ޚާއްޞަ އެހީއަށް ބޭނުންވާ މީހުންގެ މަރުކަޒަކީ، މިނިސްޓްރީ އޮފް ހެލްތުގެ ދަށުން ހިނގަމުންދާ ތަނެއްގެ ގޮތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ހަމަޖައްސަވައިފިއެވެ.
ކުރިން މި އޮފީސް ހިނގަމުން އައީ މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓްގެ ދަށުންނެވެ.
ރައީސް އޮފީހުން ނެރުނު ދެންނެވުމެއްގައި ވަނީ ބުދަ ދުވަހުން ފެށިގެން އެ ބަދަލު ސަރުކާރު ހިންގުމުގެ އޮނިގަނޑަށް ގެނެސްފައިވާ ކަމުގައެވެ.
ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 116ވަނަ މާއްދާގެ (ހ) އިން ރައީސަށް ލިބިވަޑައިގަންނަވާ އިޚުތިޔާރުގެ ދަށުން މިގޮތަށް ހަމަޖެއްސެވީ، ޚާއްޞަ އެހީއަށް ބޭނުންވާ މީހުންގެ މަރުކަޒު ހިންގުން މިނިސްޓްރީ އޮފް ހެލްތުގެ ދަށަށް ބަދަލު ކުރުމާ ގުޅޭގޮތުން ވަޒީރުންގެ މަޖިލީހުގައި މަޝްވަރާކުރެއްވުމަށްފަހު އެގޮތައް ލަފާދީފައިވާތީ ކަމަށް ރައީސް އޮފީހުގެ ދެންނެވުމުގައި ވެއެވެ.
