ސެވިއްޔާ އަށް ކުޅެމުން އައި އާޖެންޓީނާގެ ޑިފެންޑަރު މާކޮސް އަކުނާ، އެ ކުލަބު ދޫކޮށް އާޖެންޓީނާގެ ރިވާ ޕްލޭޓަށް ބަދަލުވެއްޖެ އެވެ.

އުމުރުން 32 އަހަރުގެ ކުޅުންތެރިޔާ ސެވިއްޔާ އަށް ބަދަލުވީ 2020 ވަނަ އަހަރު އެވެ. އެ ކުލަބާ އެކު އޭނާ ސޮއި ކުރީ ހަތަރު އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު މިއަހަރަށް ވަނީ ހަމަވެފަ އެވެ. އެއާއެކު އަކުނާ ވަނީ ރިވާ ޕްލޭޓަށް ބަދަލުވެފަ އެވެ.

ރިވާ ޕްލޭޓުގެ އެއްބަސްވުމުގައި އަކުނާ ސޮއި ކޮށްފައިވާއިރު، އެ ކުލަބުން ވަނީ ރަސްމީކޮށް އެކަން އިއުލާން ވެސް ކޮށްފަ އެވެ. ރިވާ ޕްލޭޓާ އެކު އަކުނާ ސޮއި ކޮށްފައި ވަނީ ތިން އަހަރު ދުވަހުގެ އެއްބަސްވުމެއްގަ އެވެ. އެހެންކަމުން 2027 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަބުގައި ހުންނާނެ އެވެ. މިއީ އަކުނާގެ ސީނިއާ ކެރިއަރުގައި އޭނާ ކުޅޭ ފަސް ވަނަ ކުލަބެވެ.

އަކުނާ ވަނީ ސެވިއްޔާ އަށް ކުޅެދިން 149 މެޗުގައި އެއް ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ ޔުއެފާ ޔޫރޮޕާ ލީގު ކާމިޔާބު ކޮށްފަ އެވެ. އަނެއްކޮޅުން އަކުނާ އަކީ އާޖެންޓީނާ ޤައުމީ ޓީމަށް ވެސް ކުޅެމުން އަންނަ ކުޅުންތެރިޔެކެވެ. ޤައުމީ ޓީމުން އޭނާ އަށް ޖާގަ ލިބުނީ 2016 ވަނަ އަހަރު އެވެ. އޭނާ ވަނީ މިހާތަނަށް އާޖެންޓީނާ ޤައުމީ ޓީމަށް 59 މެޗު ކުޅެދީފަ އެވެ. އާޖެންޓީނާ އާއެކު އޭނާ ވަނީ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ) ދެ އަހަރު ކާމިޔާބު ކުރުމުގެ އިތުރުން ފީފާ ވޯލްޑް ކަޕް އަދި ފައިނަލިސިމާ ކާމިޔާބު ކޮށްފަ އެވެ.