އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމަނިއަމް ޖައިޝަންކަރު ރާއްޖެ އަށް މިހާރު ކުރައްވަމުން ގެންދަވާ ތިން ދުވަހުގެ ދަތުރުފުޅުގައި ރާއްޖޭގެ ޚާރިޖީ ވަޒީރާ އެކު ހުކުރު ދުވަހުގެ ރޭ ބޭއްވެވި މަޝްވަރާ ތަކުގައި ދިފާއީ ރޮނގުންނާއި، މެރިޓައިމްގެ ދާއިރާ އިންނާއި، މީހުން ބިނާ ކުރުމާއި، އިގްތިސާދާއި ވިޔަފާރީގެ ރޮގުން އިންޑިއާ އާއި ދިވެހި ރާއްޖެ އާ ދެމެދު އިތުރަށް ގުޅުން ބަދަހި ކުރަން މަޝްވަރާ ކޮށްފި ކަމަށް އިންޑިއާގެ މިނިސްޓްރީ އޮފް އެކްސްޓާނަލް އެފެއަރޒް އިން ހާމަ ކުރި ނޫސް ބަޔާނުގައި ބުނެފިއެވެ.

މިއީ، އިދިކޮޅުގައި ތިއްބަވައިގެން އިންޑިއާ އާ މެދު ދިވެހިންގެ ހިތުގައި އޮންނަ ތަސައްވަރު ކިލަނބު ކުރުމަށް "އިންޑިއާ އައުޓް" ގެ ނަމުގައި ކެމްޕޭން ހިންގެވި ފަރާތްތަކުން ސަރުކާރާ ހަވާލުވި ފަހުން އިންޑިއާ އާއި ރާއްޖެ އާ ދެމެދުގެ ގުޅުން ބަދަހި ކުރެއްވުމަށް އިންޑިއާގެ ޚާރިޖީ ވަޒީރު ޖައިޝަންކަރު ރާއްޖެއަށް ކުރައްވާ ފުރަތަމަ ދަތުރުފުޅެވެ.

ޖައިޝަންކަރުގެ މި ދަތުރުފުޅުގައި އިންޑިއާ އިން ކުރިއަށް ގެންދާ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސް ގެ ދަށުން 6 މަޝްރޫއެއް ވަނީ އިފްތިތާހް ކޮށްފައެވެ.

އިންޑިއާގެ އެހީގައި ކުރިއަށް ގެންދަން ނިންމި މަޝްރޫއުތަކަކީ ރ. އުނގޫފާރުގައި މެންޓަލް ހެލްތް ޔުނިޓެއް އެޅުމާއި، ހދ ކުޅުދުއްފުށީގައި ޗައިލްޑް ޑިވެލޮޕް މަންޓް ސެންޓަރެއް އެޅުމާއި، ގދ، ތިނަދޫ އާއި ލ. ގަމާއި، ހއ. ދިއްދޫގައި އިންކްލޫސިވް އެޑިއުކޭޝަން ސަޕޯޓް ޔުނިޓް އެޅުމުގެ މަޝްރޫއުގެ އިތުރުން، ތ. ތިމަރަފުއްޓާއި، ތ. ވޭމަންޑޫ އާއި ގއ. ކޮނޑޭގައި މަގު ބައްތި ޖެހުމުގެ މަޝްރޫއެވެ.

ޖައިޝަންކަރުގެ ދަތުރުފުޅުގައި އިންޑިއާ ސަރުކާރުގެ އެހީގައި ފުރިހަމަ ކޮށްފައިވާ ފެނާއި ނަރުދަމާގެ 28 މަޝްރޫއު އިފްތިތާހް ކުރުމަށް ވަނީ ހަމަޖެހިފައެވެ. އޭގެ އިތުރުން އިންޑިއާގެ އެހީގައި ކުރިއަށްދާ ތިލަމާލެ ބްރިޖް މަޝްރޫއު ބައްލަވާލެއްވުމާއި، އައްޑޫ ބިން ހިއްކުމާއި، އައްޑޫ ލިންކް ބްރިޖް މަޝްރޫއު ބައްލަވާލައްވަން އައްޑޫ ސިޓީ އަށް ދަތުރުފުޅު ކުރައްވާ ގޮތައް ވަނީ ހަމަ ޖެހިފައެވެ.

އިންޑިއާގެ ޚާރިޖީ ވަޒީރުގެ މި ދަތުރުފުޅުގައި ރާއްޖޭގެ ސިވިލް ސާވިސް ކޮމިޝަން އާއި އިންޑިއާގެ ނޭޝަނަލް ސެންޓަރ ފޯ ގުޑް ގަވަނަންސް އާއި ދެމެދު މީހުން ބިނާ ކުރުމަށް ހަދާފައިވާ އެއްބަސް ވުން ވަނީ އައު ކޮށްފައެވެ. އައު ކުރެވުނު އެއްބަސްވުމުގެ ދަށުން ރާއްޖޭގެ ސިވިލް ސާވަންޓުން އިންޑިއާގައި ތަމްރީން ކުރުމަށް އެއް ހާސް ފުރުސަތު ދިނުމަށް ވަނީ ހަމަޖެހިފައެވެ.

ޖައިޝަންކަރުގެ މި ދަތުރުފުޅުގައި ރާއްޖެ އާއި އިންޑިއާގެ އީއީޒެޑް ބެލެހެއްޓުމުގައި ދެ ގައުމުން ގުޅިގެން މަސައްކަތް ކުރުމާ ބެހޭ ގޮތުން ރާއްޖޭގެ ދިފާއީ ވަޒީރު ޣާއްސާން މައުމޫން އާ މަޝްވަރާ ކުރައްވާ ގޮތައް ވަނީ ހަމަ ޖެހިފައެވެ.

ޖައިޝަންކަރުގެ ދަތުރުފުޅުގައި ސޮއި ކުރި އެމްއޯޔޫތަކުގެ ތެރޭގައި ޑިޖިޓަލް ޓްރާންސެކްޝަން ތައް ހެދުމަށް އިންޑިއާ ގައި ބޭނުން ކުރާ ޔުނިފައިޑް ޕޭމެންޓްސް އިންޓަފޭސް (ޔޫޕީއައި)ގެ ހިދުމަތް ރާއްޖެއަށް ތައާރަފް ކުރުމުގެ އެމްއޯޔޫ ހިމެނެއެވެ. ޖައިޝަންކަރު ވިދާޅުވީ، ޑިޖިޓަލް ޓްރާންސެކްޝަންތައް ފެށުމަށް އެމްއޯޔޫ ގައި ސޮއި ކުރުމަކީ އެޅުނު ފުރަތަމަ ފިޔަވަޅު ކަމަށާއި އެޚިދުމަތް ރާއްޖޭގައި އަވަސް ފުރުސަތެއްގައި ފެށިގެންދާނެ ކަމަށް އުއްމީދު ކުރައްވާ ކަމުގައެވެ.

ފޮރިން މިނިސްޓްރީގައި ހުކުރު ދުވަހުގެ ރޭ ބޭއްވި ރަސްމިއްޔާތުގައި ރާއްޖެއަށް ޔޫޕީއައި ތައާރުފް ކުރުމުގެ އެމްއޯޔޫގައި ސޮއި ކުރީ ރާއްޖޭގެ އިކޮނޮމިކް މިނިސްޓްރީ އާއި ނޭޝަނަލް ޕޭމަންޓްސް ކޯޕަރޭޝަން އޮފް އިންޑިއާ (އެންޕީސީއައި) އާ ދެމެދުގައެވެ.

ރައީސް ސޯލިހްގެ ވެރިކަމުގައި ޖައިޝަންކަރު ވަނީ ރާއްޖެ އަށް ރަސްމީ ތިން ދަތުރުފުޅު ކުރައްވާފައެވެ.

އިންޑިއާ އާއި ދިވެހި ރާއްޖެއަކީ އަވައްޓެރިންގެ ގޮތުން ޒަމާނުއްސުރެ ގާތް ރަހްމަތެރިކަން އޮންނަ ދެ ގައުމެވެ. އެ ގުޅުމަށް ހީނަރުކަން އައީ އިންޑިއާ އާ ދެކޮޅު ކެމްޕޭނެއް ހިންގުމުގައި އިސްކޮށް އުޅުނު ފަރާތްތައް ސަރުކާރާ ހަވާލުވި ހިސާބުންކަން އިންޑިއާގެ މީޑިއާ އިން ފާހަގަ ކުރެއެވެ. ރައީސް ޑރ.މުއިއްޒު ވެރިކަމަށް ވަޑައިގަތުމާ އެކު ދެގައުމުގެ ގުޅުމަށް އައި ހީނަރުކަން ކޮންމެވެސް ވަރަކަށް ހަމަޔަކަށް އެޅެމުން ދަނިކޮށް، ޑރ މުއިއްޒު ސަރުކާރުގެ ސިޔާސީ މަތި މަގާމު ތަކުގައި ތިބި ބަޔަކު އިންޑިއާގެ ބޮޑު ވަޒީރަށް ސޯޝަލް މީޑިއާގައި ފުރައްސާރަ ކުރި މައްސަލައިގައި އަނެއްކާ ދެ ގައުމުގެ ގުޅުމަށް އިތުރު ނުތަނަވަސްކަން ކުރިމަތިވި ކަން ފާހަގަ ކުރެވެއެވެ.

އެ މައްސަލައިގައި ޑރ. މުއިއްޒުގެ ސަރުކާރުން ފިޔަވަޅު އެޅި މުވައްޒަފުން އަދިވެސް ތިބީ ފުރިހަމަ މުސާރައާ އެކު ސަސްޕެންޝަންގައި ކަމަށްވެއެވެ.