ކޯމަން ނިންމީ ބަޔާންގައި މަޑު ކުރަން
3 ސެޕްޓެމްބަރު 2024 | އަންގާރަ 01:32އެކަމާ ގުޅޭ ގޮތުން ބަޔާންގެ ޑައިރެކްޓަރު މެކްސް އެބާލް ވިދާޅުވީ، ބަޔާންގައި ކޯމަން މަޑު ކުރަން ނިންމާފައިވާ ކަމަށެވެ.
ބަޔާނަށް ކުޅެމުން އަންނަ ފްރާންސްގެ ކިންގްސްލީ ކޯމަން
ޖަރުމަނުގެ ބަޔާން މިއުނިކަށް ކުޅެމުން އަންނަ ފްރާންސްގެ ކިންގްސްލީ ކޯމަން އެ ކުލަބުގައި މަޑު ކުރަން ނިންމައިފި އެވެ.
އުމުރުން 28 އަހަރުގެ ކުޅުންތެރިޔާ ވަނީ 2017 ވަނަ އަހަރު ބަޔާނާ އެކު ދާއިމީ އެއްބަސްވުމެއް އެކުލަވާލައިފަ އެވެ. ބަޔާނާ އެކު އެންމެ ފަހުން އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2027 ވަނަ އަހަރު އެވެ. އޭނާގެ އެއްބަސްވުމުގައި ބާކީ ތިން އަހަރު އޮތްއިރު، ބައެއް ކުލަބުތަކުން ވަނީ ކޯމަން ހޯދުމުގެ ޝައުޤުވެރިކަން ފާޅު ކޮށްފަ އެވެ.
އެގޮތުން ސައުދީ ޕްރޯ ލީގުގައި އަލް ޙިލާލް އިން ވަނީ ކޯމަން ހޯދުމުގެ މަސައްކަތް ކޮށްފަ އެވެ. ކޯމަން ހޯދުމުގެ ގޮތުން ބަޔާނަށް ދައްކަން ޖެހޭ ފީ ދައްކަން ވެސް އަލް ޙިލާލް އޮތީ ތައްޔާރަށެވެ. އަލް ޙިލާލްހެ ހުށަހެޅުމަށް ބަޔާނުން ވަނީ އެއްބަސް ވެސް ވެފަ އެވެ. ނަމަވެސް، ކޯމަން ނިންމީ ބަޔާންގައި މަޑު ކުރާށެވެ. އެކަމާ ގުޅޭ ގޮތުން ބަޔާންގެ ޑައިރެކްޓަރު މެކްސް އެބާލް ވިދާޅުވީ، ބަޔާންގައި ކޯމަން މަޑު ކުރަން ނިންމާފައިވާ ކަމަށެވެ.
ބަޔާނާ އެކު ދާއިމީ އެއްބަސްވުމެއް އެކުލަވާލުމުގެ ކުރިން ކޯމަން ވަނީ ލޯނު އެއްބަސްވުމެއްގެ ދަށުން ވެސް ބަޔާނަށް ކުޅެފަ އެވެ. ބަޔާނާ އެކު ޖުމުލަ ދިހަ ސީޒަން ހޭދަކޮށްފައިވާ ކޯމަން ވަނީ އެ ކުލަބަށް ކުޅެދިން 297 މެޗުގައި 64 ލަނޑު ޖަހައިފަ އެވެ. ބަޔާނާ އެކު އޭނާ ވަނީ 19 ތައްޓެއް ވެސް ކާމިޔާބު ކޮށްފަ އެވެ.
