މެންޗެސްޓަރ ސިޓީ އަށް ކުޅެމުން އަައި އާޖެންޓީނާގެ ފޯވާޑް، ހޫލިއަން އަލްވަރޭޒް ސްޕެއިންގެ އެތުލެޓިކޯ މެޑްރިޑަށް ސޮއި ކޮށްފި އެވެ.

އުމުރުން 24 އަހަރުގެ ކުޅުންތެރިޔާ ސިޓީ އަށް ބަދަލުވީ 2022 ވަނަ އަހަރު އެވެ. އެ ކުލަބާއެކު އޭނާ ސޮއި ކުރީ ފަސް އަހަރާ، ބައިގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރު އެވެ. އެހެން ނަމަވެސް، އެތުލެޓިކޯ އިން ވަނީ އަލްވަރޭޒް ހޯދުމުގެ ޑީލް މީގެ ދުވަސްކޮޅެއް ކުރިން ކާމިޔާބު ކޮށްފަ އެވެ.

އެތުލެޓިކޯގެ އެއްބަސްވުމުގައި އަލްވަރޭޒް މިހާރު ސޮއި ކޮށްފައިވާއިރު، އެ ކުލަބުން ވަނީ އެކަން ރަސްމީކޮށް އިއުލާން ވެސް ކޮށްފަ އެވެ. އެތުލެޓިކޯ އާއެކު އަލްވަރޭޒް ސޮއި ކޮށްފައި ވަނީ ހަ އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2030 ވަނަ އަހަރުގެ ޖޫން މަހުގެ ނިޔަލަށެވެ.

އަލްވަރޭޒް ހޯދުމަށް އެތުލެޓިކޯ އިން ފީގެ ގޮތުގައި 75 މިލިއަން ޔޫރޯ ޚަރަދު ކޮށްފަ އެވެ. އެހެނިހެން ފީ ތަކާއެކު، އެތުލެޓިކޯ އިން ގާތް ގަނޑަކަށް 95 މިލިއަން ޔޫރޯ ޚަރަދު ކޮށްފައިވާ ކަމަށް ރިޕޯޓުތައް ބުނެ އެވެ. 2022 ވަނަ އަހަރު ސިޓީން އަލްވަރޭޒް ހޯދާފައި ވަނީ 14 މިލިއަން ޔޫރޯ އަށެވެ.

އަލްވަރޭޒް ވަނީ ސިޓީ އަށް މިހާތަނަށް ކުޅެދިން 103 މެޗުގައި 36 ލަނޑު ޖަހައިފަ އެވެ. ސިޓީ އާއެކު އޭނާ ވަނީ ގިނަ ކާމިޔާބީތަކެއް ހޯދައިފަ އެވެ. އެގޮތުން އަލްވަރޭޒް ވަނީ ސިޓީ އާއެކު، އިނގިރޭސި ޕްރިމިއާ ލީގު، އެފްއޭ ކަޕް، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ކާމިޔާބު ކޮށްފަ އެވެ.