އާދައިގެ ވަޒީފާތަކުން މީހުން ވަކި ކުރަމުންދާ ދަނޑިވަޅެއްގައި އެމްއެމްއޭ އަށް 5 އެމްޑީން ހޯދަން އިއުލާން ކޮށްފި

ސަރުކާރު ކުންފުނިތަކުން އާދައިގެ ވަޒީފާތަކުން ގިނަ އަދަދެއްގެ ދިވެހިން ވަކި ކުރަން ނިންމާފައިވަނިކޮށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ފަސް މެނޭޖިންގ ޑިރެކްޓަރު (އެމްޑީ) އިން ހޯދަން އިއުލާން ކޮށްފިއެވެ.

އެމްއެމްއޭ ގެ އޮނިގަނޑުގައި މުޅިން އަލަށް ހިމެނި އެމްޑީ އިންގެ މަގާމަށް ކުރިމަތިލާން ބުރާސްފަތި ދުވަހު ވަނީ އިއުލާން ކޮށްފައެވެ.

މުސާރަ އާއި އިނާޔަތްތަކުގެ ގޮތުގައި ކޮންމެ އެމްޑީ އަކަށް މަހަކު 50،000 އާއި 55،000 އާ ދެމެދުގެ އަދަދަކަށް އާމްދަނީ ލިބޭނެ ކަމަށް އިއުލާން ގައި ވެއެވެ.

ފަސް އަހަރު ދުވަހުގެ މުއްދަތައް އައްޔަން ކުރާ މެނޭޖިން ޑިރެކްޓަރުންނަށް ކަނޑައަޅާފައިވާ ދާއިރާތައް ކަމަށް ބުނެފައި ވަނީ މަނިޓަރީ ޕޮލިސީ، ރިސާޗް އެންޑް ސްޓެޓިސްޓިކްސް، ފައިނޭންޝަލް ސްޓެބިލިޓީ، ބޭންކިން އޮޕަރޭޝަންސް، ކޯޕޮރޭޓް ސަވިސަސް އަދި ފައިނޭންޝަލް ސެކްޓާ ޑިވަލަޕްމަންޓް އެވެ.

އެމްއެމްއޭގެ ގަވަރުނަރު ކަމުގެ މަގާމުގައި ހުންނެވި އަލީ ހާޝިމް އެ މަގާމުން ވަކި ކުރުމަށްފަހު ޑރ. މުއިއްޒުގެ ސަރުކާރުން އެ މަގާމަށް ހުށަހެޅި ރައީސް ޔާމީން ސަރުކާރުގައި ފިނޭންސް މިނިސްޓަރ ކަން ކުރެއްވި އަހްމަދު މުނައްވަރު އެ މަގާމަށް އައްޔަން ކުރަން ސަރުކާރުގެ ސުޕަރ މެޖޯރިޓީ އޮންނަ ރައްޔިތުންގެ މަޖިލީހުން ރުހުން ދިނުމާއެކު ރައީސް މުއިއްޒު ވަނީ ޖުލައި މަހުގެ 31 ވަނަ ދުވަހު އޭނާ އެ މަގަމާށް އައްޔަން ކުރައްވާފައެވެ.

މުނައްވަރު އެ މަގާމަށް އައްޔަން ކުރުމާއެކު، އެމްއެމްއޭގެ އެސިސްޓެންޓް ގަވަރުނަރުގެ މަގާމު މެނޭޖިންގ ޑިރެކްޓަރގެ މަގާމަށް ވަނީ ބަދަލު ކޮށްފައެވެ. އަދި މަގާމުގައި ތިއްބެވި އެސިސްޓެންޓް ގަވަރުނަރުން ވަނީ އެޑްވައިޒަރުންގެ މަގާމް އުފައްދާ އެ މަގާމަށް ބަދަލު ކޮށްފައެވެ.

ބޮޑު މުސާރަ އާއި އިނާޔަތްތަކާއެކު ފަސް މަގާމަށް މީހުން ހޯދަން އެމްއެމްއޭ އިން އިއުލާން ކުރީ ސަރުކާރުގެ ޚަރަދުތައް ކުޑަކުރަން ކަމަށް ބުނެ ގިނަ އަދަދެއްގެ މުވައްޒަފުން ސަރުކާރުގެ ކުންފުނިތަކުން ވަކި ކުރަން ނިންމުމާއެކު އެކަމާ ކަންބޮޑުވުން ފާޅު ކޮށް ސަރުކާރަށް ފާޑުކިޔަމުންދާ ދަނޑިވަޅެއްގައެވެ.