެ ތެރޭގައި ކެއްސުމާއި، ހުންއައުމާއި، ނޭފަތް ބެދުން ހިމެނެއެވެ.

ވަރަށް ތުއްތު ކުދިން، ޚާއްޞަކޮށް 2 އަހަރުން ދަށުގެ ކުދިންނާއި، ދިފާއީ ނިޒާމު ބަލިކަށި މީހުން، އޭގެ ތެރޭގައި ދުވަސްވީ މީހުންނާއި ކެންސަރުގެ ބަލި ފަދަ ނުރާއްކާތެރި ބަލި ޖެހިފައިވާ މީހުންނަކީ މި ވައިރަހުން ނުރައްކާ ވެދާނެ ބައެއް ކަމަށް ސިންގަޕޫރުގެ ގައިންގަޔަށް އަރާ ބަލިތަކާ ބެހޭ ތަޖުރިބާކާރެއް ކަމަށް ވާ ޑރ. ޝޫ ލީ ޔަންގް ވިދާޅުވެފައިވެއެވެ.

މިފަދަ ފަރާތްތަކަށް ބަލި ޖެހުމުން ފުއްޕާމޭ އަށް އަސަރުކޮށް، ނޭވާއަށް އުނދަގޫ ކުރުމާއި، ނޭވާ ހާސްވުން ފަދަ މައްސަލަތައް ކުރިމަތިވެއެވެ.

"މިފަދަ ގިނަ މީހުން ހޮސްޕިޓަލުން ފަރުވާ ހޯދަން ޖެހޭނެ، އަދި މަދު ބަޔަކަށް ފުރާނަ އަށް ނުރައްކާވުމާ ވެސް ކުރިމަތިވެދާނެ،" ޑރ. ޝޫ ވިދާޅުވިއެވެ.

އެހެން ގިނަ ނޭވާލާ ނިޒާމުގެ ބަލިތަކެކޭ އެއްފަދައިން، އެޗްއެމްޕީވީ އެންމެ އާލާވަނީ ފިނި މޫސުމުގެ ފަހުކޮޅާއި އެ މޫސުމާ ޖެހިގެން އަންނަ ސްޕްރިންގެ ތެރޭގައެވެ. ބައެއް ތަޖުރިބާކާރުން ބުނާގޮތުގައި މިއީ ފިނި މޫސުމުގައި ވައިރަސް ބޮޑަށް އާލާވުމާއި މީހުން ގިނައިން ގޭތެރޭގައި ތިބުމުގެ ސަބަބުން އެކަކު ގައިން އަނެކަކު ގަޔަށް ވައިރަސް ފެތުރުމަށް މަގުފަހި ވާތީ ކަމުގައެވެ.

ޗައިނާގެ އުތުރުގައި މިހާރު އެޗްއެމްޕީވީ އިތުރުވަމުން ދަނީ، މާރިޗު މަހާ ހަމައަށް ދެމިގެން ދާނެކަމަށް ލަފާކުރެވޭ ފިނި މޫސުމާ އެކުގައެވެ.

ޙަޤީޤަތުގައި ބަލި އިތުރުވަމުން ދަނީ ހަމައެކަނި ޗައިނާ އަކު ނޫނެވެ. ދުނިޔޭގެ އުތުރު ބިތުގެ ގިނަ ޤައުމުތަކުގައި، އެޗްއެމްޕީވީ އިތުރު ވަމުން ދާކަމަށް އޮސްޓްރޭލިއާގެ ފްލިންޑަރސް ޔުނިވަރސިޓީގެ އެޕިޑެމިއޮލޮޖިސްޓް ޖެކްލީން ސްޓީފަންސް ވިދާޅުވިއެވެ.

"މިއީ ކަންބޮޑުވާންޖެހޭ ކަމެއް ނަމަވެސް، މި އިތުރުވުމަކީ ފިނި މޫސުމުގައި އާންމުކޮށް ފެންނަ މޫސުމީ އިތުރުވުމެއް ކަމަށް ބެލެވެއެވެ،" އޭނާ ވިދާޅުވިއެވެ.

އެމެރިކާ އަދި އިނގިރޭސިވިލާތުގެ ޞިއްޙީ އިދާރާތަކުގެ ތަފާސްހިސާބު ތަކުން ދައްކާގޮތުގައި މި ޤައުމުތަކުގައިވެސް ފާއިތުވި އަހަރުގެ އޮކްޓޯބަރު މަހުން ފެށިގެން އެޗްއެމްޕީވީ ކޭސްތައް އިތުރުވަމުން އައިސްފައިވެއެވެ.

ކޮވިޑް-19 ފަދަ ބަލިމަޑުކަމެއް އަތުވެދާނެކަމުގެ ބިރުވެރިކަން މި ބައްޔާ ގުޅިގެން އުފެއްދުމަކީ ކަން އޮތް ވަރަށް ވުރެ ބޮޑު ކުރުން ކަމަށް ތަޖުރިބާކާރުން ބުނެފައިވެއެވެ. އެއީ ބަލިމަޑުކަމެއް އާންމު ވަނީ ދުނިޔެ އަށް މުޅިން އައު ޖަރާސީމެއް ތައާރުފް ވާ ހާލަތުގައި ކަމަށް ވެފައި، އެޗްއެމްޕީވީ އަކީ އެފަދަ އެއްޗެއް ނޫންކަމަށް ވާތީ ކަމަށް ވެސް ތަޖުރިބާކާރުން ބުނެފައިވެއެވެ.

އެޗްއެމްޕީވީ އަކީ ދުނިޔޭގެ ހުރިހާ ކަންކޮޅުތަކަކުން ވެސް ފެންނަ އަދި އެތައް އަހަރެއް ވަންދެން ވުޖޫދުގައި ހުރި ވައިރަސް އެކެވެ. މިއީ ދުނިޔޭގެ އެކި ކަންކޮޅުތަކުގައި މީހުން "ކުރިން އެކްސްޕޯޒް ވެފައިވުމުގެ ސަބަބުން ކޮންމެވެސް ވަރެއްގެ ދިފާއެއް" ލިބިފައިވާ އެއްޗެއްކަމަށް ޑރ. ޝޫ ވިދާޅުވިއެވެ.

"ކޮންމެ ކުއްޖަކުވެސް 5 އަހަރު ފުރުމުގެ ކުރިން މަދުވެގެން އެއްފަހަރު އެޗްއެމްޕީވީއިން އިންފެކްޓްވާނެއެވެ. އަދި އުމުރުގެ ބާކީ އޮތް ބައިގައި ގިނަ ފަހަރު އަލުން އިންފެކްޓްވާނެ ކަމަށް ބެލެވެއެވެ،" އިނގިރޭސިވިލާތުގެ އީސްޓް އެންގްލިއާ ޔުނިވަރސިޓީގެ މެޑިކަލް ޕްރޮފެސަރ ޕޯލް ހަންޓަރ ވިދާޅުވިއެވެ.

"އެހެންކަމުން، މުޅި ދުނިޔެ އަށް އެއްވެސް ބޮޑު މައްސަލައެއް ކުރިމަތިވާނެ ކަމުގެ އެއްވެސް ނިޝާނެއް މިވަގުތު ނުފެނެއެވެ."

ނަމަވެސް، ޑރ. ޝޫ ލަފާދެއްވާފައިވަނީ އާންމު އިހުތިޔާތީ ފިޔަވަޅުތައް އެޅުމަށެވެ. އޭގެ ތެރޭގައި މީހުން ގިނަ ތަންތަނުގައި މާސްކު އެޅުމާއި، ނޭވާލާ ނިޒާމުގެ ވައިރަސް އިންފެކްޝަންތަކުން ބޮޑަށް ބަލިވުމުގެ ނުރައްކާ ބޮޑު މީހުން ވީ ވަރަކުން މީހުން ގިނަ ތަންތަނަށް ނުދިއުމާއި، އަތްދޮވުމުގެ ރަނގަޅު އާދަތައް ގެންގުޅުމާއި، އިންފްލުއެންޒާ ވެކްސިން ޖެހުން ހިމެނެއެވެ.