ފްރާންސް ފުޓުބޯޅަ އިން ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑުގެ 30 ކުޅުންތެރިންގެ ނޮމިނޭޝަންގެ ތެރޭގައި އޭނާ ނުހިމެނުމުން ހައިރާންވި ކަމަށް، ރެއާލް މެޑްރިޑަށް ކުޅެމުން އަންނަ ބްރެޒިލްގެ ފޯވާޑް ރޮޑްރީގޯ ބުނެފި އެވެ.

މިދިޔަ ހަފުތާގެ ތެރޭގައި ވަނީ ބެލެންޑިއޯ އެވޯޑަށް ނޮމިނޭޓުވެފައިވާ 30 ކުޅުންތެރިން ނަންތައް އިއުލާން ކޮށްފަ އެވެ. އޭގެ ތެރޭގައި އުމުރުން 23 އަހަރުގެ ރޮޑްރީގޯ ނުހިމެނެ އެވެ. އޭނާގެ އިތުރުން ވެސް ބައެއް އެހެން ކުޅުންތެރިން އެވޯޑުގެ ނޮމިނޭޝަންގައި ނުހިމެނެ އެވެ. އޭގެ ތެރޭގައި ލިވަޕޫލަށް ކުޅެމުން އަންނަ މިޞްރުގެ ފޯވާޑު މުޙައްމަދު ޞަލާޙުގެ އިތުރުން، މެންޗެސްޓަރ ޔުނައިޓެޑަށް ކުޅެމުން އަންނަ ބްރޫނޯ ފެނާންޑޭސް ފަދަ ކުޅުންތެރިން ވެސް ހިމެނެ އެވެ.

އެވޯޑަށް ނޮމިނޭޓުވެފައި ނުވާތީ، އެކަމާ ގުޅޭ ގޮތުން ވާހަކަ ދައްކަމުން ރޮޑްރީގޯ ބުނީ ބެލެންޑިއޯ އެވޯޑުގެ ނޮމިނޭޝަންގައި އޭނާގެ ނަން ހިމަނާފައި ނެތުމުން ދެރަވި ކަމަށެވެ. ރޮޑްރީގޯ ޤަބޫލު ކުރާ ގޮތުގައި ބެލެންޑިއޯ އެވޯޑުގެ ނޮމިނޭޝަނުން އޭނާ އަށް ޖާގަ ލިބެން ޙައްޤެވެ. އެވޯޑަށް ނޮމިނޭޓުވެފައި ތިބި އެހެން ކުޅުންތެރިންނަށް ދެރަ ބަހެއް ބުނަން ބޭނުން ނުވާ ކަމަށާއި، އިޙުތިރާމް ކުޑަ ކުރަން ބޭނުން ނުވާކަން ފާހަގަކޮށް ރޮޑްރީގޯ ބުނީ، އެވޯޑުގެ ނޮމިނޭޝަންގައި އޭނާ ހިމެނެން ޖެހޭނެ ކަމަށް ޤަބޫލު ކުރާ ކަމަށެވެ.

އެކަމުން ހައިރާން ކަމެއް ލިބުނުކަން ފާހަގަކުރަމުން ރޮޑްރީގޯ ބުނީ، އެކަމާ އޭނާ އަށް ކުރެވޭނެ އެެއްވެސް ކަމެއް ނޯންނާނެ ކަމަށެވެ. އަދި އޭނާ އަކީ އެ ނިންމުންތައް ނިންމާ މީހާ ނޫން ކަމަށް ވެސް އޭނާ ވަނީ ބުނެފަ އެވެ. އިތުރަށް ރޮޑްރީގޯ ބުނީ، ރެއާލާ އެކު ގިނަ ތަށިތަކެއް ކާމިޔާބު ކޮށްފައިވާނެ ކަމަށާއި، ދެން ވެސް ބޭނުން ވަނީ އެ ކުލަބާ އެކު ކާމިޔާބު ހޯދުމަށް ކަމަށެވެ. ރެއާލް މެޑްރިޑަކީ ދުނިޔޭގައި އޮތް އެންމެ މޮޅު ކުލަބު ކަމަށާއި، އޭނާ ހިތްވަރު ހޯދަނީ އެކަމުން ކަމަށް ވެސް ރޮޑްރީގޯ ބުންޏެވެ. ކޮންމެ ދުވަހަކު ވެސް އޭނާ މަސައްކަތް ކުރަމުން އަންނަނީ، އެންމެ މޮޅު ކުލަބުގެ އެންމެ މަތީ ފަންތީގައި ހުރުމަށް ކަމަށް ރޮޑްރީގޯ ވަނީ ބުނެފަ އެވެ.

ރޮޑްރީގޯ ވަނީ ރެއާލާ އެކު މިދިޔަ ސީޒަންގައި ސްޕެނިޝް ލީގު، ސްޕެނިޝް ސުޕަ ކަޕް، ޔުއެފާ ސުޕަ ކަޕް އަދި ޔުއެފާ ޗެމްޕިއަންސް ލީގު ކާމިޔާބު ކޮށްފަ އެވެ. ރެއާލްގައި އޭނާ މޮޅު ކުޅުމެއް ދައްކާފައިވާއިރު، ރޮޑްރީގޯ ވަނީ އެ ކުލަބަށް ކުޅެދިން 51 މެޗުގައި 17 ލަނޑު ޖަހައިފަ އެވެ.