ފުރަތަމަ މެޗުގައި ވެސް ގޯލެއް، ޒިރްކްޒީގެ ހުވަފެން ކުލަވެއްޖެ
ޔުނައިޓެޑުން މި ސީޒަނަށް އޭނާ ގަތީ އިޓަލީގެ ބޮލީނިއާ އަށް 36 މިލިއަން ޕައުންޑް ދީފަ އެވެ.
ޒިރްކްޒީ ލަނޑުޖަހާފައި އުފާފާޅު ކުރާއިރު ރަޝްފޯޑް ފަހަތުގައި
މެންޗެސްޓާ ޔުނައިޓެޑަށް އަލަށް ގެނައި ފޯވަޑް ހޯޝުއާ ޒިރްކްޒީ އޭނާ ދެކެމުން އައި ހުވަފަން ކުލަކޮށްފި އެވެ.
އިނގިރޭސި ޕްރެމިއާ ލީގު ހުޅުވަން މިރޭ ފުލަމްއާ ދެކޮޅަށް ކުޅުނު މެޗުން ޔުނައިޓެޑް މޮޅުވީ ފަހުހާފުގައި ކުޅެން ނުކުމެ އޭނާ ޖަހައިދިން ހަމައެކަނި ލަނޑުންނެވެ. މެޗު ނިމެން ތިން މިނިޓަށް ވެފައިވަނިކޮށް ގޯލު ޖެހުމަށްފަހު އޭނާ ބުނީ މިއީ ހުވަފެން ހަގީގަތަށްވުން ކަމަށެވެ.
ޔުނައިޓެޑުން މި ސީޒަނަށް އޭނާ ގަތީ އިޓަލީގެ ބޮލީނިއާ އަށް 36 މިލިއަން ޕައުންޑް ދީފަ އެވެ.
ނެދަލޭންޑްސްގެ 23 އަހަރުގެ ފޯވަޑް ޔުނައިޓެޑް މި ސީޒަން ހުޅުވަން ކުޅުނު ކޮމިއުނިޓީ ޝީލްޑް މެޗުގައި ނުކުޅުވަ އެވެ. އެއީ ޔޫރޯ ފުޓްބޯޅަ މުބާރާތަށް ފަހު ޕްރީ ސީޒަން އެންމެ ފުރިހަމައަށް ނުހަދި ހުރުމުންނެވެ. ނަމަވެސް ޒިރްކްޒީ ބުނީ މި މެޗުގައި އޭނާ ދަނޑަށް ނެރުމުގެ ކުރިން ކޯޗު އެރިކް ޓެންހަގް މުހިންމު ކަމަކަށް އެދުނު ކަމަށެވެ.
މެޗަށް ފަހު ޓެންހަގް ބުނީ ޓީމާ އަލަށް ގުޅުނު ކުޅުންތެރިން މޮޅަށް ފާފޯމް ކުރުމަކީ މުހިންމު ކަމެއް ކަމަށާއި ޒިރްކްޒީއާ މެދު އޭނާ ގިނަ އުއްމީދުތަކެއް ކުރާ ކަމަށެވެ.
