ގައުމީ ދުވަހުގެ މުނާސަބަތާ ގުޅިގެން 5 ސެޕްޓެންބަރު 2024 ވާ ބުރާސްފަތި ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސައިފިއެވެ.

އާދިއްތަ ދުވަހު ރައީސް އޮފީހުން ބުނީ މި އަހަރުގެ ގައުމީ ދުވަހުގެ މުނާސަބަތާ ގުޅިގެން 5 ސެޕްޓެންބަރު 2024 ވާ ބުރާސްފަތި ދުވަހަކީ، ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހަމަޖައްސަވާފައިވާ ކަމަށެވެ.

އަންނަ ހަފްތާގެ ބުރާސްފަތި ދުވަސް ސަރުކާރު ބަންދުކުރިއިރު، އޯގަސްޓް މަހުގެ 13 ވަނަ ދުވަސް ވެސް ސަރުކާރުން ވަނީ މޫސުން ގޯސްވުމާއި ގުޅިގެން ބަންދުކޮށްފައެވެ.

ގައުމީ ދުވަސް ފާހަގަކުރަނީ އައްސުލްޠާން މުޙައްމަދު ތަކުރުފާނުލް އައުޒަމް ޕޯޗްގީޒުންގެ އަތްދަށުން ދިވެހިރާއްޖެ ސަލާމަތްކުރެއްވި ޒިކުރާ އާކުރުމުގެ ގޮތުންނެވެ. މިއަހަރު ގައުމީ ދުވަހާ ގުޅިގެން ހިންގާ ހަރަކާތްތަކުގެ ތަފްސީލެއް ސަރުކާރުން މިހާތަނަށް ހާމަކޮށްފައިިނުވެއެވެ.