ރައީސް މުއިއްޒު ކުއްލި ދަތުރުފުޅެއްގައި އިންޑިއާ އަށް ވަޑައިގަންނަވަނީ
މިހާރު ކުރިއަށްދަނީ މި ދަތުރުފުޅު ކުރެއްވުމަށް އެންމެ ރަނގަޅު ތާރީޚަކީ ކޮބައިތޯ މަޝްވަރާކުރުމުގެ މަސައްކަތް
ޑރ މުއިއްޒު އިންޑިއާ އައުޓް ކެމްޕޭންގައި
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ވަރަށް އަވަހަށް އިންޑިއާ އަށް ވަޑައިގަންނަވަން ހަމަޖެހިފައިވާ ކަމަށް ރައީސުލް ޖުމްހޫރިއްޔާގެ އޮފީހުން ބުނެފިއެވެ.
ރައީސުލްޖުމްހޫރިއްޔާގެ އޮފީހުން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ އޮފީހުގެ ތަރުޖަމާނު ހީނާ ވަލީދު ވިދާޅުވީ، މިހާރު ކުރިއަށްދަނީ މި ދަތުރުފުޅު ކުރެއްވުމަށް އެންމެ ރަނގަޅު ތާރީޚަކީ ކޮބައިތޯ މަޝްވަރާކުރުމުގެ މަސައްކަތްކަމަށެވެ.
ދަތުރުގެ ތާރީޚު ކަނޑައަޅާނީ ދެ ޤައުމުގެ އިސްވެރިންނަށް އެންމެ ފަސޭހަ ތާރީޚަށް ބެލުމަށް ފަހުގައިކަމަށް އޭނާ ވިދާޅުވިއެވެ.
"އިންޑިއާ އައުޓް" ގެ ނަމުގައި އިންޑިއާ އާ ދެކޮޅަށް އޭރުގެ އިދިކޮޅު ޕީޕީއެމް/ޕީއެންސީގެ ފަރާތުންރާއްޖޭގައި ހިންގި ކެމްޕޭންގެ އެންމެ ކުރީ ސަފުގައި މަސައްކަތް ކުރެއްވި ޑރ. މުއިއްޒު ވެރިކަމަށް ވަޑައިގަތުމަށް ފަހު ގެންދަވަނީ އިންޑިއާ އާ ގާތް ގުޅުމެއް ބޭއްވުމަށް މަސައްކަތް ކުރައްވަމުންނެވެ. ވެރިކަމަށް ވަޑައިގަތްފަހުންވެސް، ރައީސް މުއިއްޒު ސަރުކާރުގެ ސިޔާސީ މަގާމުތަކުގައި ތިއްބެވި އިސް ބައެއް ފަރާތްތަކުން އިންޑިއާގެ ބޮޑު ވަޒީރު ނަރެންދްރަ މޯދީ އަށް ހަޑިހުތުރު ބަހުން ވަރަށް ބޮޑަށް ފުރައްސާރަކޮށް ސޯޝަލް މީޑިއާގައި ކުރި ޕޯސްޓްތަކާ އެކު ދެގައުމުގެ ގުޅުމަށް ހީނަރުކަން އައިސް ރާއްޖެއަށް އިންޑިއާ އިން އަންނަ ޓޫރިސްޓުންގެ އަދަދުވެސް ބޮޑު ތަނުން ދަށަށް ގޮސްފައިވާކަން ވަނީ ފާހަގަ ކުރެވިފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މިއަހަރުގެ ޖޫން މަހު އިންޑިއާގެ ބޮޑުވަޒީރު ނަރެންދްރަ މޯދީ ބޮޑުވަޒީރު ކަމުގެ މަގާމުގެ ހުވައި ކުރެއްވުމުގެ ރަސްމިއްޔާތައް އިންޑިއާއަށް ރަސްމީ ދަތުރުފުޅެއް ކުރައްވާފައެވެ.
ޑރ. މުއިއްޒު އިންޑިއާ އަށް އަވަސް ދަތުރުފުޅެއް ކުރައްވަން ހަމަޖެހިފައިވާކަން ރައީސް އޮފީހުން ހާމަ ކޮށްފައިވާ މި ދަނޑިވަޅަކީ، ރާއްޖެ އަށް އިގްތިސާދީ ބޮޑެތި ގޮންޖެހުންތަކަކާ ކުރިމަތިވެފައިވާ ދަނޑިވަޅެކެވެ. ދަރަނި ނުދެއްކި ރާއްޖެ ބަނގުރޫޓްވެދާނެ ކަމުގެ އިންޒާރު އެމެރިކާގެ ރޭޓިން އޭޖެންސީ ފިޗުން ދީފައިވާއިރު، ބޭރުގެ ދަރަނި ރާއްޖޭން އެންމެ ގިނައިން ނަގާފައިވާ ދެ ގައުމުގެ ތެރޭގައި އިންޑިއާ ހިމެނެއެވެ. އަނެއް ގައުމަކީ ޗައިނާއެވެ.
މި ދެގައުމުން ނަގާފައިވާ ލޯނުތަކަށް ލުއި ގޮތްތަކެއް ހަދައިދޭނެ ކަމުގެ "ފެހި ސިގްނަލް" ލިބިފައިވާ ކަމަށް ސަރުކާރުން ހާމަކޮށްފައިވީ ނަމަވެސް އެކަންކަން ހަމަ ޖެހުނުކަމެއް ސަރުކާރުން ބުނެފައެއް ނުވެއެވެ.
