ކާބޯތަކެތީގެ ރައްކާތެރިކަން ކަށަވަރު ކުރުމުގައި މުޅިންވެސް އިހުމާލު، އެކަމަކު މިނިސްޓަރަށް ގޯސްވީ ގާނޫނު
23 އޯގަސްޓު 2024 | ހުކުރު 11:15އިމިގްރޭޝަނުން ދަނީ ގަވައިދާ ހިލާފަށް އުޅޭ ބިދޭސީންނާ، ބިދޭސީން ހިންގާ ގިނަ ފެކްޓްރީތަކާއި، ވިޔަފާރިތައް ހޯދަމުންނެވެ. ކާބޯތަކެތި ތައްޔާރުކުރާ ފެކްޓްރީތަކާއި، ކެފޭ، ރެސްޓޯރެންޓްތަކުގެ ފޮޓޯތަކާއި ވީޑިއޯތައް ސޯޝަލް މީޑިއާގައި އާއްމުވަމުންދާއިރު، މިތަންތަނުގެ ނުސާފުކަމާއި، މުޑުދާރުކަން ފެނި މުޅި ގައުމު މިވަނީ ސިހިގެން ގޮސްފައެވެ. އަދި ކާބޯތަކެތި ރައްކާތެރިކަމުގެ ބިލަށް އަމަލުކުރަން ފެށުމާއެކު ވެސް ގާނޫނު ތަންފީޒު ކުރެވޭނެ ކަމާމެދު ގިނަ ބަޔަކު ދަނީ ސުވާލު އުފައްދަމުންނެވެ.
އިމިގްރޭޝަނުން އަތުލައިގަތް ބިދޭސީންނާއި، ބިދޭސީން ހިންގަމުންދިޔަ ބައެއް ފެކްޓްރީތައް
މުޅި ރާއްޖެއަށް ދިމާވެފައިވާ އެންމެ ބޮޑު އެއް ބިދޭސީންގެ މައްސަލައަކީ ބިދޭސީންގެ މައްސަލައެވެ. ފާއިތުވި 10 އަހަރުގެ ތެރޭގައި މިމައްސަލަ ހައްލު ކުރުމަށް ސަރުކާރުތަކުން މަސައްކަތް ކުރި ނަމަވެސް އެކަށީގެންވާ ހައްލެއް ލިބިފައިނުވެއެވެ. ގަވާއިދާ ހިލާފަށް އުޅޭ ބިދޭސީން އިންތިހާއަށް އިތުރުވެ، ވިޔަފާރިތަކުގެ ބާރު ދިވެހިންގެ އަތުން ގެއްލިފައި އޮންނަތާ އެތައް ދުވަހެއް ވަނީ ވެފައެވެ.
ގިނަ ރައްޔިތުންގެ މިކަންބޮޑުވުމަށް ހައްލެއް ހޯދުމަށް ފެށި މަސައްކަތާއެކު އިމިގްރޭޝަނުން ދަނީ ގަވާއިދާ ހިލާފަށް އުޅޭ ބިދޭސީންނާ، ބިދޭސީން ހިންގާ ގިނަ ފެކްޓްރީތަކާއި، ވިޔަފާރިތައް ހޯދަމުންނެވެ. ކާބޯތަކެތި ތައްޔާރުކުރާ ފެކްޓްރީތަކާއި، ކެފޭ/ރެސްޓޯރެންޓްތަކުގެ ފޮޓޯތަކާއި ވީޑިއޯތައް ސޯޝަލް މީޑިއާގައި އާއްމުވަމުންދާއިރު، މިތަންތަނުގެ ނުސާފުކަމާއި، މުޑުދާރުކަން ފެނި މުޅި ގައުމު މިވަނީ ސިހިގެން ގޮސްފައެވެ. ގިނަ މައްސަލަތައް ފެންމަތިވެ ގިނަ ބައެއްގެ ފާޑުކިޔުން މިވަނީ ހެލްތް މިނިސްޓްރީއަށާއި، މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އަށް އަމާޒުވެފައެވެ.
އެއާއެކު ބުރާސްފަތި ދުވަހު ހެލްތް މިނިސްޓަރު އަބްދުﷲ ހަލީލު ވަނީ ނޫސްވެރިންނާ ބައްދަލުކުރައްވައި، މިމައްސަލަތައް ސަމާލު ކަމަށް އައިސްފައިވާ ކަމަށް ވިދާޅުވެ ވާހަކަދައްކަވާފައެވެ. މައިގަނޑު ގޮތެއްގައި މިނިސްޓަރު ހަލީލު ކުށްވެރި ކުރެއްވީ ގާނޫނެވެ. ގާނޫނުން އެމްއެފްޑީއޭ ބާރު ނެތްކަން މިނިސްޓަރު ފާހަގަކުރެއްވިއެވެ. ނަމަވެސް ކާބޯތަކެތީގެ ރައްކާތެރިކަން ކަށަވަރު ކުރުމަކީ އެމްއެފްޑީއޭގެ ޒިންމާއެކެވެ. ފިހާރަތަކުގައި ވިއްކަން ހުންނަ ކާބޯތަކެތީގެ ރައްކާތެރިކަން ކަށަވަރުކޮށް، މޮނިޓަރ ކުރަންޖެހެއެވެ.
މީގެ އިތުރުން މިނިސްޓަރު ހަލީލު ވިދާޅުވެފައިވަނީ ކާބޯތަކެތި ރައްކާތެރިކަމުގެ ބިލަށް މިމަހުގެ 24 ވަނަ ދުވަހުން ފެށިގެން އަމަލުކުރަން ފެށުމާއެކު މިމައްސަލައަށް ބޮޑު ހައްލެއް ލިބޭނެ ކަމަށެވެ. މި ގާނޫނަކީ ދިވެހިރާއްޖޭގައި އުފައްދާ އަދި ބޭނުންކުރާ ކާބޯތަކެއްޗާއި، ދިވެހިރާއްޖެއަށް އިމްޕޯޓުކުރާ އަދި ދިވެހިރާއްޖެއިން އެކްސްޕޯޓުކުރާ ކާބޯތަކެއްޗަކީ ރައްކާތެރި ކާބޯތަކެތިކަން ކަށަވަރުކުރުމަށް ބާރު އަޅައި ގާނޫނެކެވެ.
މި ގާނޫނުން އެމްއެފްޑީއޭއަށް ބޮޑެތި ބާރުތަކެއް ލިބިގެންދިޔަ ނަމަވެސް މިގާނޫނާ އެއްގޮތަށް އެއިދާރާއިން ތަންފީޒު ކުރެވޭނެ ކަމާމެދު ސުވާލު އުފެދެއެވެ. މިގާނޫނުގެ ކުރިން ވެސް ވިޔަފާރި އުސޫލުން ކާބޯތަކެތި އުފައްދައި ވިއްކަން ޖެހޭނެ ގޮތް ސާފުކޮށް ގާނޫނުގައި ލިޔެފައިވެއެވެ. ގަވާއިދުތަކާއި އުސޫލުތައް ކަނޑައަޅާފައިވެއެވެ. ނަމަވެސް އެކަންކަން ތަންފީޒު ކުރެވިފައިނުވެއެވެ. ބަލައި ފިޔަވަޅު އަޅާފައިނުވެއެވެ. އެމްއެފްޑީއޭއިން ވެސް ދޭތެރެއަކުން އިންސްޕެކްޝަން ކުރިއަށް ގެންދާކަން ހާމަކުރި ނަމަވެސް އޭގެ ތަފްސީލެއް ހާމައެއް ނުކުރެއެވެ. މީގެ އިތުރުން ރާއްޖޭގެ އެކި ފިހާރަތާކައި، ކެފޭ/ރެސްޓޯރެންޓްތަކުގެ މައްސަލަތައް ރިޕޯޓު ކުރިނަމަވެސް ފިޔަވަޅެއް އަޅާފައިނުވާ މައްސަލަ ގިނަ ބަޔަކު ފާހަގަކޮށްފައިވެއެވެ. އަދި ރިސޯޓުތަކުން ބޭނުންކުރާ ތެޔޮ އަނބުރާ މާލެ ގެނެސް ކެފޭތަކުގައި ބޭނުންކުރާ މައްސަލާގައި ވެސް އެއިދާރާގެ ބަހެއް ނެތެވެ.
އިމިގްރޭޝަނުން ކުރިއަށް ގެންދާ އޮޕަރޭޝަންތަކާއެކު މިފަދަ ގިނަ މައްސަލަތައް ފެންމަތިވެގެން ދިއުމާއެކު، އެމްއެފްޑީއޭއަށް ހޭލަން މަޖުބޫރުވި ކަހަލައެވެ. ގިނަ ބައެއްގެ ފާޑުކިޔުން އަމާޒުވެފައިވަނިކޮށް ބުރާސްފަތި ދުވަހު ނޫސްވެރިންގެ ބައްދަލުވުމެއް ބާއްވާ ގާނޫނު ގޯސްކުރި ނަމަވެސް އެކަން ގިނަ ރައްޔިތުން ގަބޫލެއްނުކުރާނެއެވެ. އެމްއެފްޑީއޭ ފެއިލްވެފައިވާކަން މިވަނީ ހާމަވެފައެވެ. ދޭތެރެދޭތެރެއިން ރާއްޖެއަށް އެތެރެކުރާ ބޭސްތަކުގައި މައްސަލަތައް ދިމާވެ އެ ބޭނުން ކުރުމާއި، ވިއްކުން މަނާކޮށް ބަޔާނެއް ނެރުމަކީ ހަމައެކަނި ޒިންމާ އަދާ ކުރުމެއް ނޫނެވެ. މުޅި މުޖުތަމައު ނުރައްކަލަކަށް ހުށަހެޅޭ މިފަދަ މައްސަލަތަކުގައި މިއަށް ވުރެ ޒިންމާދާރު ކަމާއެކު، ކަމާގުޅޭ އިދާރާތަކުން ޖަވާބު ދާރީވެ، ޒިންމާ ނަގަން އެބަޖެހެއެވެ.
