ފޮފާނާ ހޯދުމާ ގާތަށް އޭސީ މިލާނުން ޖެހިލައިފި

މޮނާކޯ އަށް ކުޅެމުން އަންނަ ފްރާންސްގެ މިޑްފީލްޑަރު ޔޫސުފް ފޮފާނާ ހޯދުމަށް ކުރަމުން އަންނަ މަސައްކަތުގައި، އޭނާ ހޯދުމާ ގާތަށް އެ ކުލަބުން ޖެހިލައިފި އެވެ.

މީޑިއާ ތަކުގައި ބުނެފައިވާ ގޮތުން ޖުލައި މަހުން ފެށިގެން އޭސީ މިލާނުން އަންނަނީ ފޮފާނާ ހޯދުމަށް މަސައްކަތް ކުރަމުންނެވެ. އެގޮތުން ފޮފާނާ އާއެކު މިލާނުން ކުރިއަށް ގެންދިޔަ މަޝްވަރާތަކުގެ ތެރެއިން، އޭނާ ވަނީ އެ ކުލަބަށް ބަދަލުވާން އެއްބަސްވެފައި ކަމަށް ވެސް ރިޕޯޓުތައް ބުނެ އެވެ.

މީޑިއާ ތަކުގައި ބުނެފައިވާ ގޮތުން ފޮފާނާ ހޯދުމަށް މިލާނުން އައު ބިޑެއް އަދި އެއްބަސްވުމެއް މޮނާކޯ އަށް ހުށަހަޅާނެ އެވެ. އެއީ ކުރިން ހުށަހަޅާފައިވާ ބިޑަށް ބަދަލުތަކެއް ގެނެސްގެން މިލާނުން ހުށަހަޅާ ބިޑެއް ކަމަށް ވެސް ވަނީ ބުނެފަ އެވެ. ފޮފާނާ ވެސް ބޭނުން ވަނީ ހަަމައެކަނި މިލާނަށް ބަދަލުވާން ކަމަށް ވާއިރު، މި ހަފްތާގެ ތެރޭގައި އެ ޑީލް ކާމިޔާބު ކުރަން މިލާނުން މަސައްކަތް ކުރަމުން އަންނަ ކަމަށް މީޑިއާ ތަކުގައި ވަނީ ބުނެފަ އެވެ.

ސްޓްރަސްބާގް ދޫކޮށް ފޮފާނާ މޮނާކޯ އަށް ބަދަލުވީ 2020 ވަނަ އަހަރު އެވެ. މޮނާކޯ އާއެކު އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ. އެއްބަސްވުމުގައި ބާކީ އެއް އަހަރު އޮއްވާ، ރަނގަޅު އަގެއް ހުށަހަޅައިފި ނަމަ ފޮފާނާ ދޫކޮށްލަން މޮނާކޯ އިން އެއްބަސްވާނެ ކަމަށް ވެސް ރިޕޯޓުތައް ބުނެ އެވެ. ފޮފާނާ ވަނީ މިހާތަނަށް މޮނާކޯ އަށް ކުޅެދީފައިވާ 175 މެޗުގައި ހަތް ލަނޑު ޖަހައިފަ އެވެ.