ތައުލީމީ ދާއިރާގެ އުމްރާނީ މަސައްކަތްތައް ނުނިމި ދަނީ ފަހަތަށް - އިހުސާން
ތައުލީމީ ދާއިރާގެ ތަރައްޤީ އަށްޓަކާ އެ ދާއިރާގެ ބަޖެޓް ރަނގަޅަށް މެނޭޖްކުރުން މުހިންމު ކަމަށް އޭނާ ވިދާޅުވި
ދަންފަޅި ކުރުކުރަން ނިންމީ އެޑިޔުކޭޝަން މިނިސްޓްރީން ވާންޖެހޭ ތައްޔާރީތައް ވެފައިނުވާތީ އިހުސާން
ތައުލީމީ ދާއިރާގެ އުމްރާނީ މަސައްކަތްތައް ނުނިމި ދަނީ ފަހަތަށް ކަމަށް އެޑިއުކޭޝަން މިނިސްޓްރީގެ ކުރީގެ ޑެޕިއުޓީ މިނިސްޓަރ މުހައްމަދު އިހުސާން ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
އޭނާ ވިދާޅުވީ ތައުލީމީ ދާއިރާގެ ކަންކަން ދުވަހުން ދުވަހަށް ހީނަރުވަމުންދާ ކަމަށެވެ. މިހާރު ސިޔާސަތުތައް އެކުލަވާލުމުގައި ހަރުދަނާ ކަމެއް ނެތް ކަމަށް އޭނާ ވިދާޅުވިއެވެ. ތައުލީމީ ދާއިރާގެ ތަޖުރިބާކާރު މީހުންގެ ބަސް ސަރުކާރުން ނާހާ ކަމަށާއި ސަރުކާރުން މަސައްކަތް ކުރަނީ އެކަށީގެންވާ އަމާޒެއް ނެތި ކަމަށް އިހުސާން ވިދާޅުވިއެވެ. ރާއްޖޭގެ ސިޔާސަތުތައް އެކުލަވާލަނީ ދިރާސާގެ މައްޗަށް ކަމަށް ރައީސް ޑރ.މުހައްމަދު މުއިއްޒު ވިދާޅުވި ނަމަވެސް އެ މަންޒަރު ތައުލީމީ ދާއިރާ އިން ނުފެންނަ ކަމަށް އިހުސާން ވިދާޅުވިއެވެ. އިހުސާން ވިދާޅުވީ މި ސަރުކާރުގެ އެއްވެސް މިސްރާބެއް ނެތް ކަމަށެވެ. އަދި ތައުލީމީ ދާއިރާގެ ތަޖުރިބާ ނެތް މީހުން ތައުލީމީ ވުޒާރާގެ އިސް މަޤާމުތަކުގައި ތިބުމުން ރަނގަޅު ނިންމުންތައް ނިންމަން ވަރަށް ބޮޑަށް ހުރަސް އެޅޭ ކަމަށް އޭނާ ވިދާޅުވިއެވެ. މީގެ އިތުރުން މި ސަރުކާރުން ތައުލީމީ ދާއިރާގެ ޕްރޮޖެކްޓެއްގެ ގޮތުގައި ކޫލް ސްކޫލް ޕްރޮޖެކްޓް އިޢުލާން ކުރި ނަމަވެސް ސްކޫލްތައް އަދިވެސް އޭސީ ކުރަމުން ދަނީ ބެލެނިވެރިން އަތުން ފައިސާ ނަގައިގެން ކަމަށް އޭނާ ވިދާޅުވިއެވެ. އެ ވައުދު ވެފައި ވަނީ އެކަށީގެންވާ ވަރަށް ބަލަން ޖެހޭ ކަންކަން ނުބަލާ ކަމަށް އިހުސާން ވިދާޅުވިއެވެ. މީގެ އިތުރުން ސްކޫލްތަކަށް ބޭނުންވާ އަސާސީ ތަކެތި ފޯރުކޮށްދިނުމަށް ވެސް ދަތިތަކެއް ސަރުކާރަށް ދިމާވެފައިވާ ކަަމަށް އިހުސާން ވިދާޅުވިއެވެ.
އިހުސާން ވަނީ އެއްދަންފަޅިއަށް ކިޔެވުން ބަދަލުކުރުމަށް ތައުލީމީ ދާއިރާގައި ކުރަމުން އައި މަސައްކަތް ހުއްޓިފައިވާތީ އެކަމާއި މެދު ކަންބޮޑުވުން ފާޅުކުރައްވާފައެވެ. އަދި ސްކޫލްތަކުގެ ކަންކަން އިންތިޒާމްކުރުމުގައި ދަރިވަރުންނާއި މުދައްރިސުންގެ ލާބަޔާއި މަންފާ އަށް ނުބަލާ ކަމަށް ވެސް އޭނާ ވިދާޅުވިއެވެ. ސްކޫލްތަކުގެ ކިޔެވުން ރަނގަޅަށް ކުރިއަށް ގެންދިއުމަށްޓަކާ ސަރުކާރުން މިހާރުން މިހާރަށް ރަނގަޅު ފިޔަވަޅުތަކެއް އަޅަން ޖެހޭ ކަމަށް އިހުސާން ވަނީ ވިދާޅުވެފައެވެ. ތައުލީމީ ދާއިރާގެ ތަރައްޤީ އަށްޓަކާ އެ ދާއިރާގެ ބަޖެޓް ރަނގަޅަށް މެނޭޖްކުރުން މުހިންމު ކަމަށް އޭނާ ވިދާޅުވިއެވެ.
