އައިޝަތު ނޫރައްދީން ބޭންކް އޮފް މޯލްޑިވްސްގެ ބޯޑުން ވަކިކުރީ ސަރުކާރުގެ ނުފޫޒުން ކަން ހާމަ ވެއްޖެ
ޑރ މުއިއްޒުގެ އިކޮނޮމިކް މިނިސްޓަރ ސައީދު ވިދާޅުވީ ވަކި މީހަކު މުހިންމު ނޫން ކަމަށް
އެމްޑީޕީގެ ޗެއަރޕާސަން (ވ)، އައިޝަތު ނޫރައްދީން (މ)، އިކޮނޮމިކް މިނިސްޓަރ (ކ)
ބޭންކް އޮފް މޯލްޑިވްސް (ބީއެމްއެލް) އަށް ހިދުމަތް ކުރައްވާތާ 42 އަހަރުވެފައިވާ އައިޝަތު ނޫރައްދީން އެ ބޭންކުގެ ބޯޑުން ވަކިކުރީ ސަރުކާރުގެ ނުފޫޒުން ކަން ހާމަ ވެއްޖެއެވެ.
މިކަން ހާމަވީ، އެކަން ދިފާއު ކުރައްވާ، ޑރ. މުއިއްޒު ސަރުކާރުގެ އިކޮނޮމިކް މިނިސްޓަރ މުހައްމަދު ސައީދު އެކްސް ގައި ކުރެއްވި ޕޯސްޓެއްގައެވެ.
ސައީދު ވިދާޅުވީ " ވަކި މީހަކަށްވުރެ ޤައުމުގެ މަސްލަޙަތު މާމުހިއްމު،" ކަމަށެވެ.
ހޮނިހިރު ދުވަހުގެ ރޭ ސައީދު މިހެން ވިދާޅުވީ، އައިޝަތު ނޫރައްދީން ބޯޑު މެމްބަރު ކަމުން ކުއްލި ގޮތަކަށް ވަކި ކުރި ޚަބަރާ އެކު އެކަމަށް ފާޑުވިދާޅުވެ ކުރީގެ އިކޮނޮމިކް މިނިސްޓަރ އަދި އެމްޑީޕީގެ ޗެއަރޕާސަން ފައްޔާޒް އިސްމާއީލް އެކްސް ގައި ހޮނިހިރު ދުވަހު ކުރެއްވި ޕޯސްޓަކަށް ރައްދު ދެއްވަމުންނެވެ.
ފައްޔާޒް ވިދާޅުވީ، ރާއްޖޭގެ މާލީ ނިޒާމުގެ ސަލާމަތާއި ރައްކާތެރިކަމަށްޓަކައި، ސަރުކާރުން ބޭންކް އޮފް މޯލްޑިވްސްއަށް ނުފޫޒު ފޯރުވުން ވަގުތުން ހުއްޓާލަންޖެހޭ ކަމަށެވެ.
"ޚާއްޞަކޮށް ޤައުމު އިޤްތިޞާދީ ހީނަރުކަމެއްގެ ތެރެއަށް ވަދެފައިވާ ދަނޑިވަޅެއްގައި، އާއިޝަތު ނޫރުދީން ފަދަ ތަޖުރިބާކާރު ބޭންކަރެއް ބޭންކުގެ ބޯޑުން ވަކިކުރުމަކީ ބުއްދި ސަލާމަތުން ކުރެވޭނެ ކަމެއް ނޫނެވެ،" ފައްޔާޒް ވިދާޅުވިއެވެ.
ފައްޔާޒްގެ މި ވާހަކަ އަށް ރައްދު ދެއްވަމުން ރައީސް ޔާމީންގެ ވެރިކަމުގައިވެސް އިކޮނޮމިކް މިނިސްޓަރުކަން ކުރެއްވި ސައީދު ވިދާޅުވީ، 100 އަހަރާއި ނުބައްދަލު ދަރަނި ނަގައި، އަޑި ނޭނގޭ ފުންމިނަށް އިޤްތިޞާދު ވައްޓައިލި 5 އަހަރުގެ މިނިސްޓަރު މިވާހަކަ ދެއްކުން ލަދުވެތި ކަމަށެވެ.
"މުޅިނިޒާމް އެފުށް މިފުށަށް ޖަހައި، ގައުމުގެ މާލިއްޔަތު އަނދަވަޅަކަށް ވައްޓައިލީ އެމްޑީޕީން،" ސައީދު ވިދާޅުވިއެވެ.
ބޭންކިންގ ދާއިރާގައި ރާއްޖޭގެ އެންމެ ތަޖުރިބާކާރު އެއް ފަރާތް ކަމަށްވާ އައިޝަތު ނޫރައްދީން ބީއެމްއެލްގެ ބޯޑުން ވަކި ކުރިކަން އޭނާ އަށް އަންގާފައިވަނީ ސަރުކާރުގެ ކުންފުނިތައް ބަލަހައްޓާ، ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ)ން ސަރުކާރު ބަންދު ދުވަހެއް ކަމަށްވާ ހޮނިހިރު ދުވަހު ފޮނުވި ސިޓީ އަކުންނެވެ.
ރައީސް ސާލިހް ސަރުކާރުގެ އިކޮނޮމިކް މިނިސްޓަރ ފައްޔާޒު އިސްމާއީލް ވިދާޅުވީ، ބީއެމްއެލްއަކީ ނިޒާމީ ބޭންކަކަށްވެފައި، އިޤްތިޞާދުގެ މުހިންމު ބައެއްކަމުން، ބޭންކަށް މިނިވަންކަމާއެކު މަސައްކަތްކުރެވޭގޮތް ވުމަކީ މުހިންމު ކަމެއް ކަމަށެވެ.
ފައްޔާޒުގެ ޕޯސްޓްގައި ރާއްޖޭގައި ހުރި ހަމަ އެކަނި ކޮރަސްޕޮންޑަންޓް ބޭންކު - ބީއެމްއެލް އަށް ސަރުކާރުގެ ނުފޫޒް ފޯރާ ނަމަ އެކަމުގެ ސަބަބުން ބައިނަލްއަޤްވާމީ މުޖުތަމަޢުގެ ތެރޭގައި ރާއްޖޭގެ މާލީ ނިޒާމާމެދު ނޭދެވޭ ނަޒަރަކުން ބެލުމަށް މަގުފަހިވާނެކަން ކަށަވަރު ކަމަށް ވިދާޅުވިއެވެ.
ޕީސީބީ އިން ކުއްލި ގޮތަކަށް ބީއެމްއެލްގެ ބޯޑު މެމްބަރު ކަމުން އައިޝަތު ނޫރައްދީން ވަކި ކުރި ގޮތާ ބެހޭ ގޮތުން ވެސް ވަނީ ސުވާލު އުފެދިފައެވެ. ބީއެމްއެލްގެ ޗާޓަރު ބުނާ ގޮތުން އެ ބޭންކަކީ އާންމު ރައްޔިތުން ވެސް ހިއްސާވާ ކުންފުންޏަކަށް ވާތީ އެ ބޭންކުގެ ބޯޑް ޑިރެކްޓަރުން ވަކިކުރެވެނީ ހިއްސާދާރުންގެ އާންމު ޖަލްސާއަކުންނެވެ.
މީގެ ކުރިން މިއަހަރުގެ ޖެނުއަރީ މަހުވެސް ކުއްލި ގޮތަކަށް ޕީސީބީން ބީއެމްއެލްގެ ފަސް ޑިރެކްޓަރުން މަގާމުން ވަކިކުރިއެވެ. އެހެން ނަމަވެސް އެ ގޯސް ފަހުން ރަނގަޅުކޮށް އެފަރާތްތަކަށް މަގާމު ދީ އަނެއްކާ ބީއެމްއެލްގެ ހިއްސާދާރުންގެ އާންމު ޖަލްސާ އެއް ބާއްވާ އެ ބޭފުޅުން މަގާމުން ވަކި ކުރިއެވެ.
