ޔަމަނުގެ ޙޫތީ ހަނގުރާމަވެރިން ރަތްކަނޑުގައި އޮތް ގްރީކް ދިދަ ނެގި ތެޔޮ ޓޭންކަރެއް ގޮއްވާލާ މަންޒަރު އާންމުކޮށްފިއެވެ.
މަންޒަރު ފެންނަ ގޮތުން ބާރުގަދަ ގޮވުންތަކާއެކު މުޅި ޓޭންކަރުގައި ރޯވެ ގަދަޔަށް އަނދަމުން ދެއެވެ.
ޓޭންކަރުގައި 150.000 ޓަނުގެ ސާފު ނުކުރާ ތެޔޮ ހުރި ކަމަށް ރިޕޯޓްތައް ބުނެއެވެ. ޓޭންކަރު ރޯވެ އަދަމުންދާއިރު އޭގެ ސަބަބުން ސަރަހައްދަށް ތެޔޮތައް ފެތުރި ތިމާވެށީގެ ކާރިސާ އެއް ކުރިމަތިވުމުގެ ބިރު ވަނީ އުފެދިފައެވެ.
ހޫތިން ކުރިން ރިޕޯޓް ކޮށްފައިވާ ގޮތުގައި އެމީހުންގެ މިސައިލް ހަމަލާ ޓޭންކަރަށް ދިނީ ޔަމަންގެ ހުދައިދާ ބަނދަރާ ދިމާ ބޭރުން މިދިޔަ ބުދަ ދުވަހުއެވެ. ހޫތިން ބުނެފައިވަނީ އެތައް މިސައިލެއް ޓޭންކަރަށް ފޮނުވާލި ކަމަށާއި ޓާގެޓަށް ހަމަލާ ވާސިލްވި ކަމަށާއި ހަމަލާ ކާމިޔާބުވި ކަމަށެވެ. މި ޚަބަރު ހޫތީންގެ އަސްކަރީ ތަރުޖަމާނު ޔަހްޔާ ސާރީ ހާމަ ކުރިއިރު ހަމަލާގެ މަންޒަރު އާންމުކޮށްފައެއް ނުވެއެވެ.
ހަމަލާގެ ސަބަބުން ޓޭންކަރުގެ އިންޖީނުގެ ބާރު ކެނޑިފައިވާ ކަމަށާއި، ޔޫރަޕިއަން ޔޫނިއަންގެ އަސްކަރީ އުޅަނދަކުން ޓޭންކަރުގައި ތިބި 23 ފިލިޕީންސް ފަޅުވެރިންނާއި 2 ރަޝިއާ މީހުން ސަލާމަތްކޮށްގެން ގެންގޮސްފައިވާ ކަމަށް ޚަބަރުތައް ބުނެއެވެ.
ޙޫތީންގެ އަސްކަރީ ތަރުޖަމާނު ޔަޙްޔާ ސާރީ ބުނި ގޮތުގައި މި އުޅަނދަށް ހަމަލާދީފައިވަނީ އެއުޅަނދަކީ އިޒްރޭލާ ގުޅުން ހުރި ކުންފުންޏެއްގެ އުޅަނދަކަށް ވެފައި، އިޒްރޭލުން ހިފައިފައިވާ ފަލަސްތީނުގެ ސަރަހައްދުތަކުގެ ބަނަދަރުތަކަށް އެއްވެސް ބޯޓެއް ދަތުރުކުރުން ހޫތީން މަނާ ކޮށްފައި އޮތް އޮތުމާ އެ ބޯޓުން ޚިލާފް ވުމުން ކަމުގައެވެ.
ޔަމަނުގެ ހޫތީ ހަނގުރާމަވެރިން ވަނީ ޣައްޒާގައި އިޒްރޭލުން ކުރަމުންދާ ހަނގުރާމައާ ގުޅިގެން ފަލަސްތީނުގެ ރައްޔިތުންނާ އެއްބައިވުމުގެ ގޮތުން ރަތްކަނޑާއި އަދަން ކަނޑުގައި ދަތުރުކުރާ އިޒްރޭލާ ގުޅުން ހުރި އުޅަނދުފަހަރަށް ހަމަލާދޭނެ ކަމަށް އިއުލާނުކޮށްފައެވެ.
