އިންޑިއާގެ މާކެޓު ވަރަށް މުހިއްމު، ރާއްޖެއާ މެދު އިންޑިއާގައި އޮތް މާޔޫސްކަން ވަނީ ވަރަށް ބޮޑަށް ފިލާފައި: އެމްއެމްޕީއާރްސީގެ އެމްޑީ

ފަތުރުވެރިކަމުގެ ސިނާއަތަށް އިންޑިއާގެ މާކެޓު ވަރަށް މުހިއްމު ކަމަށާއި، ރާއްޖެއާ މެދު އިންޑިއާގައި އޮތް މާޔޫސްކަން މިހާރު ވަރަށް ބޮޑަށް ފިލާފައިވާ ކަމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، (އެމްއެމްޕީއާރްސީ)ގެ މެނޭޖިން ޑިރެކްޓަރު އިބްރާހީމް ޝިއުރީ ވިދާޅުވިއެވެ.

އެމްއެމްޕީއާރްސީ، މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް، މަޓާޓޯ އަދި ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސް، އެންއެޗްޖީއޭއެމް ގުޅިގެން އިންޑިއާގައި ވަނީ ރޯޑް ޝޯތަކެއް ކުރިއަށް ގެންގޮސްފައެވެ. މި ރޯޑް ޝޯތައް ކުރިއަށް ގެންގޮސްފައިވަނީ އިންޑިއާގެ ބޮޑު 3 ސިޓީއެއްގައެވެ.

ނިއުދިއްލީގައި ރޯޑް ޝޯ ބާއްވާފައިވަނީ 30 ޖުލައި 2024 ގައެވެ. މުންބައީގައި ބާއްވާފައިވަނީ 01 އޯގަސްޓް 2024 ގައެވެ. އަދި 03 އޮގަސްޓް 2024 ގައި ބެންގަލޫރުގައި ޝޯ ބާއްވާފައިވެއެވެ.

މިމަސައްކަތްތަކާ ގުޅޭގޮތުން މައުލޫމާތު ދިނުމަށް ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި އެމްއެމްޕީއާރްސީގެ މެނޭޖިން ޑިރެކްޓަރު ޝިއުރީ ވިދާޅުވީ މަސައްކަތްތައް ވަރަށް ކާމިޔާބު ކަމަށާއި، އިންޑިއާގެ މާކެޓު ކުރިއަށް އޮތްތަނުގައި ރަނގަޅުވާނެ ކަމަށެވެ.

އެގޮތުން ޓޮޕް-3 ގެ މާކެޓަށް އިންޑިއާ ބަދަލުވުން ގާތް ކަމަށާއި، އެކަމުގެ ފެހި ސިގްނަލް ލިބިފައިވާ ކަމަށް ޝިއުރީ ވިދާޅުވިއެވެ.

ޝިއުރީ ވިދާޅުވީ އިންޑިއާއަކީ ބޮޑު ގައުމެއް ކަމަށާއި، ރާއްޖެއަށް މުހިއްމު ގައުމެއް ކަމަށެވެ. ކުރެވުނު މަސައްކަތްތަކުގެ ސަބަބުން ކުރިން ރާއްޖެއާ މެދު އޮތް ހިތްނުތަނަވަސްކަން މިހާރު ވަރަށް ބޮޑަށް ފިލާފައިވާ ކަމަށް އޭނާ ވިދާޅުވިއެވެ.

އެމްއެމްޕީއާރްސީން ބުނީ އިންޑިއާއަކީ ރާއްޖޭގެ ފަތުރުވެރިކަމަށް ރަނގަޅު މާކެޓެއް ކަމަށާއި، ކުރިއަށް އޮތްތަނުގައި އިންޑިއާގައި އިތުރު ރޯޑް ޝޯތައް ބާއްވާނެ ކަަމަށެވެ.