ދިވެހި ފުޓުބޯޅައިގެ ލެޖެންޑްރީ ރެފްރީ މައްލާ ޅަތުއްތު އަވަހާރަވުމަކީ، ދިވެހި ކުޅިވަރަށް ފޫ ނުބެއްދޭނެ އުނިކަމެއް ކަމަށް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވީ މައްލާ ޅަތުއްތު އަވަހާރަވުމާ ގުޅިގެން އެމަނިކުފާނުގެ ރަސްމީ އެކްސް އެކައުންޓުގައި ކުރެއްވި ޕޯސްޓެއްގަ އެވެ. ބުރާސްފަތި ދުވަހުގެ މެންދުރުގެ ވަގުތެއްގައި މައްލާ ޅާތުއްތު އަވަހާރަވެފައި ވަނީ، އިންޑިއާގެ ޓްރިވެންޑްރަމްގައި ޞިއްޙީ ކަމަކަށް ފަރުވާ ހޯއްދަވަމުން ގެންދަވަނިކޮށެވެ.

ރައީސް މުޢިއްޒު ވިދާޅުވީ، ކުޅިވަރު ކުރިއެރުވުމުގައި ބައި ޤަރުނަށްވުރެ ގިނަ ދުވަހު ޤައުމަށް ޚިދުމަތްކޮށް ދެއްވާފައިވާ މަޝްހޫރު ފުޓްބޯޅަ ރެފްރީ މައްލާ ޅަތުއްތު ނިޔާވުމަކީ، ދިވެހި ކުޅިވަރުގެ ދާއިރާ އަށް ފޫ ނުބެއްދޭނެ ބޮޑު އުނިކަމެއް ކަމަށެވެ. މީގެ އިތުރުން މައްލާ ޅަތުއްތަކީ ކުޅިވަރު ކުރިއެރުވުމުގެ ރޮނގުން ޤައުމީ ހިތްވަރުދިނުމުގެ އިނާމާއި، ޤައުމީ ޝަރަފްވެރިކަމުގެ އިނާމާއި، ދައުލަތަށް ދިގު މުއްދަތަކު ޚިދުމަތްކުރެއްވުމުގެ އިނާމާއި އަދި ކުޅިވަރުގެ ލައިފް އެޗީވްމަންޓް އެވޯޑްވެސް ޙާޞިލްކުރައްވާފައިވާ ޤަައުމީ ޚިދުމަތުގެ ނަމޫނާ ޝަޚްޝިއްޔަތެއްކަމުގައި ރައީސް ވަނީ ވިދާޅުވެފަ އެވެ.

ހަމައެއާއެކު މައްލާ ޅަތުއްތު އަވަހާރަވި މި ހިތާމަވެރި ވަގުތު، އެ މަރުޙޫމުގެ ޢާއިލާ އަށް ތަޢުޒިޔާ ދަންނަވައި، ކެތްތެރިކަން މިންވަރުކޮށްދެއްވުން އެދޭ ކަމަށް ވެސް ރައީސް މުޢިއްޒު ވިދާޅުވި އެވެ. ރައީސް ވަނީ މައްލާ ޅަތުއްތަށް ސުވަރުގޭގެ ދާއިމީ ނިޢުމަތް މިންވަރު ކޮށްދެއްވުން އެދި ދުއާ ދަންނަވާފަ އެވެ.

މައްލާ ޅަތުއްތަކީ ރާއްޖޭގައި އުފެދުނު އެންމެ ފުޓުބޯޅަ ރެފްރީންގެ ތެރޭގައި ހިމެނޭ ބޭފުޅެކެވެ. އަދި އޭނާ އަކީ ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރެފްރީ ބެޖު ޙާސިލު ކުރިފުރަތަމަދިވެހި ރެފްރީ އެވެ.

މައްލާ ޅަތުއްތަށް ވަނީ ދިވެހި ކުޅިވަރަށް ޚިދުމަތްކޮށްދެއްވާފައި ވާތީ، 2021 ވަނަ އަހަރު އޭނާ އަށް ވަނީ ޝަރަފުވެރިކަމުގެ އިނާމު ވެސް ދެއްވައިފަ އެވެ. އޭގެ ފަހުން 2022 ވަނަ އަހަރު ވަނީ ދިގު މުއްދަތެއް ވަންދެން ދިވެހި ދައުލަތަށް ޚިދުމަތް ކޮށްދެއްވުމުގެ އިނާމު ވެސް ދެއްވައިފަ އެވެ. މައްލާ ޅަހުއްތު ވަނީ ގާތް ގަނޑަކަށް 43 އަހަރު ވެންދެން ދިވެހި ދައުލަތަށް ޚިދުމަތް ކޮށްދެއްވައިފަ އެވެ.

އޭގެ އިތުރުން 2023 ވަނަ އަހަރު އޮތް މޯލްޑިވްސް ސްޕޯޓްސް އެވޯޑްސް ހަފްލާގައި ވެސް ވަނީ މައްލާ ޅަތުއްތުގެ އަގު ވަޒަން ކޮށްފަ އެވެ. އެގޮތުން ލައިފް ޓައިމް އެޗީވްމަންޓް އެވޯޑު މައްލާ ޅަތުއްތު އަށް ވަނީ ލިބިފަ އެވެ. އެއާއެކު ކުޅިވަރުގެ ދާއިރާ އިން ރެފްރީ ކަމުގައި މައްލާ ޅަތުއްތަށް ހުރިހާ އެވޯޑެއް ލިބުނީ އެވެ.