ނައިބު ރައީސް ނާޒިމް ދަނީ މެންބަރުންގެ އިމްތިޔާޒްތަކަށް އަރައިގަންނަމުން: މެންބަރު އަހުމަދު ދީދީ
28 އެޕްރީލު 2025 | ހޯމަ 08:43މެންބަރުން ކުރައްވާ ސުވާލަކީ ރަނގަޅު ސުވާލެއްތޯ ބައްލަވަން ރިޔާސަތަށް ޖެހިވަޑައިނުގަންނާނެ
ނޫސްވެރިންގެ ބައްދަލުވުމެއްގައި ރައްޔިތުން މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވާހަކަދައްކަވަނީ
ރައްޔިތުން މަޖިލީހުގެ މެމްބަރުންނަށް ލިބިދޭ އިމްތިއާޒު ހަނިކުރަން ރިޔާސަތުން މަސައްކަތް ކުރައްވާ ކަމަށް ރައްޔިތުން މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެއެވެ.
ހޯމަ ދުވަހު ކުރިއަށް ގެންދިޔަ ރައްޔިތުން މަޖިލީހުގެ ރިޔާސަތުގައި ބެލެހެއްޓެވީ މަޖިލީހުގެ ނައިބު ރައީސް، ދިއްގަރު ދާއިރާގެ މެމްބަރު އަދި މަޖިލީހުގެ ނައިބު ރައީސް އަހުމަދު ނާޒިމް އެވެ. ހެނދުނު ދަންފަޅީގައި ކުރިއަށް ގެންދިޔައީ ހައުސިން އަދި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ސުވާލު ކުރުމެވެ. ނަމަވެސް މިނިސްޓަރު މުއްތަލިބާ ސުވާލު ކުރުމަށް، ނާޒިމް ފުރުސަތު ނުދެއްވާތީ ގިނަ މެމްބަރުން ކަންބޮޑުވުން ފާޅުކޮށްފައިވެއެވެ.
މި މައްސަލައަަށް އިޝާރާތް ކުރައްވައި، މެންބަރު އަހުމަދު ދީދީ ވިދާޅުވީ މަޖިލީހުގެ ރިޔާސަތުގައި ހުންނެވި ނާޒިމް މެންބަރުންނަށް ލިބިދޭ އިމްތިއާޒު ހަނިކުރަން މަސައްކަތް ކުރާ ކަމަށާއި، މެންބަރުން ކުރައްވާ ސުވާލަކީ ރަނގަޅު ސުވާލެއްތޯ ބައްލަވަން ރިޔާސަތުން ޖެހިވަޑައިނުގަންނާނެ ކަމަށެވެ. އަދި މެންބަރު އަހުމަދު ދީދީ ވިދާޅުވީ މިނިސްޓަރާއި ގުޅުންހުރި ސުވާލެއްނަމަ އެ ފުރުސަތު ދޭން ޖެހޭ ކަމަށެވެ.
މީގެ އިތުރުން މެންބަރު އަހުމަދު ދީދީ ވަނީ އައްޑޫ ލިންކް ރޯޑުގެ މަސައްކަތާ ގުޅޭ ގޮތުން ސުވާލު ކުރައްވާފައެވެ. އަދި އައްޑޫ ލިންކް ރޯޑަކީ އައްޑޫ މުދަލަށާއި ފުރާނައަށް ގެއްލުންވާ ތަނަކަށް ވާތީ އެކަން ކުރެވޭނީ ކޮންދުވަހަކުން ތޯ ސުވާލުކުރެއްވިއެވެ.
މަނިކުފާނު ރައްޔިތުންގެ މަޖިލީހުގެ މެންބަރުންނަށް ލިބިދޭ އިމްތިޔާޒު ހަނިކުރުމަށް މަސައްކަތް ކުރައްވާތަން އަޅުގަނޑުމެންނަށް މިފެންނަނީ. މަނިކުފާނު ނުޖެހޭނެ ކޮންމެހެން އަޅުގަނޑުމެންކުރާ ސުވާލަކީ އެއީ ރަނގަޅު ސުވާލެއް ތޯ ބަލާކަށް. ވަޒީރާ ގުޅުންހުރި ކަމެއް ވިއްޔާ ވަޒީރު އެއަށް ޖަވާބު ދިނީމަ ނިމުނީ. މަނިކުފާނު އަޅުގަނޑުމެން ހުއްޓުވާކަށް ނުޖެހޭނެ މިތާގައި. މަނިކުފާނު އަޅުގަނޑުމެންގެ އިމްތިޔާޒަށް އަރާ ގަންނަ މައްސަލަ އެއީ ވަރަށް ބޮޑު މައްސަލައެއް. އަޅުގަނޑު އެކަން ކުއްވެރި ކުރަން، މިވަޒީރަކީ އަޅުގަނޑުމެންނަށް ދޮގާއި މަކަރާއި ހީލަތް ހައްދަވާފައިވާ ވަޒީރެއް. އަޅުގަނޑުމެން އައްޑޫ ލިންކް ރޯޑަކީ ރައްޔިތުންގެ އަގުބޮޑު މުދަލަށާއި، ފުރާނައަށް ގެއްލުން ވަރަށް ހަލާކުވެފައި ހުރި ތަނެއް އެކަން ކުރެވޭނީ ކޮންއިރުަކުންތޯ ސުވާލުކުރިން.ރައްޔިތުން މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ
މެންބަރު އަހުމަދު ދީދީ ވާހަކަ ދައްކަވަމުން ގެންދަވަނިކޮށް، މައިކުގެ އަޑު ވަނީ ކަނޑާލާފައެވެ.
މެންބަރު އަހުމަދު ދީދީގެ އިތުރުން ގިނަ މެންބަރުން ވަނީ ގިނަ ރަށްރަށުގެ ފެނާއި ނަރުދަމާގެ މަޝްރޫއުތައް ކުރިއަށް ނުދާ ކަމަށާއި، ކުރިއަށް ދާ މަޝްރޫއުތަކުގެ މަސައްކަތްތައް ވެސް ވަރަށް ލަސް ކަން ފާހަގަކުރައްވާފައެވެ. މަޖިލީހުގެ އެޖެންޑާގައި އޮތީ ނ. ޅޮހީގެ ފެނާއި ނަރުދަމާގެ މަސައްކަތާއި ގުޅިގެން ވެލިދޫ ދާއިރާގެ މެމްބަރު މުހައްމަދު އައްބާސް ކުރެއްވި ސުވާލާއި އަދި މިނިސްޓަރު ދެއްވާ ޖަވާބާއި ގުޅިގެން އަންނަ ސުވާލުތަކަށް ޖަވާބު ދިނުން ކަމަށްވާތީ، ގިނަ މެންބަރުން ކުރެއްވި ސުވާލަށް މިނިސްޓަރު މުއްތަލިބު ވަނީ މައުޟޫއިން ބޭރު ސުވާލުތަކެއްކަން ފާހަގަކޮށް ޖަވާބު ނުދެއްވާ ދޫކޮށްލައްވާފައެވެ.
