ސްކޮޓުގައި މޮޑްރިޗް ހިމަނައި ޑަލިކް ބުނީ، އެއީ ކްރޮއޭޝިއާގެ ހިތްވަރު ކަމަށް

ޔުއެފާ ނޭޝަންސް ލީގުގައި ކްރޮއޭޝިއާ އިން އަންނަ މަހު ކުޅެން ހަމަޖެހިފައިވާ މެޗުތަކަށް އެކުލަވާލި ސްކޮޑުގައި ލޫކާ މޮޑްރިޗް ހިމަނައި، އޭނާ އަކީ އެ ޓީމުގެ ހިތްވަރު ކަމަށް ކޯޗު ލަޓްކޯ ޑަލިކް ބުނެފި އެވެ.

ޕޯޗުގަލް އާއި ޕޮލެންޑާ ދެކޮޅަށް އަންނަ މަހު ކްރޮއޭޝިއާ އިން ކުޅޭ މެޗަށް ކޯޗު ޑަލިކް ވަނީ 24 ކުޅުންތެރިންގެ ސްކޮޑެއް އެކުލަވާލައިފަ އެވެ. އެ ސްކޮޑުގައި އޭނާ ވަނީ ކެޕްޓަން މޮޑްރިޗް ވެސް ހިމަނައިފަ އެވެ. އުމުރުން މިހާރު 38 އަހަރުވެފައިވާ މޮޑްރިޗާ ގުޅޭ ގޮތުން ވާހަކަ ދައްކަމުން ޑަލިކް ބުނީ، ޔޫރޫ ފުޓުބޯޅަ މުބާރާތަށްފަހު މުހިންމު ދެ ކުޅުންތެރިން ޓީމުން ރިޓަޔާވާން ނިންމާފައިވާ ކަމަށެވެ. އެއީ މާސެލޯ ބްރޮޒޯވިޗް އަދި ޑޮމަގޯއި ވީޑާ އެވެ. އެހެން ނަމަވެސް ޓީމުގެ ކެޕްޓަން މޮޑްރިޗް، ޓީމުގައި ދެމި ހުރުމަކީ އުފާވާ ކަމެއް ކަމަށް އޭނާ ބުންޏެވެ.

ދަނޑު މަތީގައި ވެސް އަދި ދަނޑުން ބޭރުގައި ވެސް މޮޑްރިޗް އަކީ ކްރޮއޭޝިއާ އަށް ނުހަނު މުހިންމު ކުޅުންތެރިޔެއްކަން ފާހަގަކޮށް ޑަލިކް ބުނީ، މޮޑްރިޗް އަކީ އެ ޓީމުގެ ހިތްވަރު ކަމަށެވެ. ހަމައެހެންމެ ނޭޝަންސް ލީގާ އެކު، 2026 ވަނަ އަހަރުގެ ފީފާ ވޯލްޑް ކޮލިފިކޭޝަން އަށް ޓީމު ރަނގަޅަށް ތައްޔާރުވާނެ ކަމަށް ޤަބޫލު ކުރެވޭ ކަމަށް ވެސް އޭނާ ވަނީ ބުނެފަ އެވެ. ޤަތަރުގައި އެންމެ ފަހުން އޮތް ވޯލްޑް ކަޕްގައި ލޯ މެޑަލް ޙާސިލު ކުރި ޓީމުގައި މިހާރު ވެސް ރަނގަޅު އަދި މޮޅު ކުޅުންތެރިން ތިބި ކަމަށް އޭނާ ވަނީ ބުނެފަ އެވެ.

މޮޑްރިޗް އަންނަނީ 2006 ވަނަ އަހަރުން ފެށިގެން ކްރޮއޭޝިއާގެ ޤައުމީ ޓީމަށް ކުޅެމުންނެވެ. އޭނާ ވަނީ މިހާތަނަށް ޤައުމީ ޓީމަށް ކުޅެދިން 178 މެޗުގައި 26 ލަނޑު ޖަހައިފަ އެވެ. އޭނާ ވަނީ ކްރޮއޭޝިއާ އާއެކު 2018 ވަނަ އަހަރުގެ ވޯލްޑް ކަޕްގެ ފައިނަލްގައި ކުޅެފަ އެވެ. 2022 ވަނަ އަހަރުގެ ވޯލްޑް ކަޕްގެ ލޯ މެޑަލް ހޯދިއިރު، ޔުއެފާ ނޭޝަންސް ލީގުގެ ފައިނަލްގައި ވެސް ވަނީ ކުޅެފަ އެވެ.