ޗެމްޕިއަން ރެއާލް މެޑްރިޑްގެ ފެށުން ޕޮއިންޓަކުން

ސްޕެއިންގެ ޗެމްޕިއަން ރެއާލް މެޑްރިޑްގެ އާ ސީޒަންގެ ލީގު ފެށުން ޕޮއިންޓަކުން ފުއްދާލަން ޖެހިއްޖެ އެވެ.

ކީލިއަން އެމްބާޕޭއާ އެކު ނިކުމެ ރެއާލް މެޑްރިޑް އެއްވަރުވީ ލީގުގެ އާދައިގެ ޓީމެއް ކަމަށްވާ މަޔޯކާއާ ވާދަކޮށެވެ. މެޗު އެއްވަރުވީ 1-1 ނެވެ. މެޗުން ނުވެވި ކޯޗު އެންޗެލޮޓީ މާޔޫސް ކޮށްލީ ފުރަތަމަ ލީޑްވެސް ނަގާފައި ވަނިކޮށެވެ. ރެއާލްއަށް ކުރި ހޯދައިދިނީ ފުރަތަމަ ހާފްގައި ބްރެޒިލްގެ ރޮޑްރީގޯ އެވެ. އޭނާ ލަނޑު ޖެހީ 13 ވަނަ މިނިޓްގައި ވިނީޝިއުސް ޖޫނިއަރ ތަނަވަސްކޮށްދިން ފުރުޞަތަކުންނެވެ. މަޔޯކާއިން ނަތީޖާ ހަމަހަމަ ކުރީ ދެވަނަ ހާފްގެ ކުރީކޮޅު މުރިގީ ޖެހި ލަނޑުންނެވެ.

މެޗު ރެއާލްއިން ނިންމާލަން ޖެހުނީ 10 ކުޅުންތެރިންނާ އެކު އެވެ. އެއީ މެޗުގެ އިތުރު ވަގުތުގައި ޑިފެންޑަރ ފާލަންޑް މެންޑީ އަށް ރަތްކާޑް ދެއްކުމުނެވެ. އޭނާއަށް ސީދާ ރަތްކާޑެއް ދެއްކީ މަޔޯކާއަށް ނަތީޖާ ހަމަހަމަ ކޮށްދިން މުރިގީއަށް ކުރި ފައުލަކަށެވެ. ރެއާލް އިން މެޗަށް ނެރުނީ ސުޕަރ ކަޕަށްވެސް ނެރުނު އެގާރަ އެވެ. އެމްބާޕޭއަށް ލަނޑު ޖަހަން ފުރުޞަތު ލިބުނު ނަމަވެސް ބޭނުން ނުކުރެވުނެވެ. މިއީ ފްރާންސުން ބޭރު ލީގެއްގައި އޭނާ ކުޅުނު ފުރަތަމަ މެޗެވެ.