މި މަސައްކަތުގެ ސަބަބުން ކުޑަކުދިންގެ ކަރާމާތާއި، ރައްކާތެރިކަމާއި ދުޅަހެޔޮކަން ކަށަވަރުކުރުމަށް އިތުރު ބާރެއް ލިބިދޭނެ
ކުޑަކުދިންގެ ޙައްޤުތަކާއި ރައްކާތެރިކަމާއި ގުޅޭ ޤައުމީ ޕުލޭން އިފްތިތާހުކުރުމުގެ ރަސްމިއްޔާތުގެ ތެރެއިން
ކުޑަކުދިންގެ ހައްގުތަކާއި ރައްކާތެރިކަމާއި ގުޅޭ ގައުމީ ޕުލޭން އިފްތިތާހުކޮށްފިއެވެ.
އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއާއި އދ. ގެ ކުޑަކުދިނާއި ބެހޭ ޖަމިއްޔާ (ޔުނިސެފް މޯލްޑިވްސް) އާއި ގުޅިގެން ބޭއްވުނު މި ރަސްމިއްޔާތުގައި ވަޒީރު ޑރ. އައިޝަތު ޝިހާމާއި އެކު ޝަރަފުވެރި މެހުމާނެއްގެ ގޮތުގައި ބައިވެރިވެވަޑައިގަތީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދުއެވެ.
ގައުމީ އޮނިގަނޑު އިފްތިތާހުކޮށް، އަމަލީގޮތުން މަސައްކަތްކުރުވެން ފެށުން ވެގެންދާނީ ރާއްޖެއިން ސޮއިކޮށްފައިވާ އދ. ގެ "ޗައިލްޑް ރައިޓްސް ޕްރޮޓެކްޝަން އެކްޓް އެންޑް ދަ ކޮންވެންޝަން އޮން ދަ ރައިޓްސް އޮފް ދަ ޗައިލްޑް" މުއާހަދާއަށް އަމަލުކުރުމަށް އެޅިގެންދާނެ އިތުރު ފިޔަވަޅަކަށެވެ. އަދި ޔުނިސެފް މޯލްޑިވްސްއާ އެކީގައި އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން ކުރަމުންގެންދާ މި މަސައްކަތުގެ ސަބަބުން ކުޑަކުދިންގެ ކަރާމާތާއި، ރައްކާތެރިކަމާއި ދުޅަހެޔޮކަން ކަށަވަރުކުރުމަށް އިތުރު ބާރެއް ލިބިދޭނެއެވެ.
އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން ކުރަމުންދާ މިފަދަ މުހިންމު މަސައްކަތްތަކީ އޭގެ ސަބަބުން ކުޑަކުދިންނަށް ތައުލީމު ހާސިލްކުރުމާއި، ރައްކާތެރި މާހައުލެއްގައި ހެދިބޮޑުވުމާއި، އެކުދިންނާއި ގުޅުންހުރި ކަންކަމާއި އަދި އެކުދިންގެ މުސްތަގުބަލާއި މެދުގައި އެކުދިންގެ ޝުއޫރުތައް ހިމެނޭހެން މަސައްކަތްތައް ބައްޓަންކުރުމަށް ލިބޭ އިތުރު ބާރެކެވެ.
އެއްވެސް ކުއްޖަކު ބާކީ ނުވާނެފަދައިން އެކުދިންގެ މި ހައްގުތައް ރައްކާތެރިކޮށް، އެކަންކަމަށް ވަކާލާތުކޮށް، އެކުދިންގެ ލާބައަށް އިސްކަންދޭ މުޖުތަމައެއް ބައްޓަންކުރުމަކީ އިޖުތިމާއީ އަދި އާއިލީ ވުޒާރާއާއި ޔުނިސެފް މޯލްޑިވްސް އިން ހިއްސާވާ، އަދި އެކަމަށްޓަކާ މެދުނުކެނޑި މަސައްކަތްކުރަމުންދާ އަޒުމެކެވެ.
މި ރަސްމިއްޔާތުގައި ވާހަކަދައްކަވަމުން ރައީސްގެ އަނބިކަނބަލުން ވިދާޅުވީ މި އެކްޝަން ޕްލޭން އިފުތިތާހު ކުރެވިގެން ދިއުމަކީ ކުޑަކުދިންގެ ހައްގުތައް ކަށަވަރުކޮށް، އަނިޔާ ލިބިފައިވާ ކުދިންނަށް ރައްކާތެރިކަން ފޯރުކޮށްދިނުމުގައި ކުރިޔަށް އެޅުނު މުހިންމު ފިޔަވަޅެއް ކަމުގައެވެ. އަދި މި އެކްޝަން ޕްލޭނަކީ އަނިޔާ ލިބިފައިވާ ކުދިންނަށް ރައްކާތެރިކަން ދިނުމާއި އެފަދަ ކުދިން ހިމާޔަތްކުރުން ފަދަ ކަންކަން ހިނގިޔަ ނުދިނުމަށް މަސައްކަތްކުރުމާއި އަދި އެފަދަ ކަންކަމާމެދު އަމަލުކުރާނެ ގޮތްތަކުގެ ސާފު މަގުޗާޓެއް ހިމެނޭ ވަރަށް ފުރިހަމަ ޕްލޭނެއްކަން އެކަމަނާ ފާހަގަކުރެއްވިއެވެ.
މި ރަސްމިއްޔާތުގައި ވާހަކަ ދައްކަވަމުން އިޖުތިމާއީ އަދި ޢއިލީ ތަރައްގީއާ ބެހޭ ވަޒީރު ޑރ. އައިޝަތު ޝިހާމް ވިދާޅުވީ ދުނިޔޭގެ ހުރިހާ ކުދިންނަށްވެސް، އެއްވެސް ތަފާތުކުރުމެއްނެތި، ރައްކާތެރި އަދި އޯގާތެރި މާޙައުލެއްގައި އުޅުމުގެ ހައްގު އޮންނަންޖެހޭނެ ކަމަށެވެ.
ފަލަސްތީނުގެ ކުޑަކުދިންގެ ހާލަތު ފާހަގަކުރައްވާ، ވެސްޓް ބޭންކާއި ގައްޒާ ސްޓްރިޕާއި ފަލަސްތީނާއި އެ ގައުމުގެ ރައްޔިތުން ވޭތުވެދިޔަ 76 އަހަރު ތަހައްމަލުކުރަމުން އައި ދަތި ހާލު ވަޒީރު ވަނީ ފާހަގަކުރައްވާފައެވެ. މިގޮތުން ވޭތުވެދިޔަ 9 މަސްދުވަހުގެ ތެރޭގައި 25،000 ކުދިން ޔަތީމުވެ، 100،000 މީހުން ޒަހަމްވެފައިވާއިރު، އޭގެ ތެރޭގައި އަތްފައި އައިބުވެ، ގެއްލިފައިވާ 30،000 ކުދިން ހިމެނޭކަމަށް ވަޒީރު ވިދާޅުވިއެވެ.
މި ޕްލޭނާއެކު ރާއްޖެއިން ސޮއިކޮށްފައިވާ އދ. ގެ "ޗައިލްޑް ރައިޓްސް ޕްރޮޓެކްޝަން އެކްޓް އެންޑް ދަ ކޮންވެންޝަން އޮން ދަ ރައިޓްސް އޮފް ދަ ޗައިލްޑް" މުއާހަދާއަށް އަމަލުކުރުމަށް ފަސޭހަވެގެންދާނެއެވެ.
