ފްރާންސް ފުޓުބޯޅަ އިން ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު ކާމިޔާބު ކުރާނީ، ރެއާލް މެޑްރިޑަށް ކުޅެމުން އަންނަ ބްރެޒިލްގެ ވިނީޝިއުސް ޖޫނިއާ ކަމަށްް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.
އޭނާ މިހެން ބުނީ ޔުއެފާ ޗެމްޕިއަންސް ލީގުގައި ރެއާލް އިން ޖަރުމަނުގެ ބޮރޫޝިއާ ޑޯޓްމަންޑާ ދެކޮޅަށް ކުޅުނު މެޗަށްފަހު ނޫސްވެރިންނާ ވާހަކަ ދައްކަމުންނެވެ. ފަހަތުން އަރައި ރެއާލް މޮޅުވި އެ މެޗުގައި ވިނީޝިއުސް ވަނީ ތިން ލަނޑު ޖަހައި، ހެޓްރިކް ހަމަކޮށްފަ އެވެ.
އަންޗެލޮޓީ ބުނީ ދެ ވަނަ ހާފުގައި ވިނީޝިއުސް ދެއްކި ފެންވަރުގެ ކުޅުމެއް ދެއްކޭނެ ކުޅުންތެރިޔަކު ހޯދުމަކީ މިހާރު އުނދަގޫ ކަމަކަށް ވާނެ ކަމަށެވެ. މެޗުގައި ތިން ލަނޑު ޖެހުމުގެ އިތުރުން، ދެ ވަނަ ހާފުގައި ވިނީޝިއުސް ދެއްކި ހުނަރުވެރި ކުޅުމާއި، އޭނާގެ ފެންވަރަކީ ފާހަގަކޮށްލެވޭ ކަމެއް ކަމަށް ވެސް އަންޗެލޮޓީ ބުންޏެވެ.
އެކަން ފާހަގަ ކުރަމުން އަންޗެލޮޓީ ބުނީ ބެލެންޑިއޯ އެވޯޑު ކާމިޔާބު ކުރާނީ އަދި ލިބެން ޖެހޭނީ ވެސް ވިނީޝިއުސް އަށް ކަމަށެވެ. ނަމަވެސް އެއީ ހަމައެކަނި ޑޯޓްމަންޑާ ދެކޮޅަށް ދެއްކި ކުޅުމަށް ބަލާފައި ބުނި އެއްޗެއް ނޫން ކަމަށާއި، އެއީ މުޅި ސީޒަނަށް ބަލާފައި ބުނި އެއްޗެއް ކަމަށް ވެސް އަންޗެލޮޓީ ބުންޏެވެ. އެހެން ނަމަވެސް އެ މެޗުގައި ވިނީޝިއުސް ޖެހި ތިން ލަނޑަކީ، ބެލެންޑިއޯ ކާމިޔާބު ކުރަން އޭނާ އަށް ލިބުނު އިތުރު އެހީއެއް ކަމަށް ވެސް އަންޗެލޮޓީ ވަނީ ސިފަ ކޮށްފަ އެވެ.
މީގެ އިތުރުން އަންޗެލޮޓީ ބުނީ އޭނާ އަށް ޤަބޫލު ކުރެވޭ ގޮތުގައި ވިނީޝިއުސް ދައްކަމުން އަންނަ ކުޅުން އެންމެ ވެސް ބަލައި ގަންނަ ކަމަށެވެ. ސްޕެއިންގައި މީހުން ވިނީޝިއުސްއާ ދިމާ ކުރަނީ އޭނާގެ ފަރާތުން ތަފާތުތަކެއް ފެންނާތީ ކަމަށާއި، އޭނާ ކުޅެމުން ދަނީ ނަސްލީ ތަފާތު ކުރުންތަކާ ދެކޮޅަށް ކަމަށް ވެސް އަންޗެލޮޓީ ބުންޏެވެ. އަދި ސްޕެއިންގައި ވެސް މީހުން ވިނީޝިއުސް އަށް އިޙުތިރާމް ކުރާ ކަމަށް ވެސް އަންޗެލޮޓީ ބުންޏެވެ.
މިއަހަރުގެ ބެލެންޑިއޯ އެވޯޑު ހަފުލާ އޮންނަނީ މި މަހުގެ 28 ވަނަ ދުވަހު ފްރާންސްގެ ވެރި ރަށް ޕެރިހުގަ އެވެ. މިއަހަރުގެ ބެލެންޑިއޯ އެވޯޑަށް ނޮމިނޭޓުވެފައިވާ 30 ކުޅުންތެރިންގެ ނަން އިއުލާން ކޮށްފައިވާއިރު، އެ ލިސްޓުގައި ވިނީޝިއުސް ވެސް ހިމެނެ އެވެ.
