ސަސްޕެންޝަންގައި ތިއްބެވި ޝިއުނާ އަދި މަލްޝާ އިސްތިއުފާ ދެއްވައިފި

އިންޑިއާގެ ބޮޑު ވަޒީރު ނަރެންދުރަ މޯދީއަށް ފާޑުވިދާޅުވިކަމަށް ބުނެ ބަލަމުންދާ މައްސަލައާ ގުޅިގެން ސަސްޕެންޑްކުރި މަރިޔަމް ޝިއުނާ އަދި މަލްޝާ ޝަރީފް އިސްތިއުފާ ދެއްވައިފިއެވެ.

އިންޑިއާގެ ބޮޑު ވަޒީރަށް ފާޑުވިދާޅުވުމާ ގުޅިގެން ސަސްޕެންޑްކުރި ތިން ނައިބު ވަޒީރުންނަކީ ޒުވާނުންނާގުޅޭ ވުޒާރާގެ ނައިބު ވަޒީރުން ކަމުގައިވާ މަރިޔަމް ޝިއުނާ، މަލްޝާ ޝަރީފް އަދި މަހުޒޫމް މާޖިދެވެ.

Advertisement

އޭގެ ތެރެއިން ޝިއުނާ އަދި މަލްޝާ ވަނީ އިސްތިއުފާ ދެއްވާފައެވެ. މަހުޒޫމްއަށް ގުޅާލުމުން އޭނާ ފޯނަށް ޖަވާބު ދީފައިނުވާތީ އިސްތިއުފާ ދެއްވީކަން ނުވަތަ ނޫންކަންް ކަށަވަރު ވެފައެއް ނުވެއެވެ.

މި ވަޒީރުން ސަސްޕެންޑްކޮށްފައި ވަނީ އިންޑިއާގެ ބޮޑުވަޒީރަށް އަމާޒު ކުރައްވައި ވާހަކަތަކެއް ދެއްކެވުމާ ގުޅިގެން، މިއަހަރުގެ ޖެނުއަރީ މަހުގެ 7 ވަނަ ދުވަހުއެވެ.

އެ ބޭފުޅުން ސަސްޕެންޑްކޮށްފައި ވަނީ ބޮޑު ވަޒީރު ނަރެންދުރަ މޯދީއަށް އަމާޒުކުރައްވައި ފާޅުކުރެއްވި ޝުއޫރުތަކުގެ ސަބަބުން، ރާއްޖެ ބޮއިކަޓް ކުރުމަށް ބޮޑު ކެމްޕޭނެއް ފަށައި، އެކަމާއެކު އާންމުންގެ ކަންބޮޑުވުން ބޮޑުވެ، ސަރުކާރަށް ޕްރެޝަރު ވަރަށް ބޮޑުވުމާ ގުޅިގެންނެވެ.

މިކަން ހިނގަން މެދުވެރިވީ، އިންޑިއާގެ ބޮޑުވަޒީރު ނަރެންދުރަ މޯދީ ލަކްޝަދީޕުގެ ރަށްތަކަށް ވަޑައިގެން، އެރަށްތަކުގެ ރީތިކަން ޕްރޮމޯޓުކުރެއްވުމާ ގުޅިގެން، އިންޑިއާގެ ސޯޝަލް މީޑިޔާ އެކްޓިވިސްޓުން، ވަނީ ރާއްޖެއަކީ "ޕްރޯ ޗައިނާ" ގައުމެއް ކަމުގައި ބުނެ، ރާއްޖެ ނުދިޔުމަށް "ބޮއިކޮޓް މޯލްޑިވްސް"ގެ ނަމުގައި ކެމްޕޭނެއް ފެށުމާއެކުއެވެ.