އިޒްރޭލުން ޣައްޒާ ސިޓީ އަށާއި ރަފަހް އަށް ދޭ ހަމަލާތައް ހަރުކަށިކޮށް، ގިނަ އަދަދެއްގެ މީހުން ޝަހީދު ކޮށްލައިފި ކަމަށް އަލްޖަޒީރާއިން ރިޕޯޓުކޮށްފިއެވެ.

ޕޯލިއޯ ވެކްސިންގެ މަސައްކަތަށް ޣައްޒާގެ މެދުތެރޭގެ ސަރަޙައްދުގައި ހަމަލާތައް ދިނުން މެދުކަނޑާލާފައި އޮތް ނަމަވެސް، ޣައްޒާ އަކީ "ހަނގުރާމައިގެ މައިދާނެއް" ކަމަށް އަލްޖަޒީރާގެ ރިޕޯޓަރ ވަނީ ސިފަކޮށްފައެވެ. އެއްގަމު މަގުން ދޭ ހަމަލާތަކުގެ އިތުރުން ވައިގެ ހަމަލާތައް ދަނީ ކުރިއަށް ކަމަށް ވެސް އަލްޖަޒީރާގެ ނޫސްވެރިޔާ ބުނެފައިވެއެވެ.

ޕޯލިއޯ ވެކްސިން ޕްރޮގްރާމް ކުރިއަށް ގެންދިއުމަށް ފުރުސަތު ދިނުމުގެ ގޮތުން ބޮން އެޅުން ހުއްޓުވުމަށް އިޒްރޭލަށް ޕްރެޝަރ ކޮށްދިނުމަށް ފަލަސްޠީނުގެ ސިއްޙަތާ ބެހޭ ވަޒީރު މާޖިދު އަބޫ ރަމަޟާން ވަނީ ބައިނަލްއަޤްވާމީ މުޖުތަމަޢުއަށް ގޮވާލައްވާފައެވެ.

އަނެއްކޮޅުން ހުޅަނގު އައްސޭރިއަށް އަރާ އިޒްރޭލު ސިފައިން ދެމުންދާ ހަމަލާތަކުގައި ފަލަސްތީނުގެ 33 މީހުން ޝަހީދު ވެއްޖެ ކަމަށް ފަލަސްތީނުގެ ސިއްހަތާ ބެހޭ ވުޒާރާ އިން ވަނީ ބުނެފައެވެ.

އަލް ޖަޒީރާ އިން ބުނާގޮތުގައި ހުޅަނގު އައްސޭރީގައި އިޒްރޭލުން މިގެންދާ އަސްކަރީ އޮޕަރޭޝަން އަކީ 2000 ގެ އަހަރުތަކުގެ ކުރީކޮޅުން ފެށިގެން މިހާތަނަށް ފެންނަމުންދާ އެންމެ ބޮޑު އަދި އެންމެ ނުރައްކާތެރި އޮޕަރޭޝަނެވެ.

ލުބުނާނުގައި ހުންނަ ޙަމާސްގެ މަންދޫބު އަދި ޙަމާސްގެ ސިޔާސީ ބިއުރޯގެ މެންބަރު އުސާމާ ޙަމްދާން އަންގާރަ ދުވަހު އަލްޖަޒީރާ-އަރަބިކް އަށް ދިން އިންޓަވިއުއެއްގައި ބުނެފައިވަނީ، ހަނގުރާމަ ނިމުމަކަށް ގެނައުމާ ބެހޭ ގޮތުން އެމެރިކާގެ އައު ހުށަހެޅުންތަކުގައި އައު އެއްޗެއް ނެތް ކަމަށާއި، އެއީ ހަމައެކަނި އިޒްރޭލަށް އިތުރު ޖަރީމާތައް ހިންގުމަށް ވަގުތު ހޯދައިދިނުމަށް އެމެރިކާ އިން ހުށަހަޅާފައިވާ އެއްޗެއް ކަމަށެވެ.

ހަމްދާން ހާމަކުރި ގޮތުގައި ފަލަސްތީނުގެ ބިންތައް ހިސާރު ކުރުމުގައި އަދި ފަލަސްތީނުގެ ނަސްލު ނައްތާލަން އިޒްރޭލުން ހިންގާ ޖަރީމާގައި އެމެރިކާ އަކީ އިޒްރޭލުގެ ބައިވެރިއެއްކަން ސާފެވެ. ޙަމްދާން އެމެރިކާ އަށް ގޮވާލީ އައު ހުށަހެޅުމެއް ހުށަހެޅުމުގެ ބަދަލުގައި ޖުލައި 2 ގައި އެއްބަސްވެފައިވާ އެއްބަސްވުމަކަށް ތަބާވުމަށް ނަތަންޔާހޫއަށް ބާރުއެޅުމަށެވެ. އެއީ މައްސަލައަށް އޮތް ހައްލެއް ކަމަށާއި، އިތުރު މަޝްވަރާތަކެއް ބޭނުމެއް ނުވާ ކަމަށްވެސް ހަމްދާން ވަނީ ބުނެފައެވެ.

ހަމާސް އިން ސުލްހައިގެ އެއްބަސްވުމާ ބެހޭ ގޮތުން ދެކޭ ގޮތް ހާމަ ކުރި އިރު އެމެރިކާގެ ވައިޓް ހައުސް އިން ހަނގުރާމަ ހުއްޓުމަކަށް ގެނައުމަށް އައު ހުށަހެޅުމެއް އަންނަ ހުކުރު ދުވަހު އިއުލާން ކުރާނެ ކަމަށް ވަނީ ބުނެފައެވެ.

ހަމާސްއިން ވަނީ މިޞްރާއި ގަތަރު މެދުވެރިއެއްގެ ދައުރު އަދާކުރި އެމެރިކާގެ ކުރީގެ ހުށަހެޅުމަށް އެއްބަސްވެފައެވެ. މި ހުށަހެޅުމުގައި ހިމެނެނީ ހަނގުރާމަ ހުއްޓުވުމާއި، އިޒްރޭލު ސިފައިން ޣައްޒާއިން އެއްކޮށް ފޭބުމާއި، ރަހީނުކޮށްފައި ތިބި އިޒްރޭލު އެންމެން ދޫކޮށްލުމާއި، ޣައްޒާ އަލުން ބިނާކުރުމާއި، އަދި އިޒްރޭލުން ޣައްޒާ ހިސާރުކޮށްފައި އޮތް އޮތުން ނިމުމަކަށް ގެނައުމެވެ.

ނަމަވެސް އިޒްރޭލުން ވަނީ މި ހުށަހެޅުން ބަލައިނުގަނެ ދޫކޮށްލާފައެވެ. އިޒްރޭލުގެ ބޮޑުވަޒީރު ބެންޖަމިން ނެތަންޔާހޫ ވިދާޅުވެފައިވަނީ ޣައްޒާއިން އިސްރާއީލުގެ ސިފައިން ފޭބުމުން "ހަމާސް ދެމިއޮންނާނެ" ކަމަށެވެ. ނަތަންޔާހޫ ތަކުރާރުކޮށް ހާމަކުރައްވާފައިވަނީ ހަމާސް މުޅިން ނައްތާލެވެންދެން ހަނގުރާމަ ކުރިއަށް ގެންދާނެ ކަމަށެވެ.

ހަމްދާން ފާހަގަ ކުރި ގޮތުގައި އާދީއްތަ ދުވަހު ނަތަންޔާހޫ ބޭއްވި ނޫސްވެރިންގެ ބައްދަލުވުމުގައި ވެސް "އެއްވެސް އައު ހުށަހެޅުމެއް އިޒްރޭލުން ބަލައިނުގަންނާނެކަން ސާފުކޮށް" އެނގެއެވެ.

އިޒްރޭލުން ޣައްޒާއަށް ދެމުންދާ ހަމަލާ ތަކުގައި ޝަހީދުވި މީހުންގެ އަދަދު 40،819 ށް ވަނީ އަރާފައެވެ. އިޒްރޭލުގެ ހަމަލާތަކުގައި، 94،291 ފަލަސްތީން މީހުން ޒަޚަމްވެފައިވެއެވެ.