ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވެރިކަމަށް ވަޑައިގެންނެވިފަހުން، ދިވެހިރާއްޖެއިން މިހާރު ފެންނަނީ ދައުލަތް އެކޮޅުކޮޅުން ގޮސް ސިފަ ގެއްލޭ މަންޒަރު ކަމަށް އާރުޑީސީގެ ކުރީގެ މެނޭޖިންގ ޑިރެކްޓަރު އަދި އެމްޑީޕީގެ ގައުމީ މަޖިލީހުގެ މަޑުއްވަރީ ދާއިރާގެ ރައީސް މޫސާ އަލީ މަނިކު (މޫކޭ) ވިދާޅުވެއްޖެއެވެ.
ބުރާސްފަތި ދުވަހުގެ ރޭ އެމްޑީޕީން ބޭއްވި ހަރުގެ ޖަލްސާގައި މޫކޭ ވިދާޅުވީ ރައްޔިތުން ނުކުމެ މުއިއްޒު ރައީސް ކަމަށް އިންތިޚާބު ކުރީ ވަރަށް ގިނަ އުންމީދުތަކާއެކު ކަމަށެވެ.
އެގޮތުން ދިރިއުޅުމަށް ބޮޑެތި ކުރިއެރުންތަކެއް ލިބި، ތަރައްގީއަށް ހެޔޮ ބަދަލުތަކެއް އަންނާނެ ކަމަށް ރައްޔިތުން އުންމީދުކުރި ކަމަށް މޫކޭ ވިދާޅުވިއެވެ. ނަމަވެސް މިސަރުކާރަށް 8 މަހަށް ވުރެ ގިނަ ދުވަސްވެގެން ދިޔައިރު ރައްޔިތުން ތިބީ ކަންބޮޑުވެ މާޔޫސްވެފައި ކަމަށާއި، ރައްޔިތުންނަށް މަންފާ ލިބޭ ރަނގަޅު އެއްވެސް ކަމެއް ސަރުކާރުން މިހާތަނަށް ކޮށްފައިނުވާ ކަމަށް އޭނާ ވިދާޅުވިއެވެ.
ސިޔާސީ މަގާމުތަކަށް އިޝާރާތް ކުރައްވައި މޫކޭ ވިދާޅުވީ މަގާމުތަކަށް އައްޔަން ކުރައްވަނީ ކާކުކަން ރައީސްއަށް ވެސް އެނގިވަޑައިނުގަންނަވާ ކަމަށާއި، މިހާރު މަގާމުތަކުގައި ތިބި ޖުމްލަ އަދަދު ވެސް އެމަނިކުފާނަށް އެނގިވަޑައިނުގަންނަވާ ކަމަށެވެ.
މުކޭ ވިދާޅުވީ މިސަރުކާރަކީ ސިއްރުވެރިކަން ބޮޑު ސަރުކާރެއް ކަމަށާއި، ދައުލަތުން އެއްވެސް ކަމެއް ހާމަނުކުރާ ކަމަށެވެ. އަދި މިހާރު ރައީސް މުއިއްޒު އުޅުއްވަނީ ނޫސްވެރިންނަށް ފިއްލަވައިގެން ކަމަށާއި، ވަޒީރުން އުޅުއްވަނީ ރައްޔިތުންގެ މަޖިލީހަށް ފިއްލަވައިގެން ކަމަށް މޫކޭ ވިދާޅުވިއެވެ.
9 މަސް ވެގެންދިޔައިރުގައި މިއަދު މިގެނެވުނު ބަދަލާމެދު ރައްޔިތުން ތިބީ ކަންބޮޑުވެ ދެރަވެ މާޔޫސްވެފައި. ރަނގަޅު ހަމައެއްވެސް ކަމެއް ނުފެނުނީ. ފުރަތަމަ މީހުން އައްޔަން ކުރުމާ ހިސާބުން ބަލާއިރު ވަޒީރުން، ވަޒީރުންނާ ވައްތަރުގެ ވަޒީރުން، ވަޒީރު ކުލާގެ ވަޒީރުން، މެޑަމް، މެޑަމްއާ އެއްކަހަލަ މީހުން، މެޑަމް ފެންވަރުގެ މީހުން، މެޑަމްދޭ ޚިދުމަތް ދޭނެ ކަހަލަ މީހުން މިކަހަލަ ބައިވަރު މަގާމުތައް އައްޔަންކޮށް ނިންމައިފި. މި މަގާމުތަކުގެ އަދަދު ރައީސްއަށް އެނގިވަޑައިނުގަންނަވާ.އާރުޑީސީގެ ކުރީގެ މެނޭޖިންގ ޑިރެކްޓަރު އަދި އެމްޑީޕީގެ ގައުމީ މަޖިލީހުގެ މަޑުއްވަރީ ދާއިރާގެ ރައީސް މޫސާ އަލީ މަނިކު
މޫކޭ ވިދާޅުވީ ރައީސް މުއިއްޒު ރައްޔިތުން ގާތުގައި ދެއްކި ހުރިހާ ވާހަކަތަކާ ދެކޮޅަށް އަމަލުކުރަމުންދާ ކަމަށެވެ.
އެގޮތުން ޑޮލަރުގެ ރޭޓު މަތިނުވާނެ ކަމަށް ރައީސް މުއިއްޒު ވިދާޅުވި ނަމަވެސް އަތުނުޖެހޭ ހިސާބަށް ރޭޓް މަތިވަމުންދާ ކަމަށް މޫކޭ ވިދާޅުވިއެވެ. މަސްވެރިންގެ އަތުން ގަންނަ މަހުގެ އަގު 20 ރުފިޔާއަށް ވުރެ ކުޑަ ނުކުރާނެ ކަމަށް ރައީސް މުއިއްޒު ވިދާޅުވުމަށްފަހު މަހުގެ އަގަށްވާ ފައިސާ ވެސް ސަރުކާރުން ދޫކުރަމުންނުދާ ކަމަށާއި، ދަނޑުވެރިންނާ، ވަޒީފާތަކުގައި އުޅޭ މުވައްޒަފުންނާ އަދި ކުދި ވިޔަފާރިތަކުގެ ވެރިންނަށް ދަތިކުރަމުންދާ ކަމަށް އޭނާ ވިދާޅުވިއެވެ.
މީގެ އިތުރުން މޫކޭ ވިދާޅުވީ ރައީސް މުއިއްޒު ރިޔާސީ އިންތިޚާބުގެ ކެންޕޭންގެ ތެރޭގައި ޒުވާނުން ކާރުތަކުގައި ނެރުނު ކަމަށާއި، ޒުވާނުން ލައްވާ ބޮޑެތި ރެލީތައް ބޭއްވި ކަމަށެވެ. އެޒުވާނުންގެ ވެހިކަލުތަކުގައި ސްޓިކަރ ނުޖަހާނެ ކަމަށާއި، ޕާކު ކުރުމަށް ބޮޑެތި އިމާރާތްތަކާއި، ޕާކިންއަށް ޚާއްސަ ޒޯންތައް ދޫކުރާނެ ކަމަށް ރައީސް މުއިއްޒު ވައުދުވެވަޑައިގެންނެވި ކަމަށެވެ. ނަމަވެސް ފެނިގެންދިޔައީ ޒުވާނުންނަށް ޕާކުކުރާނެ ޖާގަ ނުދައްކައި، ވެހިކަލްތައް ޓޯ ކުރާ މަންޒަރު ކަމަށް މޫކޭ ވިދާޅުވިއެވެ.
އެހެންކަމުން މިހާރު ފެނިގެންދަނީ ރާއްޖޭގެ ހުރިހާ ދިމާލެއް ވެސް އެކޮޅުކޮޅުން ބޯކޮޅު ވަތަށް ޖެހެމުންދާ މަންޒަރު ކަމަށް މޫކޭ ވިދާޅުވިއެވެ.
