4000 ފްލެޓާ ބެހޭ ގޮތުން އޮޑިޓަރ ޖެނެރަލްގެ އޮފީހުން ދިން ލަފާ ހާމަ ކުރެވޭ ކަށްނެތް: ހައުސިންގ މިނިސްޓްރީ
އޮޑިޓަރ ޖެނެރަލް އޮފީހުން ގާނޫނީ ލަފާ ލިބިފައިވާ ކަމަށް ވަނީ ބުނެފައި
ހައުސިންގ މިނިސްޓަރ އަލީ ހައިދަރު - 4000 ފްލެޓުގެ މައްސަލައިގައި އެކިފަހަރު އެކި ގޮތައް ގެންދަވަނީ ވާހަކަ ދައްކަވަމުން
ގެދޮރުވެރިޔާ ސްކީމްގެ 4000 ފްލެޓާ ގުޅިގެން ހައުސިންގ މިނިސްޓްރީ އަށް އޮޑިޓަރ ޖެނެރަލް އޮފީހުން ދިން ގާނޫނީ ލަފާ ހާމަ ކުރެވެން ނެތް ކަމަށް ހައުސިންގ މިނިސްޓްރީން ބުނެފިއެވެ.
މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން ފަހި ޔޫނިއަން އިން މަހޯލި ޕޯޓަލް މެދުވެރިކޮށް ހުށަހެޅި ރިކުއެސްޓަށް ޑިސެމްބަރު 11 ގައި ހައުސިން މިނިސްޓްރީން ދިން ޖަވާބުގައި، 4000 ފްލެޓާ ބެހޭ ގޮތުން އޮޑިޓަރ ޖެނެރަލް އޮފީހުން ގާނޫނީ ލަފައެއް ހޯދާފައިވާ ކަމަށާއި ނަމަވެސް އެ މައުލޫމާތުތަކަކީ "އެ ގާނޫނުގެ 31 ވަނަ މާއްދާގެ (ހ)ގެ (2) ގެ ދަށުން މިވަގުތު ދެވެން ނެތް މައުލޫމާތުތަކެއް ކަމުގައި؛" ވަނީ ބުނެފައެވެ.
17 ނޮވެމްބަރު 2024 ގައި ފަހި ޔޫނިއަން އިން ހައުސިންގ މިނިސްޓްރީގައި އެދިފައިވަނީ، ގެދޮރުވެރިޔާ ސްކީމްގެ ދަށުން އިއުލާނު ކުރި 4000 ފްލެޓް އެންޓިކަރަޕްޝަން ކޮމިޝަން (އޭސީސީ) އިން ހުއްޓުވި ފަހުން އޮޑިޓަރ ޖެނެރަލް އޮފީހުން މިކަމާ ގުޅިގެން މިނިސްޓްރީ އޮފް ހައުސިންގ، ލޭންޑް އެންޑް އާބަން ޑިވެލޮޕްމަންޓަށް އެއްވެސް ގާނޫނީ ލަފައެއް ދީފައިވާނެތޯ އާއި އަދި އެގޮތުން ލަފައެއް ދީފައިވާނަމަ އެ ލަފަޔަކީ ކޮބައި ކަމުގެ މައުލޫމާތު ހޯދުމަށެވެ.
4000 ފްލެޓު ލިބުނު މީހުންނަށް ފްލެޓުތައް ހަވާލު ކުރުން އިންތިހާ އަށް ލަސްވުމާ ގުޅިގެން ފްލެޓުތައް ލިބުނު މީހުންގެ ޝަކުވާ ދައުލަތުގެ އެކި އިދާރާތަކަށް ހުށަހަޅަމުން ދިޔަ ނަމަވެސް މިހާތަނަށް އެއްވެސް އަލިމަގެއް އެކަމުގައި ފެނިފައި ނުވާކަން ފާހަގަ ކުރެވެއެވެ. އެއާއެކު ރިޔާސީ ކެމްޕޭނުގައި މިހާރުގެ ރައީސް ވިދާޅުވެފައިވަނީ "ރައްޔިތަކަށް ދޭން ބުނި އެއްޗެއް އަތުލުމެއް ނޯންނާނެ" ކަމަށެވެ. "އެއީ ގޯތި ވިޔަސް ފްލެޓް ވިޔަސް" އަތުނުލައްވާނެ ކަމަށެވެ.
ރައީސް މުއިއްޒު ވަނީ އެމަނިކުފާނުގެ ސަރުކާރެއްގައި އެއްވެސް އެއްޗެއް ސިއްރު ނުކުރައްވާނެ ކަމަށާއި، އެމަނިކުފާނުގެ ސަރުކާރެއްގައި ފޮރުވާނެ އެއްޗެއް ނޯންނާނެ ކަމަށްވެސް ވިދާޅުވެފައެވެ.
