އައްޑޫ އާއި މެދު މި ސަރުކާރުގެ އެއްވެސް ތަސައްވުރެއް ނެތް - ދީދީ
ބިން ހިއްކުމުގެ މަޝްރޫއުގެ ދަށުން، 80 މިލިއަން ޑޮލަރު ހޭދަކޮށްގެން 184 ހެކްޓަރުގެ ބިން ވަނީ ހިއްކާފަ
އައްޑޫ ޑިވެލޮޕްމެންޓް ޕްރޮޖެކްޓްގެ ދަށުން އައްޑޫސިޓީގައި މިހާރު އަޅަމުންދާ ޑީޓުއަރ ބްރިޖް
އައްޑޫ އާއި މެދު މި ސަރުކާރުގެ އެއްވެސް ތަސައްވުރެއް ނެތް ކަމަށް މަޖިލީހުގެ މަރަދޫ ދާއިރާގެ މެމްބަރު އަހުމަދު ދީދީ ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ. އޭނާ ވިދާޅުވީ ރައީސް އިބްރާޙިމް މުހައްމަދު ޞާލިހުގެ ސަރުކާރުން އައްޑޫގެ ރައްޔިތުންނަށް އިސްކަން ދިން ކަމަށެވެ. އޭރު ކަންކަން ކުރަމުން އައީ ވަރަށް ރަނގަޅު ޕްލޭނެއްގެ ދަށުން ކަމަށް އޭނާ ވިދާޅުވިއެވެ. ދުރު ރާސްތާގައި އައްޑޫ އަށް ފައިދާވާނެ ކަންކަން ކޮށްދިނުމަށް ކުރީގެ ރައީސް ޞާލިހު އިސްކަން ދެއްވާފައިވާ ކަމަށް ދީދީ ވިދާޅުވިއެވެ. ދީދީ ވަނީ އައްޑޫގައި ހިންގާފައިވާ ކަންކަމުގެ ކްރެޑިޓް ނެގުމަށް މި ސަރުކާރުން މަސައްކަތް ކުރާ ކަަމަށް އޭނާ ވިދާޅުވިއެވެ. އިންޑިއާ ސަރުކާރުގެ އެހީގައި އައްޑޫ ސިޓީގައި ކުރިއަށް ގެންދިޔަ ބިން ހިއްކުމުގެ މަޝްރޫއުގެ ދަށުން، 80 މިލިއަން ޑޮލަރު ހޭދަކޮށްގެން 184 ހެކްޓަރުގެ ބިން ވަނީ ހިއްކާފައެވެ. ފާއިތުވި މަދު އަހަރުތަކުގެ ތެރޭގައި އިންޑިއާއިން އައްޑޫގައި 220 މިލިއަން އެމެރިކާ ޑޮލަރު އިންވެސްޓު ކޮށްފައިވެއެވެ. ދީދީ ވަނީ އައްޑޫގެ ބިން ހިއްކުމުގެ މަޝްރޫއަކީ އެ ސިޓީގެ ފަތުރުވެރިކަން ތަރައްގީކުރުމަށާއި އައްޑޫގެ މުޅި އިގުތިސާދީ އަށް ކުރިއެރުން ލިބޭނެ ޕްރޮޖެކްޓެއް ކަމަށް ވިދާޅުވެފައެވެ. އައްޑޫ ޑިވެލޮޕްމެންޓް ޕްރޮޖެކްޓްގެ ދަށުން އައްޑޫސިޓީގައި މިހާރު އަޅަމުންދާ ޑީޓުއަރ ބްރިޖް އެއީ ނިމިިދިޔަ ސަރުކާރުގެ ވިސްނުމާއި ސިޔާސަތު ފެނިގެންދާ ކަމެއް ކަމަށް އޭނާ ވިދާޅުވިއެވެ.
އައްޑޫގައި އެއްވެސް ކަމެއް ނުކުރާ ކަމަށް ސަރުކާރުން ބުނާ އިރު އައްޑޫގައި ނިމިދިޔަ ސަރުކާރުން ހިންގީ ލޭންޑްމާކް ޕްރޮޖެކްޓްތަކެއް ކަމަށާއި، އެއީ އިޤްތިޞާދީ ވިސްނުމެއްގައި ކޮށްފައިވާ މަސައްކަތްތަކެއް ކަމަށް ދީދީ ވިދާޅުވިއެވެ. ހަންކެޑެ މަޝްރޫޢު ހަގީގަތަކަށް ހެދުމަށް ވެސް ނިމިދިޔަ ސަރުކާރުން މުހިންމު މަސައްކަތްތަކެއް ކުރި ކަމަށް އޭނާ ވިދާޅުވިއެވެ. މި ސަރުކާރުން ދަނީ ކުރީ ސަރުކާރުން ފެށި މަސައްކަތްތައް ހުއްޓުވަން ކަމަށް އޭނާ ވިދާޅުވިއެވެ. ސަރުކާރުން ދެކޭ ގޮތުގައި އަތޮޅުތެރޭގެ ތަރައްޤީ އަކީ ބޭކާރުކަމެއް ކަމަށް ވެސް ދީދީ ވިދާޅުވިއެވެ.
އައްޑޫ ސިޓީގައި ރައީސް އިބްރާހިމް މުހައްމަދު ސާލިޙް ގެ ސަރުކާރުން އިންޑިއާގެ އެހީގައި ހިންގި މުހިންމު ބޮޑެތި މަޝްރޫއުތަކުގެ ނިމުން ފާހަގަ ކޮށް ޑރ. މުއިއްޒު ގެ ސަރުކާރުން ވަނީ ދާދިފަހުން ރިބަން ކަނޑާފައެވެ.
މަޝްރޫއުތަކުގެ ނިމުން ފާހަގަ ކޮށްފައި ވަނީ އިންޑިއާގެ މިނިސްޓަރ އޮފް އެކްސްޓަރނަލް އެފެއަރޒް ޑރ. ސުބްރަމާނިއަމް ޖައިޝަންކަރު ޑރ. މުއިއްޒު ސަރުކާރުން ދެއްވި ދައުވަތެއްގައި ނިމިިދިޔަ ހަފްތާގެ ތެރޭގައި، އައްޑޫ ސިޓީގައި އާދިއްތަ ދުވަހު ބޭއްވި ޚާއްސަ ކުލަ ގަދަ ރަސްމިއްޔާތެއްގައެވެ. މުން ފާހަގަ ކުރެވުނު މަޝްރޫއުތަކަކީ އައްޑޫގެ ބިންހިއްކުމާ ގޮނޑުދޮށް ޙިމާޔަތްކުރުމުގެ މަޝްރޫޢު އާއި ހިތަދޫ އާއި މަރަދޫ ގުޅުވާލުމަށް ހަންކެޑެ ވަށައިގެން ހެދި 4 ލޭނުގެ ޑީޓުއަރ ލިންކް ރޯޑް މަޝްރޫއެވެ. މި މަގަކީ ހަންކެޑެ މަޝްރޫޢު ކާމިޔާބުކަމާއެކު ކުރިއަށް ގެންދިޔުމަށާއި، އައްޑޫ ސިޓީގެ އިޤްތިޞާދު އިތުރު ހަރުފަތަކަށް ގެންދިޔުމަށް އެމްޑީޕީ ސަރުކާރުން ފެށި މަސައްކަތުގެ ތެރެއިން މުހިއްމު ބައެއް ކަމަށް އެމްޑީޕީ އިން ވަނީ ބުނެފައެވެ.
މިއީ އައްޑޫ ސިޓީގެ ތަރައްޤީގެ މަޝްރޫޢުތަކުގެ ތެރެއިން އެމްޑީޕީ ސަރުކާރުން ހިންގި މުހިއްމު މަސައްކަތެއް ކަމަށްވެސް އެމްޑީޕީން ވަނީ ބުނެފައެވެ. މި ދެ މަޝްރޫޢަށް ފަންޑުކޮށްފައިވަނީ އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ރައީސް ސޯލިހްގެ ސަރުކާރުން ހޯދި 800 މިލިއަން ޑޮލަރުގެ އެހީގެ ދަށުންނެވެ.
