ސްޕެއިންގެ ރެއާލް މެޑްރިޑަށް ކުޅެމުން އަންނަ ބްރެޒިލްގެ ވިނީޝިއުސް ޖޫނިއާއާ ގުޅޭ ގޮތުން ވާހަކަތަކެއް ދައްކަމުން އަންނަނީ "ހީކުރެވުމެއްގެ" މައްޗަށް ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.
މީޑިއާ ތަކުގައި ބުނެފައިވާ ގޮތުން ސައޫދީ އަރަބިޔާގެ، ސައުދީ ޕްރޯ ލީގުން 350 މިލިއަން ޔޫރޯގެ މުސާރައެއް ވިނީޝިއުސް އަށް ހުށަހަޅަމުން އަންނަ ކަމަށެވެ. އެގޮތުން ސައުދީގެ ކުލަބުތަކުން އޮތީ ވިނީޝިއުސް ހޯދުމަށް ޝައުޤުވެރިވެ ކަމަށާއި، އެ މަސައްކަތް އެ ކުލަބުތަކުން ކޮންމެ ވެސް ސިފައެއްގައި ކުރަމުން އަންނަ ކަމަށް މީޑިއާ ތަކުގައި ވަނީ ބުނެފަ އެވެ.
އެކަމާ ގުޅޭ ގޮތުން ވާހަކަ ދައްކަމުން އަންޗެލޮޓީ ބުނީ، އެ ވާހަކަތަކުގައި އެއްވެސް އަސްލެއް ނުވަތަ ހަގީގަތެއް ނެތް ކަމުގެ ޔަގީންކަން އޭނާ ދޭން ބޭނުންވާ ކަމަށެވެ. އަދި އެ ވާހަކަތަކަކީ ހަމައެކަނީ "ހީކުރެއްވުމެއްގެ" މައްޗަށް ދެކެވެމުން އަންނަ ވާހަކަތަކެއްކަން ފާހަގަކޮށް އަންޗެލޮޓީ ބުނީ، އެ ޒާތުގެ ވާހަކަ ތަކަކީ އޭނާ އަށް އައު ވާހަކަތަކެއް ވެސް ނޫން ކަމަށެވެ.
ފްލެމެންގޯ ގައި ހުރުމަށްފަހު ރެއާލަށް ބަދަލުވި ވިނީޝިއުސް އެ ކުލަބާ އެކު ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ. މިހާތަނަށް ރެއާލްގައި ހޭދަކޮށްފައިވާ ހަތް ސީޒަންގެ ތެރޭގައި ވިނީޝިއުސް ވަނީ އެ ކުލަަބަށް ކުޅެދިން 264 މެޗުގައި 83 ލަނޑު ޖަހައިފަ އެވެ. ރެއާލާ އެކު 12 ތައްޓެއް ކާމިޔާބު ކޮށްފައިވާ ވިނީޝިއުސް އަކީ އަންޗެލޮޓީ އެންމެ ބޮޑު އިސްކަމެއް ދެމުން އަންނަ ކުޅުންތެރިންގެ ތެރޭގައި ހިމެނޭ ކުޅުންތެރިޔެކެވެ.
