ކިންގްސްޓޮން ހޯލްޑިންގްސް މޯލްޑިވްސްއިން ސައިކަލު ނެގުމަށް ފައިސާ ދެއްކި މީހުންގެ މައުލޫމާތު ހިއްސާކުރުމަށް ފުލުހުން އެދިއްޖެއެވެ.
ބުދަ ދުވަހު ފުލުހުން ބުނީ ކިންގްސްޓޮން ހޯލްޑިންގްސް މޯލްޑިވްސް ޕްރައިވެޓް ލިމިޓެޑުން އާންމުންނަށް ސައިކަލު ވިއްކާ ކަމަށް ބުނެ މަކަރާއި ހީލަތުން ފައިސާ ނަގާފައިވާ ކަމަށް ތުހުމަތުކުރެވޭ މައްސަލަތަކެއް މި ޚިދުމަތަށް ހުށަހެޅިފައިވާ ކަމަށެވެ.
ފުލުހުން ބުނީ ކިންގްސްޓޮން ހޯލްޑިންގްސް މޯލްޑިވްސްއަށް ސައިކަލު ގަތުމުގައި މަކަރާއި ހީލަތުގެ އަމަލެއްގެ ޝިކާރައަކަށް ވެފައިވާ އިތުރު އެއްވެސް ފަރާތެއް ވާނަމަ، އިކޮނޮމިކް ކްރައިމް އިންވެސްޓިގޭޝަންގެ ނަންބަރު 9790048 އަށް ގުޅައި، އެ މައުލޫމާތު ހިއްސާކުރުމަށް އެދޭ ކަމަށެވެ.
އެ މައްސަލަތައް މިހާރު ތަހުގީގު ކުރަމުންދާ ކަމަށް ފުލުހުން ބުނެއެވެ.
މައުލޫމާތު ލިބިފައިވާ ގޮތުގައި ސައިކަލު ގަތުމަށް ކިންގްސްޓޮން ހޯލްޑިންގްސް މޯލްޑިވްސްއަށް ގިނަ ބަޔަކު ވަނީ ފައިސާ ދައްކާފައެވެ. ނަމަވެސް ގިނަ ދުވަސްތަކެއްވީއިރު ވެސް ސައިކަލު ލިބޭގޮތް ވަނީ ނުވެފައެވެ. އަދި ސައިކަލު ލިބޭނެ ކަމަށް ބުނެ، އެކުންފުނިން އެކި ފަހަރު އެކި ތާރީހުތައް ދީފައިވާ ކަމަށް ފައިސާ ދެއްކި މީހުން ބުނެއެވެ. އަނބުރާ ފައިސާ ދިނުމަށް އެމީހުން އެދުނު ނަމަވެސް ފައިސާ ވެސް ސައިކަލު ވެސް ދީފައިނުވާތީ ގިނަ ބަޔަކު ކިންސްޓަންގެ ފިހާރަތައް ކުރިމައްޗަށް އެއްވެ ވަނީ ނުރުހުން ފާޅުކޮށްފައެވެ.
