ރާއްޖޭގެ ޚާރިޖީ ސިޔާސަތާއި އިސްތިޤްލާލަށް ދެ ތިން ޑެޕިއުޓީ މިނިސްޓަރުންގެ ސަބަބުން ގެއްލުންވާ އިރު، ރައީސް ޑރ.މުހައްމަދު މުއިއްޒު އަކީ އެކަން އެގޮތަށް ވާން ދޫކޮށްލާ ވަރުގެ ބަލިކަށި ރައީސެއްތޯ އެމްޑީޕީގެ ޗެއަރޕަރސަން ފައްޔާޒް އިސްމާއިލް ސުވާލު އުފައްދަވައިފިއެވެ.

އެމްޑީޕީގެ ހަވަރު ބެރު ޕެނަލް ޑިސްކަޝަންގައި ސުވާލުކުރައްވަން ފުރުސަތު ހޯއްދަވައިގެން ދެއްކެވި ވާހަކަފުޅުގައި އެ މަނިކުފާނު ވަނީ ސަރުކާރުގެ ބައެއް ސިޔާސަތުތަކަށް ފާޑު ވިދާޅުވެފައެވެ. ރާއްޖޭގެ ތާރީހުން އެނގޭގޮތުން ރާއްޖެ އަކީ 2000 އަށް ވުރެ ގިނަ އަހަރުވެފައިވާ ޤައުމެއް ކަަމަށް ވާއިރު، ރާއްޖޭގެ މިނިވަންކަން ގެއްލުނީ 3 ފަހަރެއްގެ މަތިން ކަމަށް އެނގެން އޮތް ކަމަށް ފައްޔާޒް ވިދާޅުވިއެވެ. އެހެންކަމުން ރާއްޖެ މިހާ ޒަމާންވަންދެން މިނިވަންކަމާއި އެކު އޮތީ ރާއްޖޭގެ ޚާރިޖީ ސިޔާސަތު ރަނގަޅުވުމުން ކަމަށް ފައްޔާޒް ވިދާޅުވިއެވެ. ރާއްޖޭގެ ވެރިންގެ ޚާރިޖީ ސިޔާސަތު މިހާތަނަށް އޮތީ ވަރަށް ރަނގަޅަށް ކަމަށް ފައްޔާޒް ވިދާޅުވިއެވެ.

އިންޑިއާ އަކީ ޒަމާނުއްސުރެ ރާއްޖޭގެ ތަރައްޤީގެ ބައިވެރިއެއް ކަމަށާއި އެއީ ސަރަހައްދީ ބޮޑު ބާރެއް ކަަމަށް ފައްޔާޒް ވިދާޅުވިއެވެ. އެކަން އެެހެން އޮތް އިރު ޕީޕީއެމް ޕީއެންސީގެ ވެރިކަމެއް އަންނަ ކޮންމެ ފަހަރަކު ޚާރިޖީ ސިޔާސަތަށް ބުރު އަރާފަދަ ކަންކަން ކުރާ ކަމަށް ފައްޔާޒް ވަނީ ސިފަކުރައްވާފައެވެ. އެގޮތުން ކުރީގެ ރައީސް ޔާމީންގެ ސަރުކާރުގައި އިންޑިއަން އޯޝަން ސަރަހައްދަށް ސަރަހައްދުން ބޭރުގެ ޤައުމަކަށް ވަނުމަށް ފުރުސަތު ދިން ކަމަށާއި އެއީ ރާއްޖޭގެ މިނިވަންކަމާއި އިސްތިޤްލާލަށް ނުރައްކާހިޔަންޏެއް އެޅިގެން ދިޔަ ކަމެއް ކަމަށް ފައްޔާޒް ވިދާޅުވިއެވެ. ހަމައެހެންމެ ރައީސް ޑރ.މުހައްމަދު މުއިއްޒުގެ ވެރިކަމުގައި އިންޑިއާ އާއި މެދު ޢަމަލުކުރީ ރަނގަޅަށް ނޫން ކަމަށް ފައްޔާޒް ވިދާޅުވިއެވެ.

އެއްވެސް ކަހަލަ އިހުލާސްތެރިކަމެއް މި ސަރުކާރުގައި ނެތްކަމަށް ފައްޔާޒް ވަނީ ވިދާޅުވެފައެވެ. ވައުދުތައް ވާއިރު ކަނޑައެޅިގެން ބޮޑު ދޮގު ހެދުމަށް ފަހު ފަހުން އެހެން ނުބުނާކަމަށް ބުނަމުންދާ ކަމަށް ވެސް ފައްޔާޒް ވިދާޅުވިއެވެ. އެގޮތުން ވަޒީފާ އިން މީހުން ވަކި ނުކުރާނެ ކަމަށް ބުނެ ވީ ވައުދާއި ވެސް ސަރުކާރުން ވަނީ ޚިލާފުވެފައި ކަމަށް ފައްޔާޒް ވިދާޅުވިއެވެ.