ޗެލްސީ އަށް ކުޅެމުން އަންނަ ބެލްޖިއަމްގެ ރޮމެލޫ ލުކާކޫ ނަޕޯލީ އަށް ބަދަލުވާން އެއްބަސްވެއްޖެ އެވެ.

އުމުރުން 31 އަހަރުގެ ކުޅުންތެރިޔާ ޗެލްސީ އަށް ބަދަލުވީ 2021 ވަނަ އަހަރު އެވެ. އޭގެ ފަހުން އޭނާ ވަނީ ލޯނު އެއްބަސްވުމެއްގެ ދަށުން އިންޓަ މިލާން އަދި ރޯމާ އަށް ކުޅެފަ އެވެ. އެންމެ ފަހުން ލުކާކޫ ކުޅުނީ ރޯމާ އަށެވެ.

ލުކާކޫ ހޯދުމުގެ ޝައުޤުވެރިކަން ނަޕޯލީން ގެންގުޅުނުއިރު، އެ ކުލަބުން ވަނީ އެކަމާ ގުޅުން ހުރި މަޝްވަރާތައް ވެސް ކުރިއަށް ގެންގޮސްފަ އެވެ. އޭނާ ހޯދުމަށް ނަޕޯލީން ޗެލްސީ އާއެކު ކުރިއަށް ގެންދިޔަ މަޝްވަރާތަކުގައި، ދެ ކުލަބަށް މިހާރު ވަނީ އެއްބަސްވުމަކަށް އާދެވިފަ އެވެ. ލުކާކޫ ހޯދުމަށް ނަޕޯލީން ޗެލްސީ އަށް 30 މިލިއަން ޔޫރޯ އާއެކު، ޖުމުލަ 45 މިލިއަން ޔޫރޯ ދައްކާނެ ކަމަށް ރިޕޯޓުތައް ބުނެ އެވެ.

މީޑިއާ ތަކުގައި ބުނެފައިވާ ގޮތުން ނަޕޯލީ އާއެކު ލުކާކޫ ސޮއި ކުރާނީ ތިން އަހަރު ދުވަހުގެ އެއްބަސްވުމެއްގަ އެވެ. އެހެންކަމުން އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ. ނަޕޯލީ ވެގެން ދާނީ ލުކާކޫގެ ސީނިއާ ކެރިއަރުގައި އޭނާ ކުޅޭނެ 10 ވަނަ ކުލަބަށެވެ.

ލުކާކޫ ވަނީ ޗެލްސީ އަށް ކުޅެދިން 44 މެޗުން 15 ލަނޑު ޖަހައިފަ އެވެ. އޭގެ ފަހުން ލޯނު އެއްބަސްވުމެއްގެ ދަށުން އިންޓަ އަށް ކުޅެދިން 37 މެޗުގައި 14 ލަނޑު ޖެހިއިރު، ރޯމާ އަށް ކުޅެދިން 47 މެޗުގައި ވަނީ 21 ލަނޑު ޖަހައިފަ އެވެ.